.jpg)
ក្រោយពីការជួបប្រជុំនៅថ្ងៃពុធ ទី ២៧ មករា សហភាពអឺរ៉ុបនៅតែស្ថិតក្នុងជម្លោះជាមួយក្រុមហ៊ុន AstraZenca បន្ទាប់ពីក្រុមហ៊ុនផលិតឱសថអង់គ្លេស-ស៊ុយអែតនេះ បានច្រានចោលការទាមទារឱ្យទាញយកការផ្គត់ផ្គង់វ៉ាក់សាំងកូវីដ ១៩ របស់ពួកគេ ពីរោងចក្រនៅអង់គ្លេសមកកាន់ទ្វីបអឺរ៉ុបវិញ។
ប្រធានភ្នាក់ងារសុវត្ថិភាពឱសថ និងអាហាររបស់សហភាពអឺរ៉ុបលោកស្រី Stella Kyriakides បាននិយាយក្រោយការជួបប្រជុំថា៖ «យើងសោកស្ដាយចំពោះការបន្តខ្វះខាតនៃភាពច្បាស់លាស់លើកាលវិភាគផ្គត់ផ្គង់ និងផែនការច្បាស់លាស់ពី AstraZeneca ក្នុងការផ្គត់ផ្គង់រហ័សនៃបរិមាណវ៉ាក់សាំងដែលយើងបានកក់ទុកសម្រាប់ ត្រីមាសទី១»។
ជម្លោះនេះបានចាប់ផ្ដើមកាលពីថ្ងៃចន្ទ ទី ២៥ នៅពេលដែលក្រុមហ៊ុន Astra Zeneca (AZN) បានប្រាប់មន្ត្រីសហភាពអឺរ៉ុបថា ក្រុមហ៊ុននឹងកាត់បន្ថយការផ្គត់ផ្គង់នៅប៉ុន្មានសប្ដាហ៍ខាងមុខនេះ ដែលចំនួនដូសនឹងមានតិចតួចជាងចំនួនបានព្រមព្រៀងគ្នាពីមុន ដោយសារតែបញ្ហាផលិតកម្មនៅរោងចក្ររបស់ពួកគេនៅបែលហ្ស៊ិក។ សហភាពអឺរ៉ុបអះអាងថា នេះជាការរំលោភកិច្ចសន្យា ហើយទាមទារឱ្យក្រុមហ៊ុនផ្គត់ផ្គង់ដូសវ៉ាក់សាំងផលិតនៅតំបន់ផ្សេងទៀត ដើម្បីបំពេញការខ្វះខាត៕
