.jpg)
ភូមិមួយនៅក្នុងទីក្រុងណាមវ៉ុន នៅខេត្តចូលឡាភាគខាងត្បូង ត្រូវជន់លិចដោយសារទឹកភ្លៀងខ្លាំង។ Yonhap
ក្រុងសេអ៊ូល៖ ទន្លេ និងកន្លែងទឹកធ្លាក់សំខាន់ៗជាច្រើន នៅក្នុងតំបន់ភាគនិរតី នៃប្រទេសកូរ៉េខាងត្បូង បានហូរជន់លិច ឬបានឈានជិតដល់ការជន់លិច នៅតាមកន្លែងមួយចំនួនកាលពីថ្ងៃសៅរ៍ ដោយសារភ្លើងធ្លាក់យ៉ាងខ្លាំងនៅទីនោះ ដោយបានបង្ខំឲ្យក្រុមពលរដ្ឋក្នុងតំបន់រត់ភៀសខ្លួន និងកាត់ផ្តាច់ដល់ការដឹកជញ្ជូនថែមទៀតផង។
យោងតាមអាជ្ញាធរបានឲ្យដឹងថា ភ្លៀងធ្លាក់ខ្លាំង ក៏បានបង្កឲ្យមានការរអិលបាក់ដីមួយនៅក្នុងខេត្តចូលឡាភាគខាងជើង ដោយបានបណ្តាលឲ្យមនុស្ស ២ នាក់ស្លាប់។
ភ្លៀងធ្លាក់រយៈពេល ២ ថ្ងៃ បានបង្កឲ្យទឹកជំនន់នៅទន្លេស៊ុមជីននៅក្នុងស្រុកហ្គុកស៊ុង និងហ្គូរយី ស្រុកទាំង ២ នេះបានស្ថិតនៅក្នុងខេត្តចូលឡាភាគខាងត្បូង។
ច្រាំងទន្លេនៅក្នុងទីក្រុងណាមវ៉ុន នៅជិតស្រុកហ្គូរយី បានបាក់រលំនៅប្រហែលម៉ោង ១២ និង ៥០ នាទីរសៀល។
មន្ត្រីបានបន្ថែមថា ការិយាល័យប្រចាំតំបន់របស់ក្រសួងដែនដី ហេដ្ឋារចនាសម្ព័ន្ធ និងការដឹកជញ្ជូន បានថ្លែងវាយតម្លៃអំពីទំហំនៃការខូចខាត ដោយសារទឹកជំនន់អាចឈានដល់ ៥០-១០០ ម៉ែត្រ។ ការវាយតម្លៃនោះ នៅតែពិបាកទទួលបានព័ត៌មានពិតប្រាកដ ដោយសារមិនអាចទៅដល់កន្លែងរងគ្រោះនោះ។
ភូមិមួយនៅក្នុងស្រុកម៉ូជូ នៅខេត្តចូលឡាភាគខាងជើង ត្រូវជន់លិច។ Yonhap
ខណៈដីកសិកម្មដ៏ធំល្វឹងល្វើយ និងផ្ទះជាច្រើនខ្នង ត្រូវបានទឹកជន់លិចគ្មានសល់ ហើយអាជ្ញាធរបានថ្លែងកាលពីពេលថ្មីៗនេះថា ពួកគេបានចេញបញ្ជាឲ្យក្រុមពលរដ្ឋនៅក្នុងតំបន់ដែលរងផលប៉ះពាល់ ត្រូវជម្លៀសខ្លួនចេញពីទីនោះជាបន្ទាន់។
មនុស្សប្រហែល ៣០០ នាក់ បានចាកចេញពីភូមិនៅជិតច្រាំងទន្លេ ជាទីកន្លែងដែលមានផ្ទះយ៉ាងតិច ៧០ ខ្នង ត្រូវបានជន់លិចនៅក្នុងទឹក។
កម្រិតទឹកទន្លេយុងសាន និងទន្លេសំខាន់ផ្សេងទៀតនៅក្នុងខេត្តនោះ បានពេញប្រៀប ខណៈតំបន់ទឹកធ្លាក់ ១ កន្លែងនៅក្នុងទីក្រុងហ្គាងជូ ចម្ងាយ ២៧០ គីឡូម៉ែត្រពីទីក្រុងសេអ៊ូលភាគខាងត្បូង បានហូរជន់លិចច្រាំងមួយចំនួន។ អាជ្ញាធរទន្លេបានបើកទំនប់ទឹក ដោយបានបណ្តាលឲ្យភូមិរាប់សិបកន្លែង ផ្តាច់ការទាក់ទងជាបណ្តោះអាសន្ន។
យោងតាមអាជ្ញាធរប្រចាំតំបន់បានឲ្យដឹងថា ការបាក់ដី ១ បានកើតឡើងនៅប្រហែលម៉ោង ៤ និង ៤២ នាទីល្ងាច នៅក្នុងស្រុកចាងស៊ូ ខេត្តចូលឡាភាគខាងជើង ហើយបានកប់ផ្ទះ ១ នៅក្នុងភក់។
មនុស្ស ២ នាក់ ជាបុរសមានវ័យ ៥៩ ឆ្នាំម្នាក់ និងប្រពន្ធរបស់គាត់ ត្រូវបានគេរកឃើញថាបានស្លាប់ ពួកគេបានថ្លែងថា ថ្វីបើខ្លួនមិនបានដឹងអំពីព័ត៌មានពិតប្រាកដ ថាតើមានមនុស្សប៉ុន្មាននាក់ ត្រូវបានកប់នៅក្នុងភក់នោះ។ មន្ត្រីបានថ្លែងថា មនុស្សប្រហែល ២-៣ នាក់កំពុងបាត់ខ្លួន៕ Yonhap/SK
