មន្ត្រីនៃទីភ្នាក់ងារសម្ងាត់អាមេរិក (US Secret Service) ១ រូប ត្រូវបានដាក់ក្រោមការស៊ើបអង្កេតបន្ទាប់ពីរូបនាងបានធ្វើការចោទប្រកាន់សមាជិកសភាថា បានក្បត់ជាតិ ក្រោយពីពួកគេបានធ្វើការបញ្ជាក់លទ្ធផលអង្គបោះឆ្នោតថា លោក Joe Biden បានឈ្នះតំណែងប្រធានាធិបតីអាមេរិក។
ការស៊ើបអង្កេតនេះត្រូវបានរាយការណ៍ជាលើកដំបូងនៅយប់ថ្ងៃចន្ទ ដោយកាសែតវ៉ាស៊ីនតោន ប៉ុស្តិ៍ ដែលបានបង្ហាញរូបភាពសារមួយចំនួនរបស់មន្ត្រីរូបនេះ បង្ហោះទៅកាន់បណ្ដាញសង្គម។ ព័ត៌មាននៃការស៊ើបអង្កេតកើតឡើងនៅពេលដែលភ្នាក់ងារអនុវត្តច្បាប់ផ្សេងៗ ពង្រីកការស៊ើបអង្កេតរកមន្ត្រីរបស់ពួកគេដែលសង្ស័យថា បានចូលរួមក្នុងធ្វើកុបកម្មសម្រុកចូលអគារសភាកាលពីថ្ងៃទី ៦ ខែមករា ដែលឈានដល់ការស្លាប់មនុស្សចំនួន ៥ នាក់។
នាងក៏បានបង្ហោះរូបភាព កាត់តមួយដែលបង្ហាញរូបលោកប្រធានាធិបតី Donald Trump ចំនួន ២ ចាប់ដៃខ្លួនឯងនៅក្នុងសេតវិមាន ហើយដាក់ចំណងជើងថា «អបអរសាទរការផ្ទេរអំណាចដោយសន្តិភាព»។ ១ ថ្ងៃក្រោយពីការធ្វើកុបកម្មមន្ត្រីដែលគេមិនបញ្ចេញអត្តសញ្ញាណ បានបង្ហោះសាររិះគន់ការប៉ុនប៉ងដកលោក Trump ចេញពីតំណែងទៅកាន់ Facebook ហើយបានចោទប្រកាន់សមាជិកសភាដែលបានទទួលយកលទ្ធផលបោះឆ្នោតថា «បានប្រព្រឹត្តអំពើក្បត់ជាតិនៅលើទូរទស្សន៍ផ្សាយបន្តផ្ទាល់»។
ក្នុងសារមួយទៀតនាង បានចោទប្រកាន់ថា ក្រុមឆ្វេងនិយមនៅពីក្រោយកុបកម្មនេះ មិនមែនក្រុមអ្នកគាំទ្រលោក Trump ទេ។ នាងបានសរសេរថា៖ «អរុណសួស្ដីអ្នកស្នេហាជាតិ! ម្សិលមិញចាប់ផ្ដើមដោយស្រស់ស្អាត តែដូចធម្មតាក្រុម Antifa [ក្រុមឆ្វេងនិយម] បានធ្វើឱ្យខូចអារម្មណ៍ ដោយវាយប្រហារប៉ូលិស និងសម្លាប់អតីតយុទ្ធជនកងទ័ពអាកាស»។
ការស៊ើបអង្កេតរបស់សេវាកម្មបានធ្វើឡើង បន្ទាប់ពីប៉ូលិសអគារសភាអាមេរិកបានចាប់ផ្តើមស៊ើបអង្កេតប៉ូលិសរបស់ពួកគេចំនួន ១៧ នាក់ ដែលសង្ស័យប្រព្រឹត្តអំពើខុសច្បាប់ទាក់ទងនឹងកុបកម្មកាលពីថ្ងៃពុធ។ មកដល់ពេលនេះប៉ូលិស ២ រូប ត្រូវបានព្យួរការងារដោយម្នាក់បានថតរូប Selfie ជាមួយអ្នកធ្វើកុបកម្មនៅក្នុងសភា និងម្នាក់ទៀតពាក់មួក «Make America Great Again» ហើយធ្វើការនាំផ្លូវ អ្នកធ្វើកុបកម្មនៅក្នុងសភា។
យ៉ាងហោចណាស់មានប៉ូលិសចំនួន ៧ នាក់ មកពីកងអង្គភាពចំនួន ៥ ផ្សេងទៀតនៅទូទាំងប្រទេសក៏ស្ថិតនៅក្រោមការស៊ើបអង្កេតផ្ទៃក្នុង ខណៈវត្តមានរបស់ពួកគេនៅក្នុងទីក្រុងវ៉ាស៊ីនតោនក្នុងអំឡុងពេលនៃកុបកម្មនេះ បានលេចចេញមកតាមរយៈបណ្ដាញសង្គម ឬមធ្យោបាយផ្សេងទៀត។
យ៉ាងណាមិញ សេវាសម្ងាត់អាមេរិក គឺជាទីភ្នាក់ងារទទួលបន្ទុកធ្វើជាអង្គរក្សការពារប្រធានាធិបតី អនុប្រធានាធិបតី ក្រុមគ្រួសារថ្នាក់ដឹកនាំ និងមេដឹកនាំបរទេសដែលធ្វើទស្សនកិច្ចនៅសហរដ្ឋអាមេរិក។ ទីភ្នាក់ងារនេះស្ថិតក្រោមការគ្រប់គ្រងរបស់ក្រសួងសន្តិសុខមាតុភូមិ។ កាលពីថ្ងៃចន្ទ រដ្ឋមន្ត្រីស្ដីទីក្រសួងសន្តិសុខមាតុភូមិ លោក Chad Wolf បានបញ្ជាឱ្យសេវាសម្ងាត់ទទួលបន្ទុកការរៀបចំសន្តិសុខនៃកម្មវិធីចូលកាន់តំណែងរបស់លោក Biden ប៉ុន្មានម៉ោងមុនលោកបានលាលែងពីតំណែង៕