.jpg)
អតីតនាយករដ្ឋមន្ត្រីម៉ុងតេណេហ្គ្រោ Dusko Markovic បង្ហាញការគាំទ្រនៅក្នុងអំឡុងការតវ៉ាប្រឆាំងរដ្ឋាភិបាលថ្មីនៅក្នុងទីក្រុង Podgorica ។ AFP
មនុស្សរាប់ពាន់នាក់ បានធ្វើបាតុកម្មនៅរដ្ឋធានី Podgorica នៃប្រទេសម៉ុងតេណេហ្គ្រោ ដើម្បីប្រឆាំងនឹងកិច្ចខិតខំប្រឹងប្រែងរបស់រដ្ឋាភិបាលទើបជាប់ឆ្នោតថ្មី ដែលមានគោលបំណងផ្លាស់ប្តូរច្បាប់សាសនាដ៏ចម្រូងចម្រាសក្នុងប្រទេស និងបង្កឱ្យមានភាពតានតឹងជុំវិញទំនាក់ទំនងស្មុគស្មាញរវាងប្រទេសនេះ ជាមួយនឹងប្រទេសស៊ែប៊ី។
កាលពីថ្ងៃចន្ទ ក្រុមបាតុករបានបន្ទរជាសំឡេងថា «នេះមិនមែនជាប្រទេសស៊ែប៊ី» និង «ក្បត់ជាតិ» នៅមុខសភាមុន ពេលកិច្ចជជែកដេញដោលអំពីការផ្លាស់ប្តូរច្បាប់ដែលបានស្នើឡើងដោយរដ្ឋាភិបាលថ្មី។ មុនពេលសម័យប្រជុំចាប់ផ្តើមលោកនាយករដ្ឋមន្រ្តី Dusko Markovic អនុប្រធាននៃគណបក្សប្រជាធិបតេយ្យសង្គមប្រជាធិបតេយ្យ (DPS) ជារដ្ឋាភិបាលអាណត្តិមុន ដែលអនុម័តច្បាប់សាសនាដើម ត្រូវបានស្វាគមន៍ និងសាទរពីអ្នកតវ៉ានៅមុខសភា។
មន្រ្តីមួយចំនួននៃគណបក្សប្រជាធិបតេយ្យសង្គមប្រជាធិបតេយ្យ (DPS) និងគណបក្សសេរីមួយចំនួនបានគាំទ្រចំពោះការតវ៉ាប្រឆាំងរបស់ក្រុមបាតុករនេះផងដែរ។
បាតុករម្នាក់ក្នុងចំណោមអ្នកដទៃ គឺលោក Nemanja Batricevic បានចោទប្រកាន់រដ្ឋាភិបាលថ្មីថា បានប្រគល់ទ្រព្យសម្បត្តិទៅព្រះវិហារគ្រិស្តអូស្សូដក់របស់ស៊ែប៊ី និងស៊ែប៊ី។ លោកបាននិយាយថា៖ «ពួកគេកំពុងប្រគល់កំណប់វប្បធម៌ម៉ុងតេណេ្រហ្គីនដល់វិហារគ្រិស្តអូស្សូដក់របស់ស៊ែប៊ី និងស៊ែប៊ីហើយ។ ថ្ងៃនេះដោយមានការបោះឆ្នោតពុករលួយពីពួកម៉ុងតេណេហ្គ្រីនមួយចំនួនបានធ្វើឱ្យក្រុមនេះ ឡើងកាន់កាប់ប្រទេសម៉ុងតេណេហ្គ្រោ ម្តងទៀតហើយ»។
បាតុកម្មនេះ គឺជាការតវ៉ាធំដំបូងគេបង្អស់នៅក្នុងប្រទេសតំបន់បាល់កង់ដ៏តូចមួយនេះ ដើម្បីប្រឆាំងនឹងរដ្ឋាភិបាលថ្មី ដែលបានឡើងកាន់អំណាច បន្ទាប់ពីឈ្នះសំឡេងឆ្នោត ច្រើនជាងបន្តិចលើគណបក្សគាំទ្រលោកខាងលិច ដែលធ្លាប់កាន់អំណាចជាយូរមកហើយ។ កាលពីថ្ងៃទី ៣០ ខែសីហា ប្លុកប្រឆាំងចំនួន ៣ បានឈ្នះភាគច្រើននៃ ៤១ នៃអាសនៈទាំង ៨១ នៅក្នុងសភាឈ្នះឆ្នោតលើគណបក្សប្រជាធិបតេយ្យសង្គមប្រជាធិបតេយ្យ (DPS)។
ច្បាប់ស្ដីអំពីសាសនានេះ បានអនុម័តកាលពីចុងឆ្នាំ ២០១៩ ក្នុងនោះដែរ គេឃើញមានវិហារសាសនារាប់រយកន្លែងត្រូវបានគ្រប់គ្រងដោយវិហារគ្រិស្តអូស្សូដក់របស់ស៊ែប៊ី (SPC) ហើយត្រូវបានគេប្រែទៅជាសម្បត្តិរបស់រដ្ឋម៉ុងតេណេហ្គ្រីនវិញ។
ប៉ុន្តែរដ្ឋាភិបាលថ្មីដែលទើបជាប់ឆ្នោត មានទំនោរទៅរកប្រទេសស៊ែប៊ី និងមានភាពជិតស្និទ្ធជាមួយព្រះវិហារផង នោះបាននិងកំពុងស្នើសុំការកែប្រែថ្មីដោយធ្វើយ៉ាងណាឱ្យព្រះវិហារទាំងអស់ស្ថិតក្នុងកណ្តាប់ដៃរបស់អូស្សូដក់របស់ស៊ែប៊ី (SPC) និងមានមូលដ្ឋាននៅប៊ែលក្រែន (ប្រទេសស៊ែប៊ី)។
ក្រុមអ្នកតវ៉ាបានចោទប្រកាន់រដ្ឋាភិបាលដែលបានកាន់អំណាចកាលពីដើមខែនេះថា «ព្យាយាមលុបបំបាត់រដ្ឋម៉ុងតេណេ្រហ្គីន និងអត្តសញ្ញាណជាតិ»។ យ៉ាងណាមិញ គេនៅមិនទាន់ដឹងច្បាស់នៅឡើយទេថា សភានឹងបោះឆ្នោតផ្លាស់ប្តូរច្បាប់សាសនានៅពេលណា។
ខណៈពេលដែលប្រទេសម៉ុងតេណេហ្គ្រោ ប្រកាសឯករាជ្យពីប្រទេសស៊ែប៊ី កាលពី ១៤ ឆ្នាំមុន ប្រវត្តិសាស្រ្ត និងវប្បធម៌របស់ពួកគេមានទំនាក់ទំនងគ្នាយ៉ាងជ្រាលជ្រៅ។ ប្រហែល ១ ភាគ ៣ នៃប្រជាជនប្រមាណ ៦២០ ០០០ នាក់ ជាជនជាតិស៊ែប៊ី ខណៈដែលអូស្សូដក់របស់ស៊ែប៊ី នៅតែជាស្ថាប័នសាសនាដ៏សំខាន់នៅក្នុងប្រទេស។
រដ្ឋាភិបាលអាណត្តិមុនទទួលឥទ្ធិពលយ៉ាងខ្លាំងពីលោក Milo Djukanovic ជាបុគ្គលរឹងមាំ និងខ្លាំងពូកែម្នាក់ដែលជំរុញឱ្យមានការបោះឆ្នោតសភាចំពោះច្បាប់នេះ កាលខែធ្នូ ឆ្នាំ ២០១៩ ទោះបីមានការប្រឆាំងយ៉ាងខ្លាំងពីវិហារគ្រិស្តអូស្សូដក់របស់ស៊ែប៊ី និងគណបក្សនយោបាយដែលគាំទ្រស៊ែប៊ីក៏ដោយ។ ក្រុមអ្នករិះគន់មួយចំនួនបានទិតៀនច្បាប់នេះថា ជាការប៉ុនប៉ងរឹបអូសទ្រព្យសម្បត្តិព្រះវិហារ តែអាជ្ញាធរបានបដិសេធថា មិនដែលមានផែនការបែបនេះកើតឡើងឡើយ។
សមាជិកសភា DPS លោក Dragutin Papovic បាននិយាយថា៖ «សំណើនេះត្រូវបានរើសអើងប្រឆាំងនឹងពលរដ្ឋ ២ ភាគ ៣ នៃពលរដ្ឋម៉ុងតេណេហ្គ្រោ។ រដ្ឋាភិបាលនេះ បង្កើតឱ្យមានសហគមន៍សាសនាតែមួយប្រភេទសម្រាប់ប្រទេសមួយទាំងមូល។ យើង នឹងមិនអនុញ្ញាតឱ្យរឿងនេះកើតឡើងទេ ហើយយើងនឹងប្រើគ្រប់មធ្យោបាយរបស់ប្រជាធិបតេយ្យ ដើម្បីការពារពលរដ្ឋរបស់យើង»។
រដ្ឋមន្រ្តីក្រសួងយុត្តិធម៌លោក Vladimir Leposavic បាននិយាយថា៖ «គ្មានការរើសអើងរវាងសហគមន៍សាសនាទេ។ ជាមួយនឹងការផ្លាស់ប្តូរនេះ គឺជាការពង្រឹងច្បាប់សម្បត្តិវប្បធម៌ដែលគ្រប់គ្រងដោយសហគមន៍សាសនាប៉ុណ្ណោះ ហើយក៏គ្មាននរណាម្នាក់អាចផ្ទេរទ្រព្យសម្បត្តិរដ្ឋបានដែរ»។
យ៉ាងណាមិញ នៅក្នុងពេលបោះឆ្នោតខែសីហា គណបក្សសង្គមប្រជាធិបតេយ្យរបស់លោក (DPS) បានចាញ់ឆ្នោតក្រុមគណបក្សប្រឆាំងដែលដឹកនាំដោយសម្ព័ន្ធមិត្ត (SPC) ជាលើកដំបូងក្នុងរយៈពេល ៣ ទសវត្សរ៍កន្លងមកនេះ។ គណបក្សសង្គមប្រជាធិបតេយ្យរបស់លោក (DPS) បានបង្វែរ ប្រទេសម៉ុងតេណេហ្គ្រោឱ្យចេញឆ្ងាយពីឥទ្ធិពលរបស់ស៊ែប៊ី និងរុស្ស៊ី។ ប្រជាជាតិនៅតំបន់ Adriatic ដែលរួមមានប្រទេសម៉ុងតេណេហ្គ្រោ បានចូលជាសមាជិកណាតូក្នុងឆ្នាំ ២០១៧ និងកំពុងស្វែងរកសមាជិកភាពក្នុងសហភាពអឺរ៉ុបផងដែរ៕
