.jpg)
ក្រុមអ្នកតវ៉ាអេត្យូពី កំពុងប្រមូលផ្តុំគ្នា នៅក្នុងទីក្រុង អាឌីស អាបេបា។ AFP
ក្រុងអាឌីសអាបេបា៖ ប្រភពប៉ូលិសបានថ្លែងកាលពីថ្ងៃអាទិត្យថា មនុស្សយ៉ាងតិច ១៦៦ នាក់បានស្លាប់ នៅក្នុងប្រទេសអេត្យូពី ក្រោយពីការស្លាប់របស់តារាចម្រៀងដ៏ល្បីឈ្មោះម្នាក់ បានផ្ទុះការតវ៉ាហិង្សា ដែលបានបង្កឲ្យមានការធ្វើកុបកម្មនៅក្នុងតំបន់អូរ៉ូមៀ និងរដ្ឋធានីអាឌីស អាបេបា របស់ប្រទេសនេះ។
ស្នងការរងប៉ូលិសប្រចាំតំបន់អូរ៉ូមៀ គឺលោកហ្គីរម៉ាហ្គីឡាម បានថ្លែងប្រាប់ប្រព័ន្ធផ្សព្វផ្សាយកាលពីយប់ថ្ងៃសៅរ៍ថា មនុស្សចំនួន ១៥៦ នាក់បានស្លាប់ នៅក្នុងការធ្វើកុបកម្ម នៅក្នុងនោះរួមមាន សមាជិកកងកម្លាំងសន្តិសុខចំនួន ១១ នាក់ផងដែរ។
ប៉ូលិសនៅក្នុងរដ្ឋធានីអាឌីស អាបេបា បានថ្លែងកាលពីថ្ងៃអង្គារថា មនុស្ស ១០ នាក់បានស្លាប់ នៅក្នុងការធ្វើកុបកម្មនៅក្នុងនោះរួមមានមន្ត្រីប៉ូលិស ២ នាក់។
លោក ហាឆាលូ ហ៊ុនឌីសសា ជាអ្នកចម្រៀងម្នាក់ ដែលបានផ្តោតទៅលើសិទ្ធិរបស់ក្រុមជនជាតិភាគតិចអូរ៉ូម៉ូនៅប្រទេសអេត្យូពី ហើយលោកបានក្លាយជាសំឡេងដ៏មានប្រជាប្រិយនៅក្នុងរលកនៃការតវ៉ាមួយ ដែលបានឈានទៅរកការទម្លាក់នាយករដ្ឋមន្ត្រីកាលពីឆ្នាំ ២០១៨ ត្រូវបានបាញ់សម្លាប់ដោយក្រុមខ្មាន់កាំភ្លើងមិនស្គាល់អត្តសញ្ញាណកាលពីថ្ងៃចន្ទ។
បន្ទាប់ពីលោកបានស្លាប់ ការតវ៉ាទ្រង់ទ្រាយធំបានផ្ទុះឡើងនៅក្នុងទីក្រុងអាឌីស-អាបេបា និងតំបន់អូរ៉ូមៀ ដែលជាស្រុកកំណើតរបស់ប្រជាជនជនជាតិភាគតិចអូរ៉ូម៉ូ។
យោងតាមប្រព័ន្ធផ្សព្វផ្សាយបានរាយការណ៍ថា អាជ្ញាធរបិទអ៊ីនធឺណិត៕ Xinhua/SK
