ក្រុងសេអ៊ូល៖ មន្ត្រីក្រុងសេអ៊ូលបានថ្លែងកាលពីថ្ងៃពុធថា នាយករដ្ឋមន្ត្រីលោក លី ណាក យ៉ុន ទំនងជានឹងជួបផ្ទាល់ជាមួយនាយករដ្ឋមន្ត្រីជប៉ុនលោក ស៊ីនហ្សូ អាបេ នៅអំឡុងទស្សនកិច្ចរបស់លោកទៅកាន់ទីក្រុងតូក្យូនៅសប្តាហ៍ក្រោយ ទោះបីជាផែនការនោះ នៅមិនទាន់បានបញ្ជាក់អះអាងឲ្យបានជាក់លាក់ក្តី។
លោក លី ណាក យ៉ុន នឹងទស្សនកិច្ចទៅក្រុងតូក្យូ ដើម្បីចូលរួមពិធីឡើងគ្រងរាជ្យរបស់ព្រះចៅអធិរាជជប៉ុនព្រះនាម ណារូហ៊ីតូ ដែលគ្រោងប្រារព្ធធ្វើឡើងនៅថ្ងៃអង្គារសប្តាហ៍ក្រោយ ក្នុងដំណើរទស្សនកិច្ចមួយ ដែលអ្នកសង្កេតការណ៍បានថ្លែងថា អាចបង្កើតចំណងទំនាក់ទំនងមិត្តភាពនៅក្នុងបណ្តាប្រទេសមួយចំនួន ដែលមានជម្លោះជុំវិញការរឹតត្បិតនាំចេញ និងការបង្ខំឲ្យធ្វើការងារក្នុងសង្គ្រាមរបស់រដ្ឋាភិបាលក្រុងតូក្យូ។
មន្ត្រីនៅក្រសួងការបរទេសក្រុងសេអ៊ូល បានថ្លែងប្រាប់ក្រុមអ្នកកាសែតនៅក្នុងលក្ខខណ្ឌអនាមិក ក្នុងការឆ្លើយតបសំណួរសួរអំពីថា តើលោក លី មានផែនការនឹងរៀបចំកិច្ចពិភាក្សាជាមួយលោក ស៊ីនហ្សូ អាបេ ឬយ៉ាងណា លោកថា៖ «ជំនួបនោះនៅមិនទាន់បានបញ្ជាក់អះអាងនៅឡើយទេ ប៉ុន្តែខ្ញុំគិតថា អាចមានលទ្ធភាពគ្រប់គ្រាន់ក្នុងការជួបលោក ស៊ីនហ្សូ អាបេ»។
លោកបានបន្ថែមថា៖ «សម្រាប់ពេលបច្ចុប្បន្ន យើងគិតថាវានឹងកើតឡើង ប៉ុន្តែភាគីម្ខាងទៀតនៅមិនទាន់បានផ្តល់កាលបរិច្ឆេទឲ្យបានច្បាស់លាស់នៅឡើយទេ»។
ប្រភពការទូតនៅទីនេះបានថ្លែងប្រាប់ទីភ្នាក់ងារសារព័ត៌មាន Yonhap ថា លោក លី និង អាបេ អាចនឹងជួបគ្នាទ្វេភាគីនៅថ្ងៃពុធ ឬព្រហស្បតិ៍ ក្រោយពីពិធីឡើងគ្រងរាជ្យចប់ និងការទទួលទានអាហារជាទីដែលមេដឹកនាំជប៉ុនអាចនឹងពិបាកលៃលកពេលដើម្បីរៀបចំកិច្ចពិភាក្សាទ្វេភាគីនោះ៕