.jpg)
ក្រុងហ្វារ៉ាហ៍ៈ មន្ត្រីម្នាក់ក្នុងតំបន់បានអះអាងថា មន្ត្រីប៉ូលិសយ៉ាងតិច ៤ នាក់បានស្លាប់ និងមនុស្ស ១៦ នាក់ផ្សេងទៀតរងរបួស ក្រោយពីការគ្រាប់បែកមួយគ្រាប់បានផ្ទុះឡើង នៅខាងក្រៅប៉ុស្តិ៍ប៉ូលិសខេត្តមួយកន្លែង នៅក្នុងខេត្តហ្វារ៉ាហ៍ភាគខាងលិច នៅអាហ្វហ្គានីស្ថាន កាលពីថ្ងៃពុធ។
លោកវេជ្ជបណ្ឌិត អាប់ឌុល ចាបារ ស្សាហ៊ីក មកពីក្រុមប្រឹក្សាសុខាភិបាលខេត្ត បានប្រាប់កាសែតស៊ីនហួថា៖ «អ្នកស្លាប់ ៤ នាក់ និងអ្នករបួសចំនួន ១៦ នាក់ផ្សេងទៀត ត្រូវបានគេបញ្ជូនទៅកាន់មន្ទីរពេទ្យធំខេត្តមួយកន្លែង បន្ទាប់ពីការផ្ទុះគ្រាប់បែកមួយគ្រាប់ នៅក្នុងទីក្រុងហ្វារ៉ាហ៍ ជារដ្ឋធានីនៃខេត្តហ្វារ៉ាហ៍ កាលពីល្ងាចថ្ងៃពុធ»។
លោកបានបន្ថែមថា ក្រុមអ្នកក្នុងចំណោមអ្នករងរបួស គឺជាក្មេង និងមន្ត្រីប៉ូលិសម្នាក់។
កងកម្លាំងសន្តិសុខបានឡោមព័ទ្ធនៅម្តុំតំបន់នោះ ដើម្បីចាត់វិធានការដោយប្រុងប្រយ័ត្ន។
លោក ម៉ូហ៊ីប៊ូលឡាហ៍ ម៉ូហ៊ីប បានថ្លែងប្រាប់កាសែតស៊ីនហួថា ការផ្ទុះនោះបានបង្កជាផ្សែងខ្មៅក្រាស់ឃ្មឹក ហុយទ្រលោមទៅលើអាកាស និងធ្វើឲ្យមានការភ័យស្លន់ស្លោនៅទីនោះ ដោយបានបន្ថែមថា ការផ្ទុះនោះបានបង្កឲ្យមានការខូចខាតរថយន្ត និងអគារជាច្រើនខ្នងផងដែរ៕ Xinhua/SK
