.jpg)
ក្មេងជំទង់ម្នាក់បង្ហោះខ្លែងនៅតំបន់អនាធិបតេយ្យ Vidigal នៅក្រុងរីយោដឺហ្សេនេរ៉ូ ប្រទេសប្រេស៊ីល ថ្ងៃទី ១៨ ឧសភា។ AFP
ក្រុងរីយោដឺហ្សេនេរ៉ូៈ មនុស្ស៧ នាក់ រួមទាំងឈ្មួញលក់គ្រឿងញៀនម្នាក់ផង ត្រូវបានក្រុមអាជ្ញាធរតាមចាប់ខ្លួនពីបទចោទប្រកាន់មានតួនាទីនៅក្នុងការចាប់រំលោភជាក្រុមក្នុងឆ្នាំ ២០១៦ ដែលបានធ្វើឲ្យភ្ញាក់ផ្អើលពេញប្រទេសប្រេស៊ីល ត្រូវបានបាញ់សម្លាប់កាលពីថ្ងៃសៅរ៍អំឡុងការបង្ក្រាបរបស់ប៉ូលិសជាទ្រង់ទ្រាយធំទៅលើទីប្រជុំជនតំបន់អនាធិបតេយ្យដែលការបំផ្លិចបំផ្លាញដោយបទឧក្រិដ្ឋ។
អ្នកនាំពាក្យក្រុមប៉ូលិសដឹកនាំដោយយោធានៅក្នុងក្រុងរីយោ បានឲ្យដឹងថា «ទិន្នន័យនាពេលថ្មីៗគឺថា មនុស្ស ២២ នាក់ ត្រូវចាប់ឃុំខ្លួន ហើយមនុស្ស ៧ នាក់ ត្រូវបានសម្លាប់ជាលទ្ធផលនៃការប៉ះទង្គិចគ្នាជាមួយកងកម្លាំងប៉ូលិស»។
អ្នកនាំពាក្យបានឲ្យដឹងថា ក្រុមមនុស្សទាំងអស់នេះរួមទាំងឈ្មោះ Sergio Luiz da Silva ជាបុរសម្នាក់ ដែលគេស្គាល់យ៉ាងទូលំទូលាយតាមឈ្មោះក្រុមរបស់ខ្លួនថា «Da Russia»។
បុរសម្នាក់នោះ ត្រូវបានចោទប្រកាន់ថា ជាមេដឹកនាំជួញគ្រឿងញៀន ដែលបានចូលរួមនៅក្នុងការចាប់រំលោភក្នុងឆ្នាំ ២០១៦ លើក្មេងស្រីអនីតិជនម្នាក់ក្នុងក្រុងរីយោ។ បុរសប្រមាណ ៣០ នាក់ត្រូវជាប់សង្ស័យពីការចូលរួមក្នុងការចាប់រំលោភផ្លូវភេទដែលត្រូវបានលាតត្រដាងនៅក្នុង រូបភាពផ្សព្វផ្សាយ នៅលើបណ្តាញសារព័ត៌មានសង្គមដែលបានបង្ហាញជនរងគ្រោះសន្លប់ និងត្រូវបានហ៊ុមព័ទ្ធដោយក្រុមអ្នកវាយប្រហារ។
យោងតាមប្រភពព័ត៌មានពីប្រព័ន្ធផ្សព្វផ្សាយក្នុងតំបន់បានរាយការណ៍ឲ្យដឹងថា អំពើហិង្សាកាលពីថ្ងៃសៅរ៍ បានកើតឡើង បន្ទាប់ពីក្រុមប៉ូលិសបានធ្វើការវាយឆ្មក់ទៅលើសង្កាត់ដែលក្រីក្រ និងជួនកាលគ្មានច្បាប់ដែលគេស្គាល់ថា ជាតំបន់អនាធិបតេយ្យនៅភាគខាងលិច នៃក្រុងរីយោកាលពីល្ងាចថ្ងៃសុក្រ។
ក្រុមជនសង្ស័យមួយក្រុមបានព្យាយាមរត់ភៀសខ្លួនទៅតំបន់អនាធិបតេយ្យផ្សេងទៀតនៅភាគខាងជើង និងត្រូវបានគេចាប់ និងសម្លាប់៕
