.jpg)
អ្នកតវ៉ាម្នាក់ព្យាយាមរារាំងប៉ូលិសប្រឆាំងកុបកម្ម ក្រោយពីមិត្តគាត់ដួល។ AFP
ក្រុងប៊ែរឡាំង៖ មនុស្សរាប់រយនាក់បានធ្វើកុបកម្មនៅកណ្តាលទីក្រុងស្តាតត៍ហ្គាត នៃប្រទេសអាល្លឺម៉ង់ ក្នុងរយៈពេលប៉ុន្មានម៉ោងកាលពីព្រឹកថ្ងៃអាទិត្យ ដោយបានគប់ដុំថ្ម និងដបទៅលើប៉ូលិស និងចូលលួចប្លន់ហាងជាច្រើនកន្លែង ក្រោយពីវាយកម្ទេចបង្អួចហាងលក់ទំនិញអស់ជាច្រើនទៀត។
អាជ្ញាធរបានថ្លែងនៅក្នុងសេចក្តីថ្លែងការណ៍មួយ ចេញពីទីក្រុងភាគនិរតីនេះ ថា៖ «បច្ចុប្បន្ន ប៉ូលិសកំពុងធានាសន្តិសុខ និងកំពុងសួរចម្លើយមនុស្សជាង ២០ នាក់ ដែលបានចាប់ខ្លួនជាបណ្តោះអាសន្ន»។
សេចក្តីថ្លែងការណ៍នោះ បានឲ្យដឹងទៀតថា ប៉ូលិស ១២ នាក់ ក៏បានរងរបួសនៅក្នុងការប៉ះទង្គិចជាមួយអ្នកធ្វើកុបកម្ម។
លោក Sascha Binder ដែលកំពុងដឹកនាំសមាជិកសភាតំបន់របស់គណបក្សសង្គមប្រជាធិបតេយ្យបានថ្កោលទោសអំពើហិង្សានោះ យ៉ាងខ្លាំង។
«វាជាក់ស្តែងណាស់ គឺមិនអាចទទួលយកបានជាដាច់ខាត ដែលនៅកណ្តាលប្រទេសរបស់យើងក្លាយជាកន្លែងសង្គ្រាមស៊ីវិលកំពុងផ្ទុះឡើង។ យើងមិនដឹងថាមានសមរភូមិប្រយុទ្ធគ្នា នៅតាមដងផ្លូវនានានៅក្នុងរដ្ឋ BadenWuerttemberg មានទំហំធំបែបនេះទេ»។
ភាពតានតឹងបានផ្ទុះឡើងរយៈពេលខ្លី ក្រោយពេលរំលងអាធ្រាត្រ ដោយសារប៉ូលិសត្រួតពិនិត្យ ទៅលើអ្នកប្រើប្រាស់គ្រឿងញៀនខ្លះ ដែលបានប្រមូលផ្តុំបិទទីលាន Schlossplatz ធំជាងគេបំផុតរបស់ទីក្រុងនេះ។
ការប៉ះទង្គិចគ្នាបន្ទាប់មក បានផ្ទុះឡើងនៅទីនោះ ខណៈក្រុមបាតុករជាច្រើនក្រុមបានផ្ទុះហិង្សា ដោយពួកគេបានប្រើប្រាស់ដំបង ឬដែកទីប វាយកម្ទេចកញ្ចក់រថយន្តប៉ូលិសអស់ជាច្រើនគ្រឿងនៅក្នុងតំបន់នោះ៕ AFP/SK
