.jpg)
កាលពីខែធ្នូ កន្លងទៅ មន្ត្រីម៉ាឡេស៊ីបានរកឃើញករណីទាសភាពសម័យទំនើបនៅរោងចក្រផលិតស្រោមដៃជ័រ Brightway Holdings នៅជិតទីក្រុងគូឡាឡាំពួ ក្នុងអំឡុងពេលដើរបាត់ខ្លួននៅតាមរោងចក្រ និងអន្តេវាសិកដ្ឋានរបស់កម្មករនៅប្រទេសម៉ាឡេស៊ី បើទោះជាក្រុមសវនកម្មសង្គមបានដាក់របាយការណ៍ដល់រដ្ឋាភិបាលថា មុននេះ ១ ឆ្នាំជាងថា គ្មានករណីទាសភាពអ្វីឡើយ។
ក្រុមមន្ត្រីបាននិយាយថា គេបានរកឃើញកម្មកររស់នៅក្នុងកុងតឺន័រដឹកទំនិញ ដែលស្ថិតក្នុងស្ថានភាពមិនអំណោយផលដោយរដ្ឋមន្ត្រីធនធានមនុស្ស លោក M. Saravanan បានអះអាងថា អាចពាក់ព័ន្ធនឹងករណីទាសភាពសម័យទំនើប។
បើក្រឡេកទៅមើលពេល ១ ឆ្នាំកន្លះមុនក្រុមអធិការកិច្ចមកពីក្រុមហ៊ុនសវនកម្មសង្គម ដែលជាក្រុមហ៊ុនឯកជន ដែលមាននាទីត្រួតពិនិត្យបញ្ហាបរិស្ថានសង្គម និងក្រមសីលធម៌ផ្សេងទៀតនៅក្នុងឧស្សាហកម្មចាប់ពីរោងចក្រផលិតប្រដាប់ប្រដាក្មេងលេង រហូតដល់រោចក្រផ្នែកប្រេងដូង បានចុះទៅត្រួតពិនិត្យមើលទីតាំងរោងចក្រកើតហេតុនេះ ៣ ដងរួចទៅហើយ។
នៅក្នុងរបាយការណ៍ចំនួន ៣ លើក ពួកគេក៏បានលម្អិតលើសកម្មភាពរំលោភក្រមសីលធម៌ពិភពលោកចំនួន ៦១ ករណី និងរកឃើញការរំលោភបំពានច្បាប់ការងារម៉ាឡេស៊ីចំនួន ៥០ ករណីផងដែរ។
ទោះយ៉ាងណា នៅក្នុងរបាយការណ៍សង្ខេបនៃរបាយការណ៍នីមួយៗ បានធ្វើការសន្និដ្ឋានថា៖ «មិនមានករណីបង្ខំឱ្យធ្វើពលកម្មចាប់ចង ឬឃុំខ្លួនកម្មករដែលបានធ្វើការនៅរោងចក្រនេះឡើយ»។
នាយកគ្រប់គ្រងរបស់ក្រុមហ៊ុន Brightway លោក G. Baskaran បានបង្ហាញរបាយការណ៍សវនកម្មពីឆ្នាំ ២០១៩ និង ២០២០ ដល់សារព័ត៌មាន Reuters កាលពីខែមេសាថា «យើងមិនបានអនុវត្តពលកម្មដោយបង្ខំ ឬទាសភាពសម័យទំនើបក្នុងទម្រង់ណាមួយទេ»។
ការអះអាងនេះមានលក្ខណៈផ្ទុយគ្នាផ្ទុយនឹងរបាយការណ៍ ដែលបង្ហាញពីករណីរំលោភបំពានលក្ខខណ្ឌការងារ មានចែងក្នុងរបាយការណ៍។ យ៉ាងណាមិញសវនករសង្គមដែលប្រើដោយយីហោពិភពលោក ក្នុងការកំណត់ថា រោងចក្រផ្គត់ផ្គង់នៅក្រៅប្រទេសរបស់ខ្លួនបំពេញទៅតាមក្រមសីលធម៌ ឬអត់ មិនមានប្រសិទ្ធភាពក្នុងការកំណត់អំពីហានិភ័យការងារឡើយ ហើយថែមទាំងអាចបិទបាំងបញ្ហាទាំងនោះទៀតផង។
ក្រុមហ៊ុនសវនកម្មបាននិយាយថា ច្បាប់នៅជុំវិញពិភពលោកហាមឃាត់ការប្រើប្រាស់កម្លាំងពលកម្មដោយបង្ខំ ប៉ុន្តែមិនមានវិធានណាមួយគ្រប់គ្រងគុណភាពនៃការធ្វើសវនកម្មដែលជាការងារស្ម័គ្រចិត្តនោះទេ។ ជាធម្មតាសវនករទទួលបានប្រាក់កម្រៃពីក្រុមហ៊ុន ដែលពួកគេកំពុងធ្វើសវនកម្ម ដែលបង្កឱ្យមានទំនាស់ផលប្រយោជន៍ ប៉ះពាល់ដល់គុណភាពនៃការធ្វើសវនកម្ម ដូចជាករណីរោចក្រជួលឱ្យក្រុមហ៊ុនសវនកម្មនោះសរសេរវិជ្ជមានពីខ្លួន ដើម្បីរក្សាអាជីវកម្មក៏មាន។
ជាមួយគ្នានេះដែរ អ្នកចុះត្រួតពិនិត្យ និងកម្មករនៅរោងចក្រ Brightway បាននិយាយថា ក្រុមហ៊ុនក៏ធ្លាប់រៀបចំសម្ដែងនៅពេលដែលក្រុមសវនករចុះមកពិនិត្យក៏មាន។
ទោះជាយ៉ាងណាក្ដី គេមិនបានរកភ័ស្តុតាងណាមួយ ដើម្បីបង្ហាញពីករណី ដែលក្រុមហ៊ុននេះជួលសវនករអង់គ្លេស Intertek Group ឱ្យធ្វើរឿងនេះ ឬយ៉ាងណាឡើយ ដោយសារក្រុមហ៊ុននេះ បដិសេធមិនធ្វើអត្ថាធិប្បាយ។ យ៉ាងណាមិញក្រុមហ៊ុន Intertek បាននិយាយថា សវនកម្មរបស់ខ្លួនប្រព្រឹត្តទៅត្រឹមត្រូវតាមនីតិវិធី និងស្តង់ដាតឹងរ៊ឹង ហើយក្រុមហ៊ុនខ្លួនជាក្រុមហ៊ុនឯករាជ្យ ទៀងត្រង់ និងហ្មត់ចត់ផងដែរ។
ប្រហែល ១ ខែ ក្រោយពេលមន្ត្រីម៉ាឡេស៊ីចុះត្រួតពិនិត្យមើលរោងចក្រមក គយ និងការពារព្រំដែនសហរដ្ឋអាមេរិក បានបើកការស៊ើបអង្កេតលើករណីរោងចក្រ Brightway។ គយសហរដ្ឋអាមេរិក កំពុងពិនិត្យមើលការចោទប្រកាន់ ដែលរួមមានការបង្ខំដោយជាប់បំណុលការធ្វើការលើសម៉ោង និងការស្នាក់នៅមិនបានល្អផងដែរ។
ជាការឆ្លើយតបរោចក្រ Brightway បាននិយាយថា គយសហរដ្ឋអាមេរិក មិនបានស្នើសុំព័ត៌មានលម្អិតពីក្រុមហ៊ុនខ្លួននោះទេ។
លោក Ana Hinojosa នាយកប្រតិបត្តិនៅការិយាល័យពាណិជ្ជកម្មរបស់ក្រុមហ៊ុន CBP បាននិយាយថា៖ «ក្រុមហ៊ុនជាច្រើនមិនចង់ឱ្យមានគេមកធ្វើការវាយតម្លៃទាក់ទិននឹងករណីពលកម្មដោយបង្ខំទេ ព្រោះអាចនឹងប៉ះពាល់ដល់កេរ្តិ៍ឈ្មោះប្រាក់ចំណេញ និងម្ចាស់ភាគហ៊ុនរបស់ពួកគេ»។
សវនករសង្គម ២ រូបផ្សេងទៀត ដែលបានពិនិត្យមើលរបាយការណ៍របស់រោងចក្រ Brightway បាននិយាយថា ការរកឃើញមួយចំនួន អាចបង្ហាញពីករណីពលកម្មបង្ខំ ដោយយោងតាមអង្គការពលកម្មអន្តរជាតិ។ យ៉ាងណាមិញ ការរកឃើញពាក់ព័ន្ធនៅក្នុងរបាយការណ៍របស់រោងចក្រ Brightway រួមមាន ការធ្វើការច្រើនហួសម៉ោងថ្លៃឈ្នួលថោក និងស្ថានភាពរស់នៅ និងការងារមិនមានសុវត្ថិភាពប៉ុណ្ណោះ។
សកម្មជនការងារបាននិយាយថា ការសន្និដ្ឋានរបស់របាយការណ៍របស់រោងចក្រ Brightway គឺជា «ការបំភាន់ទាំងស្រុង» ពីព្រោះពួកគេមើលរំលងភ័ស្តុតាងដែលមាននៅក្នុងរបាយការណ៍លម្អិតដោយខ្លួនឯង។ ចំពោះក្រុមហ៊ុន ដែលជាដៃគូដែលគ្រាន់ តែអានសេចក្តីសង្ខេបនៃរបាយការណ៍អាចនឹងមិនបានដឹងពីករណីលម្អិតនៃពលកម្មបង្ខំទេ។
គួរបញ្ជាក់ផងដែរថា ប្រទេសម៉ាឡេស៊ី គឺជាមជ្ឈមណ្ឌលផលិតស្ទើរគ្រប់ផលិតផលតាំងពីប្រេងដូងរហូតដល់គ្រឿងបន្លាស់ទូរស័ព្ទ iPhone ដែលតែងជួលជនចំណាកស្រុកមកពីប្រទេសនានារួមទាំងបង់ក្លាដែស និងនេប៉ាល់ ហើយជាប្រទេសទី២ បន្ទាប់ពីប្រទេសចិន ដែលតែងប្រឈមនឹងទណ្ឌកម្មពីសហរដ្ឋអាមេរិកទាក់ទិននឹងពលកម្មបង្ខំ៕
