.jpg)
សកម្មជនកូរ៉េខាងត្បូងពាក់ម៉ាស់មុខរបស់លោកមូន ជេអុីន (ឆ្វេង) និងលោកគីម ជុងអ៊ុន ឈរថត។ AFP
ក្រុងសេអ៊ូល: កូរ៉េខាងជើងនិងកូរ៉េខាងត្បូង បើកកិច្ចជំនួបកំពូលលើកទី ៣ របស់ពួកគេនៅថ្ងៃសុក្រ ដោយបានបង្កឲ្យមានក្តីសង្ឃឹមចំពោះការស្វែងរកសន្តិភាព និងភាពតានតឹងជាច្រើនឆ្នាំជុំវិញបញ្ហានៃការបាញ់សាកល្បងអាវុធនុយក្លេអ៊ែរនិងកាំជ្រួចមីស៊ីលរបស់កូរ៉េខាងជើង បានថយកម្តៅ។
មេដឹកនាំកូរ៉េខាងជើង លោកគីម ជុងអ៊ុន នឹងជួបប្រជុំគ្នាជាមួយប្រធានាធិបតីកូរ៉េខាងត្បូងលោក ម៉ូន ជេអ៊ីន នៅក្នុងតំបន់ភាគខាងត្បូងនៃភូមិ ១ ក្នុងតំបន់បទឈប់បាញ់ ក្នុងភូមិប៉ាន់ម៉ាន់ជុំ នៅតាមបណ្តោយព្រំដែន មុនពេលជំនួបកំពូលជាមួយប្រធានាធិបតីអាមេរិកលោកដូណាល់ ត្រាំ ដែលត្រូវបានគេរំពឹងថានឹងធ្វើឡើងអំឡុងជាច្រើនសប្តាហ៍ខាងមុខ។
កិច្ចប្រជុំនាថ្ងៃសុក្រនេះធ្វើឡើង បន្ទាប់ពីភាពតានតឹងបានកើនឡើងកាលពីឆ្នាំមុនខណៈកូរ៉េខាងជើងបានធ្វើឲ្យមានការរីកលូតលាស់យ៉ាងឆាប់រហ័សពាក់ព័ន្ធនឹងកម្មវិធីអាវុធនុយក្លេអ៊ែររបស់ខ្លួន ដែលត្រូវបានហាមប្រាមខណៈលោកត្រាំ បានធ្លាក់ក្នុងជម្លោះ ពាក្យសម្តី ប្រកបដោយការបង្កហេតុយ៉ាងខ្លាំងជាមួយនឹង មេដឹកនាំរបស់កូរ៉េខាងជើងលោកគីម ជុងអ៊ុន។
កូរ៉េខាងជើង និងកូរ៉េខាងត្បូង កាលពីមុន បានបើកជំនួបកំពូលនៅក្នុងក្រុងព្យុងយ៉ាងនៅក្នុងឆ្នាំ ២០០០ និងក្នុងឆ្នាំ ២០០៧។
លោកមូន ជេអុីន (ឆ្វេង) សន្ទនាតាមទូរស័ព្ទជាមួយគីម ជុងអ៊ុន។ AFP
អាមេរិក និងសហភាពសូវៀត បានឯកភាពគ្នាបែងចែកឧបទ្វីបកូរ៉េជា ២ ចំណែករៀងៗខ្លួនអំឡុងរយៈពេលប៉ុន្មានថ្ងៃបន្ទាប់ពីការចុះចាញ់របស់ជប៉ុន បានបញ្ចប់សង្គ្រាមលោកលើកទី ២ និងការគ្រប់គ្រងអាណានិគមនិយមរបស់ខ្លួនលើឧបទ្វីបកូរ៉េនេះ។
នៅក្នុងខែមិថុនា ឆ្នាំ ១៩៥០ កូរ៉េខាងជើងដែលកាន់របបកុម្មុយនីស្ត បានធ្វើការឈ្លានពានកូរ៉េខាងត្បូង ដែលកាន់របបមូលធននិយម ដោយបានបង្កឲ្យកើតមានជាសង្គ្រាមដ៏សាហាវ ដែលបានសម្លាប់មនុស្សរាប់លាននាក់។
ក្រុងប៉េកាំងបានគាំទ្រក្រុងព្យុងយ៉ាងនៅក្នុងជម្លោះ អូសបន្លាយរយៈពេល ៣ ឆ្នាំ ខណៈក្រុងវ៉ាស៊ីនតោនបានផ្តល់ការគាំទ្រចំពោះកូរ៉េខាងត្បូងជា ក្រុមសម្ព័ន្ធមិត្ត ដែលបានស្ថិតស្ថេរយូរអង្វែង។
ភាគីទាំង ២ បានច្បាំងគ្នារហូតដល់ចំណុចគាំងដំណើរហើយការបង្កសង្គ្រាម បានបញ្ចប់នៅក្នុងឆ្នាំ ១៩៥៣ ជាមួយនឹងការបង្កើតកិច្ចព្រមព្រៀងបទឈប់បាញ់ ជាជាងកិច្ចព្រមព្រៀងដើម្បីស្វែងរកសន្តិភាពផ្លូវការមួយ ហើយ បើនិយាយតាមលក្ខណៈបច្ចេកទេសគឺពួកគេនៅមានសង្គ្រាម។ ក្រុងព្យុងយ៉ាង បានធ្វើតេស្តកិច្ចព្រមព្រៀងបទឈប់បាញ់ដោយវាយប្រហារលើកូរ៉េខាងត្បូង និងបញ្ជូនទាហានកុម្ម៉ង់ដូចំនួន ៣១ នាក់ ទៅធ្វើឃាតអតីត ប្រធានាធិបតីលោក Park Chung Hee៕
