The Phnom Penh Post Search

Search form




Logo of Phnom Penh Post newspaper Phnom Penh Post - មតិ​បណ្តា​ប្រទេស​អាស៊ាន​ទាក់ទិន​នឹង​រដ្ឋប្រហារ​នៅ​មីយ៉ាន់ម៉ា ក្នុង​កិច្ចប្រជុំ​ក្រុម​ប្រឹក្សា​សិទ្ធិ​មនុស្ស​អង្គការ​សហប្រជាជាតិ

មតិ​បណ្តា​ប្រទេស​អាស៊ាន​ទាក់ទិន​នឹង​រដ្ឋប្រហារ​នៅ​មីយ៉ាន់ម៉ា ក្នុង​កិច្ចប្រជុំ​ក្រុម​ប្រឹក្សា​សិទ្ធិ​មនុស្ស​អង្គការ​សហប្រជាជាតិ

Content image - Phnom Penh Post
ក្រុមអ្នកតវ៉ាកាន់បដាអំពាវនាវឱ្យដោះលែងមេដឹកនាំស៊ីវិលលោកស្រី អ៊ុងសាន ស៊ូជី។ រូបថត AFP

មតិ​បណ្តា​ប្រទេស​អាស៊ាន​ទាក់ទិន​នឹង​រដ្ឋប្រហារ​នៅ​មីយ៉ាន់ម៉ា ក្នុង​កិច្ចប្រជុំ​ក្រុម​ប្រឹក្សា​សិទ្ធិ​មនុស្ស​អង្គការ​សហប្រជាជាតិ

រដ្ឋប្រហារ​នៅ​មីយ៉ាន់ម៉ា​កាល​ពី​ដើម​ខែ​កុម្ភៈ ដែល​ជា​រដ្ឋ​ប្រហារ​លើក​ដំបូង​បង្អស់​ក្នុង​រយៈពេល​ជាង ៣ ទសវត្សរ៍ ​បាន​ផ្លាស់ប្តូរ​ទិដ្ឋភាព​នយោបាយ​នៅ​ក្នុង​ប្រទេស​មីយ៉ាន់ម៉ា។ វិថី​ឆ្ពោះ​ទៅ​រក​លទ្ធិ​ប្រជាធិបតេយ្យ​នៅ​ក្នុង​ប្រទេស​នេះ​កំពុង​តែ​រង្គោះរង្គើ ជាពិសេស​ក្រោយ​ការ​បោះឆ្នោត​ភ្លូក​ទឹក​ភ្លូក​ដី​កាល​ពី​ឆ្នាំ ២០១៥ គាំទ្រ​គណបក្ស​សម្ព័ន្ធជាតិ​ដើម្បី​ប្រជាធិបតេយ្យ​ដឹកនាំ​ដោយ​លោកស្រី ​អ៊ុងសាន ស៊ូជី ​និង​ជ័យជម្នះ​របស់​អ្នកស្រី​ម្តង​ទៀត​នៅ​ក្នុង​ការ​បោះឆ្នោត​ជាតិ​ខែ​វិច្ឆិកា ឆ្នាំ ២០២០។

ឥឡូវ​នេះ​រដ្ឋប្រហារ​បាន​នាំ​ប្រទេស​មីយ៉ាន់ម៉ា ​ត្រឡប់​ទៅ​រក​ថ្ងៃ​ភាព​អន់​ថយ​ខាង​លទ្ធិប្រជាធិបតេយ្យ​នេះ ដែល​ធ្វើ​ឱ្យ​មាន​ប្រតិកម្ម​ពី​ប្រទេស​ផ្សេងៗ​នៅ​ជុំវិញ​ពិភព​លោក។ ក្នុង​កិច្ច​ប្រជុំ​ក្រុមប្រឹក្សា​សិទ្ធិមនុស្ស​អង្គការ​សហប្រជាជាតិ​កាល​ពី​ថ្ងៃទី ១២ កុម្ភៈ ថ្មីៗ​នេះ បណ្ដា​ប្រទេស​មួយ​ចំនួន​ក្នុង​អាស៊ាន​បាន​សម្ដែង​ក្ដី​ព្រួយ​បារម្ភ និង​មាន​ប្រតិកម្ម​ចំពោះ​ស្ថានភាព​នៅ​ប្រទេស​មីយ៉ាន់ម៉ា ដែល​មាន​ដូច​ខាងក្រោម៖

ប្រទេស​ឥណ្ឌូនេស៊ី ​បាន​ចេញ​សេចក្ដី​ថ្លែងការណ៍​នៅ​ថ្ងៃ​ដដែល​នេះ​ថា ប្រទេស​ខ្លួន​បាន​និង​កំពុង​គាំទ្រ​ហើយ​ក៏​នៅ​តែ​បន្ត​គាំទ្រ​ដល់​ការ​តស៊ូ​របស់​មីយ៉ាន់ម៉ា​ឆ្ពោះ​ទៅ​ការ​ផ្លាស់ប្តូរ​លទ្ធិប្រជាធិបតេយ្យ​ប្រកប​ដោយ​សន្តិភាព ​និង​គាំទ្រ​ការ​គោរព​សិទ្ធិមនុស្ស។ ហេតុ​ដូច្នេះ​យើង​មាន​ការ​ព្រួយ​បារម្ភ​យ៉ាង​ខ្លាំង​ចំពោះ​ស្ថានភាព​នយោបាយ​ថ្មីៗ​ដែល​បាន​បង្ក​ផល​ប៉ះពាល់ និង​កាន់​តែ​កើន​ឡើង​យ៉ាង​ខ្លាំង​នេះ។

សេចក្ដី​ថ្លែង​ការណ៍​បាន​បន្ត​ថា យើង​សូម​អំពាវនាវ​ដល់​ប្រទេស​មីយ៉ាន់ម៉ា ​ឱ្យ​ប្រកាន់​ខ្ជាប់​នូវ​គោលការណ៍​ប្រជាធិបតេយ្យ ​និង​រដ្ឋធម្មនុញ្ញ​តរៀង​ទៅ។ ការ​គោរព​សិទ្ធិ​សេរីភាព​មូលដ្ឋាន ​និង​សិទ្ធិ​មនុស្ស​ដែល​មាន​នៅ​ក្នុង​ធម្មនុញ្ញ​អាស៊ាន ​និង​សេចក្តី​ប្រកាស​ស្តីពី​សិទ្ធិ​មនុស្ស​អាស៊ាន​គួរ​តែ​ត្រូវ​បន្ត​អនុវត្ត។

លោក Kham-Inh KHI-TCHADETH ឯកអគ្គរដ្ឋទូត និង​តំណាង​អចិន្រៃ្តយ៍​នៃ​ប្រទេស​ឡាវ បាន​ឱ្យ​ដឹង​ក្នុង​សេចក្ដី​ថ្លែងការណ៍​មួយ​ថា៖ «ជា​ទស្សនៈ​របស់​យើង​សហគមន៍​អន្តរជាតិ​គួរ​តែ​បង្កើត​បរិយាកាស​អំណោយ​ផល​សម្រាប់​ប្រទេស​មីយ៉ាន់ម៉ា ​ក្នុង​ការ​ដោះស្រាយ​ផ្ទៃ​ក្នុង​របស់​ខ្លួន​ដោយ​មធ្យោបាយ​សន្តិវិធី​ដើម្បី​ឱ្យ​ប្រទេស​មីយ៉ាន់ម៉ា ​បន្ត​ដំណើរការ​លទ្ធិប្រជាធិបតេយ្យ​របស់​ខ្លួន​ក៏​ដូចជា​ការ​អភិវឌ្ឍ​ជាតិ​ផង​ដែរ»។

លោក Ahmad Faisal Muhamad មន្ត្រី​ការ​ទូត​ម៉ាឡេស៊ី​បាន​អំពាវនាវ​ឱ្យ​គ្រប់ភាគី​ទាំង​អស់​គាំទ្រ និង​គោរព​ស្ថាប័ន​ប្រជាធិបតេយ្យ​ដំណើរការ​ប្រជាធិបតេយ្យ នីតិរដ្ឋ សិទ្ធិមនុស្ស​ និង​មូលដ្ឋានគ្រឹះ​សេរីភាព​រួមទាំង​សិទ្ធិ​ប្រមូល​ផ្តុំ​ដោយ​សន្តិវិធី និង​សេរីភាព​ក្នុង​ការ​បញ្ចេញមតិ​ជាដើម។

លោក​បាន​បន្ត​ថា៖ «យើង​ជំរុញ​ឱ្យ​គ្រប់​ភាគី​ទាំង​អស់​នៅ​មីយ៉ាន់ម៉ា​ឱ្យ​មាន​ភាព​អត់ធ្មត់ ​និង​ដោះស្រាយ​រាល់​ការ​ចោទ​ប្រកាន់​អំពី​ការ​បោះឆ្នោត​ក្នុង​ឥរិយាបថ​សន្តិភាព​តាមរយៈ​ការ​សន្ទនា និង​បង្កើត​យន្តការ​ច្បាប់​ផង​ដែរ»។

ដោយ​ឡែក​ប្រទេស​ហ្វីលីពីន ​​ក៏​បាន​បង្ហាញ​ការ​គាំទ្រ​ជានិច្ច​ដល់​ប្រទេស​មីយ៉ាន់ម៉ា។ សេចក្ដី​ថ្លែងការណ៍​ពី​ប្រទេស​ហ្វីលីពីន បាន​សរសេរ​ថា៖ «ស្ដ្រី​ម្នាក់​នេះ (លោកស្រី ​អ៊ុងសាន ស៊ូជី) គឺ​ជា​និមិត្តរូប​នៃ​លទ្ធិប្រជាធិបតេយ្យ​យ៉ាង​ជ្រាលជ្រៅ និង​ត្រូវ​បាន​កោតសរសើរ​យ៉ាង​ខ្លាំង​ក្នុង​ចំណោម​ប្រជាជន​ហ្វីលីពីន»។

ប្រទេស​សិង្ហបុរី ក៏​បាន​សរសេរ​ក្នុង​សេចក្ដី​ថ្លែងការណ៍​ថា៖ «ប្រទេស​សិង្ហបុរី សូម​សម្តែង​ការ​ព្រួយបារម្ភ​យ៉ាង​ខ្លាំង​អំពី​ស្ថានភាព​ចុង​ក្រោយ​នៅ​ក្នុង​ប្រទេស​មីយ៉ាន់ម៉ា។ យើង​កំពុង​តាមដាន​ស្ថានការណ៍​នេះ យ៉ាង​ដិត​ដល់​ហើយ​សង្ឃឹម​ថា ​គ្រប់ភាគី​ពាក់ព័ន្ធ​ទាំង​អស់​អត់ធ្មត់​បន្ត​កិច្ច​ចរចា​នានា ដើម្បី​ឆ្ពោះ​ទៅ​រក​លទ្ធផល​វិជ្ជមាន និង​សន្តិភាព។ មីយ៉ាន់ម៉ា ​គឺ​ជា​​មិត្ត​ជិតស្និទ្ធ​របស់​សិង្ហបុរី ​និង​ជា​សមាជិក​សំខាន់​របស់​អាស៊ាន។ យើង​សង្ឃឹម​ថា ស្ថានការណ៍​នឹង​វិល​មក​រក​ភាព​ប្រក្រតី​វិញ​ឆាប់​បំផុត»។

លោកស្រី LE THI TU-YET MAI មន្ត្រី​ការទូត និង​ជា​អ្នក​តំណាង​អចិន្រៃ្តយ៍​នៃ​សាធារណរដ្ឋ​សង្គម​និយម​វៀតណាម​បាន​ឱ្យ​ដឹង​ថា៖ «ក្នុង​កាលៈទេសៈ​បែប​នេះ​វា​ចាំបាច់​ណាស់​ដែល​សហគមន៍​អន្តរជាតិ និង​ដៃគូ-អភិវឌ្ឍន៍​បន្ត​ការគាំទ្រ​ដល់​លទ្ធិប្រជាធិបតេយ្យ​នៅ​មីយ៉ាន់ម៉ា។ ប្រទេស​វៀតណាម សូម​លើក​ទឹក​ចិត្ត​ដល់​ការ​បន្ត​ការ​សន្ទនា​ការ​ផ្សះផ្សា និង​សង្ឃឹម​ថា ស្ថានភាព​នឹង​ត្រឡប់​ទៅ​ភាព​ប្រក្រតី​ស្រប​តាម​ឆន្ទៈ និង​ផល​ប្រយោជន៍​របស់​ប្រជាជន​មីយ៉ាន់ម៉ា»។

ខណៈ​ពេល​ដែល​សមាជិក​ភាគ​ច្រើន​របស់​អង្គការ​សហប្រជាជាតិ​ហាក់ដូច​សស្រោកសស្រាំ​នឹង​បញ្ហា​នៅ​ប្រទេស​មីយ៉ាន់ម៉ា ប្រទេស​ចិន ​និង​រុស្ស៊ី បាន​ចាត់​ទុក​បញ្ហា​យោធា​មីយ៉ាន់ម៉ា​នៅ​មីយ៉ាន់ម៉ា ថា​ជា​កិច្ចការ​ផ្ទៃ​ក្នុង​ទៅ​វិញ។ ប្រទេស​ទាំង ២ មាន​ប្រវត្តិ​ទំនាក់ទំនង​ល្អ​ជាមួយ​យោធា​មីយ៉ាន់ម៉ា​រហូត​មក។ មក​ដល់​បច្ចុប្បន្ន ប្រទេស​ទាំង ២ ត្រូវ​ប្រឈម​នឹង​ការ​ថ្កោលទោស​របស់​ពលរដ្ឋ​មីយ៉ាន់ម៉ា​តាមរយៈ​យុទ្ធនាការ​តាម​អ៊ីនធឺណិត​ផង​ដែរ។

មិន​ត្រឹម​តែ​ប៉ុណ្ណោះ ក្រុម​អ្នក​តវ៉ា​មីយ៉ាន់ម៉ា​ក៏​បាន​បន្ត​ធ្វើ​បាតុកម្ម​នៅ​មុខ​ស្ថានទូត​នៃ​ប្រទេស​ទាំង ២ នៅ​ក្នុង​សប្តាហ៍​នេះ​ដោយ​ជំរុញ​ឱ្យ​ពួក​គេ​ឈប់​គាំទ្រ​របប​យោធា​តទៅ​ទៀត។ បាតុករ​ម្នាក់​នៅ​មុខ​ស្ថានទូត​ចិន​ប្រចាំ​នៅ​ទីក្រុង​យ៉ាំងហ្គោន (Yangon) បាន​ប្រាប់​សារព័ត៌មាន​ថា៖ «យើង​ចង់​ឱ្យ​រដ្ឋាភិបាល​ចិន​គាំទ្រ​រដ្ឋាភិបាល​ជាប់​ឆ្នោត​របស់​យើង ​និង​ឈរ​ជាមួយ​ប្រជាជន​យើង។ យើង​សង្ឃឹម​ថា ​ប្រទេស​ចិន នឹង​មិន​គាំទ្រ​មេ​ដឹកនាំ​រដ្ឋ​ប្រហារ​ទេ»។
ដោយ​ឡែក​បាតុករ​ម្នាក់​ទៀត​ដែល​បាន​ចូលរួម​ធ្វើ​បាតុកម្ម​ប្រឆាំង​រដ្ឋ​ប្រហារ​នៅ​មុខ​ស្ថានទូត​រុស្ស៊ី​ក្នុង​ទីក្រុង​យ៉ាំងហ្គោន (Yangon) កាល​ពី​ថ្ងៃ​សុក្រ ​ក៏​បាន​ប្រាប់​សារព័ត៌មាន The Irrawaddy ថា៖ «យើង​ចង់​ឱ្យ​ពួក​គេ​ឮ​សំឡេង​របស់​យើង»។

ប៉ុន្តែ​អ្នក​តំណាង​រុស្ស៊ី​បាន​និយាយ​ថា ប្រទេស​ខ្លួន​ជឿជាក់​ថា ការ​ដោះស្រាយ​ការ​ខ្វែង​គំនិត​គ្នា​រវាង​កម្លាំង​នយោបាយ​នៅ​ក្នុង​ប្រទេស​មីយ៉ាន់ម៉ា ​គឺ​ជា​កិច្ចការ​ផ្ទៃ​ក្នុង​សុទ្ធសាធ​របស់​រដ្ឋ​អធិបតេយ្យ។ បន្ថែម​ពី​នេះ​ប្រទេស​រុស្ស៊ី បាន​ទទូច​ដល់​សហគមន៍​អន្តរជាតិ​កុំ​ឱ្យ​រិះគន់​របប​យោធា​ចៀស​ជាង «ការ​ផ្តល់​ជំនួយ​ជាក់ស្តែង​ដល់​អាជ្ញាធរ​ថ្មី​នៃ​ប្រទេស​មីយ៉ាន់ម៉ា» ដើម្បី​បំពេញ​កាតព្វកិច្ច​របស់​ពួក​គេ​រាប់​បញ្ចូល​ទាំង​ផ្នែក​សិទ្ធិ​មនុស្ស​ផង​នោះ។

យ៉ាងណា​មិញ​មេ​ដឹកនាំ​យោធា​មីយ៉ាន់ម៉ា​បាន​ពន្យារ​ការ​ឃុំឃាំង​លោកស្រី ​អ៊ុងសាន ស៊ូជី ខណៈ​ការ​ឃុំ​ខ្លួន​របស់​លោកស្រី​ត្រូវ​ផុត​កំណត់​នៅ​ថ្ងៃ​ចន្ទ។ លោកស្រី​នឹង​នៅ​តែ​ត្រូវ​ជាប់​ឃុំឃាំង​ដល់​ថ្ងៃទី ១៧ កុម្ភៈ ហើយ​លោកស្រី​នឹង​បង្ហាញ​ខ្លួន​នៅ​តុលាការ​តាមរយៈ​វីដេអូ​ខល៕

អត្ថបទគួរចាប់អារម្មណ៍