អគ្គអធិការនៃក្រសួងយុត្តិធម៌ (DOJ) អាមេរិកបានប្រកាសបើកការស៊ើបអង្កេត ដើម្បីពិនិត្យថាតើអតីតមន្ត្រី ឬមន្ត្រីបច្ចុប្បន្ននៃក្រសួងបានចូលរួមការប៉ុនប៉ង ដើម្បីកែប្រែលទ្ធផលបោះឆ្នោតប្រធានាធិបតីឆ្នាំ ២០២០។
កាលពីថ្ងៃចន្ទទី ២៥ មករា លោកអគ្គអធិការ Michael Horowitz បាននិយាយក្នុងសេចក្ដីថ្លែងការណ៍មួយថា៖ «ខុទ្ទកាល័យអគ្គអធិការ (OIG) នៃក្រសួងយុត្តិធម៌ (DOJ) គឺកំពុងចាប់ផ្ដើមការស៊ើបអង្កេត ដើម្បីពិនិត្យថាតើអតីតមន្ត្រី ឬមន្ត្រីបច្ចុប្បន្ននៃ DOJ បានចូលរួមការប៉ុនប៉ងមិនត្រឹមត្រូវដើម្បីឱ្យ DOJ កែប្រែលទ្ធផលនៃការបោះឆ្នោតប្រធានាធិបតីឆ្នាំ ២០២០។ ការស៊ើបអង្កេតនឹងរួមបញ្ចូលរាល់ការចោទប្រកាន់ពាក់ព័ន្ធ ដែលអាចកើតឡើង ហើយស្ថិតនៅក្នុងយុត្តាធិការរបស់ OIG។ OIG មានយុត្តាធិការក្នុងការស៊ើបអង្កេតការចោទប្រកាន់ទាក់ទងនឹងការប្រព្រឹត្តរបស់និយោជិត DOJ ទាំងបច្ចុប្បន្ន និងអតីត»។
ការបើកការស៊ើបអង្កេតនេះធ្វើឡើងបន្ទាប់ពីកាសែត The New York Times កាលពីថ្ងៃសុក្រ ទី ២ មករា បានធ្វើការរាយការណ៍ថា នៅរយៈពេលប៉ុន្មានថ្ងៃមុនសភាអាមេរិកត្រូវធ្វើការបញ្ជាក់លទ្ធផលឆ្នោត មន្ត្រីក្រសួងយុត្តិធម៌ជាន់ខ្ពស់ ១ រូប ឈ្មោះ Jeffery Clarke បានឃុបឃិតជាមួយនឹងលោក Donald Trump ដើម្បីបណ្ដេញចេញអគ្គរដ្ឋអាជ្ញាស្ដីទីនៃក្រសួងយុត្តិធម៌លោក Jeffrey Rosen ហើយលោក Clark នឹងស្នងតំណែងរួចប្រើប្រាស់អំណាចរបស់ក្រសួង ដើម្បីបង្ខំសមាជិកសភាតំណាងឱ្យរដ្ឋ Georgia ឱ្យលុបចោលលទ្ធផលការបោះឆ្នោតរបស់ពួកគេ។ ផែនការនេះបានបរាជ័យក្រោយពីថ្នាក់នាំជាន់ខ្ពស់នៃក្រសួងយុត្តិធម៌ជាច្រើន បានគំរាមលាលែងពីតំណែង បើសិនលោក Trump ដកតំណែងលោក Rosen។
បើតាមប្រភពមន្ត្រីចំនួន ៤ រូប ដែលសុំមិនឱ្យបង្ហាញអត្តសញ្ញាណកាលពីខែធ្នូ លោក Clark ដែលដល់ពេលនោះមានទំនាក់ទំនងជាមួយលោក Trump បានប្រាប់លោក Rosen និងអគ្គរដ្ឋអាជ្ញារងលោក Richard Donoghue ថា លោកចង់ឱ្យក្រសួងរៀបចំសន្និសីទសារព័ត៌មានមួយប្រកាសថា ពួកគេកំពុងស៊ើបអង្កេតការចោទប្រកាន់ធ្ងន់ធ្ងរនៃការលួចបន្លំសន្លឹកឆ្នោត។ ក្រោយមកលោក Clark បានព្រាងលិខិតមួយក្នុងគោលបំណងឱ្យលោក Rosen បញ្ជូនទៅសមាជិកសភារដ្ឋ Georgia ដែលក្នុងនោះបានអះអាងដោយមិនពិតថា ក្រសួងយុត្តិធម៌កំពុងស៊ើបអង្កេតការចោទប្រកាន់ការក្លែងបន្លំអ្នកបោះឆ្នោតនៅក្នុងរដ្ឋនោះហើយពួកគេគួរតែចាត់ទុកជ័យជម្នះរបស់លោក Biden នៅទីនោះជាមោឃៈ។
លោក Rosen និងលោក Donoghue បានបដិសេធមិនធ្វើតាមសំណូមពរទាំង២របស់លោក Clarke ទេ។
ប៉ុន្មានថ្ងៃក្រោយថ្ងៃឆ្លងឆ្នាំ ២០២១ លោក Clark បានទៅជួបប្រជុំជាមួយលោក Trump ហើយក្រោយមកបានទៅប្រាប់លោក Rosen ថា លោកប្រធានាធិបតីមានបំណងដកលោកចេញពីតំណែងហើយជំនួសដោយខ្លួនលោកវិញ ដែលបន្ទាប់មកអាចព្យាយាមបញ្ឈប់សភាពីការបញ្ជាក់លទ្ធផលនៃការបោះឆ្នោត។
ដោយមិនចង់ចុះចេញពីតំណែងដោយគ្មានការតវ៉ា លោក Rosen បាននិយាយថា លោកចាំបាច់ត្រូវនិយាយដោយផ្ទាល់ជាមួយលោក Trump។ លោកបានធ្វើការជាមួយមេធាវីសេតវិមានលោក Pat Cipollone ដើម្បីធ្វើការប្រជុំនៅល្ងាចនោះ។ មុនការជួបប្រជុំ លោក Rosen និងលោក Donoghue ជូនដំណឹងដល់ថ្នាក់ដឹកនាំជាន់ខ្ពស់នៃក្រសួងអំពីអ្វីដែលបានកើតឡើង។ ពួកគេបានយល់ព្រមធ្វើការលាលែង បើសិនលោក Trump បណ្ដេញលោក Rosen ចេញពីតំណែង។
កិច្ចប្រជុំសេតវិមានមានការចូលរួមពីលោក Rosen លោក Donoghue លោក Cipollone និងលោក Clark។ ភាគីសងខាងបានព្យាយាមបញ្ចុះបញ្ចូលលោក Trump ដោយលោក Rosen បានប្រាប់លោក Trump អំពីផែនការរបស់ថ្នាក់ដឹកក្រសួងយុត្តិធម៌បើសិនលោក Trump បណ្ដេញលោកចេញ។
បន្ទាប់ពីរយៈពេលជិត ៣ ម៉ោង ទីបំផុតលោក Trump បានសម្រេចថាផែនការរបស់លោក Clark នឹងត្រូវបរាជ័យ ហើយលោកបានអនុញ្ញាតឱ្យលោក Rosen បន្តធ្វើជាអគ្គរដ្ឋអាជ្ញាស្ដីទី។
ជាការឆ្លើយតបនឹងការរាយការណ៍នេះលោក Clark បាននិយាយថា ការចោទប្រកាន់ទាំងនេះមានផ្ទុកភាពមិនត្រឹមត្រូវ ប៉ុន្តែមិនបានបញ្ជាក់បន្ថែមទេ ដោយបាននិយាយថាលោកមិនអាចពិភាក្សាជាសាធារណៈអំពីការសន្ទនាណាមួយជាមួយលោក Trump ឬ មេធាវីនៃក្រសួងយុត្តិធម៌បានទេ។
ការស៊ើបអង្កេតដោយអគ្គអធិការ Horowitz ត្រូវបានចាប់ផ្ដើមតាមការទាមទារដោយមេដឹកនាំសំឡេងភាគច្រើននៃព្រឹទ្ធសភាលោក Chuck Schumer ដែលបាននិយាយរឿងលោក Clark គឺជា «រឿងមិនត្រឹមត្រូវដែលមន្ត្រីថ្នាក់ដឹកនៃក្រសួងយុត្តិធម៌ Trump ឃុបឃិតបង្វែរឆន្ទៈរបស់ប្រជាជន។
នេះជាផ្នែកមួយនៃការខិតខំប្រឹងប្រែងដ៏យូរអង្វែងរបស់លោក Trump ក្នុងការជំរុញឱ្យក្រសួងយុត្តិធម៌អាមេរិកឱ្យជួយលោកក្នុងការកែប្រែលទ្ធផលបោះឆ្នោតឱ្យលោកឈ្នះវិញ ដោយអតីតប្រធានាធិបតីរូបនេះបានធ្វើការអះអាងដោយមិនមានភ័ស្តុតាងថា ប្រធានាធិបតី Joe Biden បានលួចជ័យជម្នះតាមរយៈការក្លែងបន្លំសន្លឹកឆ្នោត និងអ្នកបោះឆ្នោត។
កាលពីដើមខែធ្នូ ២០២០ លោក Trump បានទាមទារការលាលែងរបស់អគ្គរដ្ឋអាជ្ញា William Barr ក្រោយពីលោកនិយាយជាសាធារណៈថាក្រសួងយុត្តិធម៌មិនអាចគាំទ្រការអះអាងរបស់លោក Trump ទេ ហើយធ្វើការបញ្ជាក់ថាលោកនឹងមិនប្រើអំណាចដើម្បីកែប្រែលទ្ធ-ផលបោះឆ្នោតទេ។ លោក Rosen បានក្លាយជាអគ្គរដ្ឋអាជ្ញាស្ដីទីបន្ទាប់ពីការចាកចេញរបស់លោក Barr។ កាលនោះលោក Trump បានកោះហៅលោក Rosen មកសេតវិមាន ដើម្បីទាមទារឱ្យក្រសួងយុត្តិធម៌គាំទ្រពាក្យបណ្ដឹងតវ៉ាការបោះឆ្នោតរបស់លោក និងរបស់សម្ព័ន្ធមិត្តលោក ហើយតែងតាំងរដ្ឋអាជ្ញាពិសេសដើម្បីធ្វើការស៊ើបអង្កេតក្រុមហ៊ុនផលិតម៉ាស៊ីនរាប់សន្លឹកឆ្នោត Dominion Voting System។ លោក Rosen បានបដិសេធសំណូមពរលោក Trump។
យ៉ាងណាមិញនៅថ្ងៃចន្ទដដែលនេះក្រុមហ៊ុន Dominion Voting System បានប្ដឹងមេធាវីផ្ទាល់ខ្លួនរបស់លោក Trump គឺលោក Rudy Giulianiពីបទបង្ខូចកេរ្តិ៍ឈ្មោះដោយទាមទារសំណងចំនួន ១,៣ ពាន់លានដុល្លារ ក្រោយពីលោក Giuliani ជាច្រើនលើកច្រើនសាចោទប្រកាន់ក្រុមហ៊ុននេះថាបានក្លែងបន្លំការរាប់សន្លឹកឆ្នោត និងកែប្រែលទ្ធផលបោះឆ្នោត៕