.jpg)
ក្រុមជួយសង្គ្រោះ នាំគ្នាប្រមូលយកសពជនរងគ្រោះពីអណ្តូងរ៉ែ។ AFP
ក្រុងយ៉ាំងហ្គោន៖ យោធាមីយ៉ាន់ម៉ាបានថ្លែងកាលពីថ្ងៃចន្ទ នៅក្នុងការដាក់ទណ្ឌកម្មជាសាធារណៈដ៏កម្រមួយថា មន្ត្រីជាន់ខ្ពស់ ២ រូប ត្រូវបានបណ្តេញចេញពីតំណែង ដោយសារពួកគេ «ខកខានមិនបានទទួលខុសត្រូវ» ក្រោយពីឧប្បត្តិហេតុបាក់ដីនៅក្នុងប្រទេសនេះ បានបង្កឲ្យកម្មករអណ្តូងរ៉ែយ៉ាងតិច ១៧៤ នាក់ស្លាប់ យ៉ាងអាណោចអាធ័មបំផុតនៅទីនោះ។
ភ្លៀងរដូវវស្សាបានធ្លាក់យ៉ាងខ្លាំងកាលពីថ្ងៃព្រហស្បតិ៍កន្លងទៅ បានធ្វើឲ្យមានភក់ហូរធ្លាក់ពីលើភ្នំមួយ ទៅលើក្រុមកម្មករ ដែលកំពុងលាងសម្អាតត្បូងដ៏មានតម្លៃ នៅក្នុងតំបន់ប៉ាកាន់ធ៍ នៅរដ្ឋរ៉ាក់ឃីនភាគខាងជើង នៃប្រទេសមីយ៉ាន់ម៉ា។
ក្រុមជនរងគ្រោះទាំងនោះ ភាគច្រើន គឺជាក្រុមជនចំណាកស្រុកក្រីក្រដែលបានធ្វើដំណើរមកពីទូទាំងប្រទេសមួយនេះ ដើម្បីត្រៀមលក្ខណៈនៅក្នុងការជីកអណ្តូងរ៉ែទ្រង់ទ្រាយធំ ប្រកបដោយគ្រោះថ្នាក់បំផុត ដោយពួកគេបានសង្ឃឹមថា នឹងជីករកត្បូងដ៏មានតម្លៃជាច្រើន ដែលបានប្រកបអាជីវកម្ម ដោយក្រុមហ៊ុនធំៗជាច្រើន នៅក្នុងប្រទេសមួយនេះ។
នេះ គឺជាសោកនាដកម្មយ៉ាងអាក្រក់បំផុត គួរឲ្យចងចាំក្នុងឆាកជីវិត ដែលបានវាយប្រហារអណ្តូងរ៉ែ ជាឧស្សាហកម្មបានវិនិយោគទឹកប្រាក់រាប់ពាន់លានដុល្លារ ដែលបានគ្រប់គ្រងដោយក្រុមហ៊ុនធំៗជាច្រើន មានទំនាក់ទំនងជាមួយយោធានៅមីយ៉ាន់ម៉ា។
អ្នកនាំពាក្យកងទ័ពលោកឧត្តមសេនីយ៍ត្រី Zaw Min Tun បានថ្លែងប្រាប់ AFP ថា៖ «ពួកគេមានកាតព្វកិច្ចទទួលខុសត្រូវចំពោះការរាយការណ៍អំពីការឈ្លានពានណាមួយ នៅក្នុងតំបន់មានការរឹតបន្តឹងសន្តិសុខនោះ»។
«ពួកគេ ខកខានមិនបានទទួលខុសត្រូវ»។
លោកបានបន្ថែមថា យោធានឹងធ្វើការស៊ើបអង្កេត និងមានវិធានការយ៉ាងត្រឹមត្រូវប្រឆាំងនឹងបុរសទាំង ២ រូបនេះនឹងត្រូវចាត់ឡើង។
កម្មកររ៉ែដែលមិនស្គាល់អត្តសញ្ញាណជាច្រើននាក់ត្រូវបានកប់នៅក្នុងរណ្តៅធំៗ ខណៈកម្មករជាច្រើននាក់ទៀតនៅបាត់ខ្លួន។ ពួកគេបានចូលរួមជាមួយអ្នកផ្សេងរាប់សិបនាក់ដែលបានស្លាប់ក្នុង ១ ឆ្នាំៗនៅតំបន់ប៉ាកាន់ធ៍នេះ៕ AFP/SK
