មនុស្សរាប់សិបនាក់ កំពុងបាត់ខ្លួននៅភាគពាយព្យប្រទេសនីហ្សេរីយ៉ា បន្ទាប់ពីទូកដឹកទំនិញលើសទម្ងន់មួយបានដឹកអ្នកដំណើរប្រហែល ១៦០ នាក់ បានលិចនៅក្នុងទន្លេនីហ្សេ។ នេះបើតាមឱ្យដឹងពីអាជ្ញាធរក្នុងស្រុក។
លោក Abdullahi Buhari Wara ប្រធានរដ្ឋបាលនៅសង្កាត់ Ngaski បាននិយាយថា ទូកដែលបានចេញដំណើរពីរដ្ឋនីហ្សេរីយ៉ាភាគកណ្តាល ឆ្ពោះទៅកាន់ភាគពាយព្យនៃរដ្ឋ Kebbi បានធ្លាយ និងលិចកាលពីថ្ងៃ ពុធ កន្លងទៅ។
លោកបានឱ្យដឹងថា៖ «ក្នុងប្រតិបត្តិការជួយសង្គ្រោះ គេរកឃើញអ្នកដំណើរតែ ២២ នាក់ និងសាកសពមនុស្សម្នាក់ប៉ុណ្ណោះ។ អ្នកដំណើរប្រហែល ១៤០ នាក់នៅបាត់ខ្លួននៅឡើយ»។
យោងតាមមន្រ្តីគ្រាអាសន្នបានឱ្យដឹងថា ទូកដឹកទំនិញក្នុងស្រុកដែលដឹកអ្នកដំណើរជាង ១០០ នាក់ បានបាក់ជា ២ បន្ទាប់ពីបានប៉ះនឹងគល់ឈើអំឡុងពេលមានព្យុះនៅពេលពួកគេត្រឡប់មកពីផ្សារក្នុងតំបន់។ គួរបញ្ជាក់ផងដែរថា ទូកនោះ ក៏ត្រូវបានផ្ទុកខ្សាច់ពីអណ្តូងរ៉ែមាសផងដែរ៕