ក្រុងសេអ៊ូលៈ ក្រសួងបង្រួបបង្រួមជាតិកូរ៉េខាងត្បូងបានឲ្យដឹងថា មន្ត្រីកូរ៉េខាងត្បូង រាប់សិបនាក់បានធ្វើដំណើរទៅកាន់ការិយាល័យទំនាក់ទំនងអន្តរកូរ៉េ នៅកូរ៉េខាងជើងកាលពីថ្ងៃចន្ទ ទោះបីក្រុងព្យុងយ៉ាងបានដកបុគ្គលិករបស់ខ្លួនចេញពីការិយាល័យនេះកាលពីសប្តាហ៍មុនភ្លាមៗក្តី។
យោងតាមក្រសួងនេះបានឲ្យដឹងថា មន្ត្រីកូរ៉េខាងត្បូងប្រហែល ៤០ នាក់បានឆ្លងព្រំដែនទឹកដីភាគខាងលិចនៅតាមផ្លូវរបស់ពួកគេទៅកាន់ការិយាល័យទំនាក់ទំនងនៅព្រំដែនក្រុង Kaesong របស់កូរ៉េខាងជើង។ មន្ត្រីទាំងនោះបានថ្លែងថា ដោយមានមនុស្សប្រហែលរាប់សិបនាក់ទៀតរង់ចាំនៅទីនោះ មានមន្ត្រីកូរ៉េខាងត្បូងប្រហែល ៦០ ទៅ ៧០ នាក់ ត្រូវបានគេរំពឹងថានឹងធ្វើការនៅការិយាល័យនោះនៅក្នុងសប្តាហ៍នេះ។
ការបញ្ជូនមន្ត្រីរបស់ពួកគេបានធ្វើឡើងនៅទីនោះ ទោះបីជាកូរ៉េខាងជើងបានដកបុគ្គលិករបស់ខ្លួនចេញពីការិយាល័យកាលពីថ្ងៃសុក្រក្តី។
កូរ៉េខាងជើងមិនបានផ្តល់ហេតុផលឲ្យបានច្បាស់អំពីការដកនោះទេ គ្រាន់តែនិយាយថា ការសម្រេចចិត្តនោះ ត្រូវបានផ្អែកទៅលើបទបញ្ជាមួយចេញពី «ទីបញ្ជាការជាន់ខ្ពស់»។ ក្រុមអ្នកជំនាញ និងអ្នកវិភាគបាននិយាយថា វិធានការមួយនេះត្រូវបានរៀបចំឡើងដើម្បីដាក់សម្ពាធក្រុងសេអ៊ូលត្រូវធ្វើឲ្យបានច្រើនដើម្បីបញ្ចុះបញ្ចូលអាមេរិកឲ្យកាត់បន្ថយការទាមទាររបស់ខ្លួន នៅក្នុងការចរចាលុបបំបាត់កម្មវិធីនុយក្លេអ៊ែរ ដែលបានជាប់គាំងនោះ។
លោក គីម ចាងស៊ូ ជាអនុប្រធានការិយាល័យទំនាក់ទំនងបានថ្លែងនៅមុនឆ្លងកាត់ព្រំដែននោះថា៖ «រដ្ឋាភិបាលមុនៗបានខំប្រឹងប្រែងបើកចំហទំនាក់ទំនងរវាងកូរ៉េទាំង ២ និងការិយាល័យទំនាក់ទំនងរួមកូរ៉េខាងត្បូង-ជើង បានបើកកាលពីឆ្នាំ ២០១៨ ថាជាលទ្ធផលមួយគួរឲ្យកត់សម្គាល់»។
លោក គីម ចាងស៊ូ បានបន្ថែមទៀតថា៖ «ទោះបីជាកូរ៉េខាងជើងបានដកបុគ្គលិកចេញពីការិយាល័យនោះក៏ដោយ ក៏ក្តីសង្ឃឹមនៅតែមានជានិច្ចថា យើងចង់បន្តការងារ នោះដដែល»៕ Yonhap/SK