ក្រុងរីយ៉ាដ: ប្រព័ន្ធផ្សព្វផ្សាយរដ្ឋ បានថ្លែងដោយដកស្រង់សម្តីពីក្រសួងមហាផ្ទៃថា មន្ត្រីអារ៉ាប៊ី សាអ៊ូឌីត ៤ នាក់ ត្រូវបានបាញ់សម្លាប់ និង៤ នាក់ដទៃទៀត បានរងរបួសកាលពីថ្ងៃព្រហស្បតិ៍ ខណៈដែលប៉ុស្តិ៍ត្រួតពិនិត្យរបស់ពួកគេ បានរងការវាយប្រហារប្រដាប់អាវុធនៅក្នុងខេត្ត Asir ភាគខាងត្បូង។
ទីភ្នាក់ងារសារព័ត៌មានអារ៉ាប៊ី សាអ៊ូឌីត( SPA) បានរាយការណ៍ឲ្យដឹងដោយមិនបានបញ្ជាក់ឲ្យបានច្បាស់ថា ជនណាម្នាក់នៅពីក្រោយការវាយប្រហារនោះថាមន្ត្រី៣នាក់ ត្រូវបានបាញ់សម្លាប់ភ្លាមៗខណៈដែលប៉ុស្តិ៍ឈរជើងរបស់ពួកគេស្ថិតក្រោមការវាយប្រហារនោះ។
ទីភ្នាក់ងារ SPA បានរាយការណ៍ឲ្យដឹងថា៖ «ក្រុមមន្ត្រីសន្តិសុខ បានសម្រេចក្នុងការកំណត់ភិនភាគជនសង្ស័យមួយចំនួនពាក់ព័ន្ធទៅក្នុងបទឧក្រិដ្ឋមួយ និងបានចាប់ខ្លួនពួកគេពីរនាក់ដែលពួកគេសុទ្ធតែជាជនជាតិអារ៉ាប៊ីសាអ៊ូឌីត»។ «ដើម្បីជាប្រយោជន៍ដល់ការធ្វើការស៊ើបអង្កេតនោះឈ្មោះរបស់ពួកគេមិនត្រូវបានលាតត្រដាងឡើយ»។
SPA បានរាយការណ៍ឲ្យដឹងបន្ថែមទៀតថា ជនសង្ស័យអារ៉ាប៊ី សាអ៊ូឌីតទីបី បានបាញ់កាំភ្លើងខណៈបុរសនោះព្យាយាមរត់គេចខ្លួន ដោយបានសម្លាប់មន្ត្រីម្នាក់ទៀតនិងបានបង្កការរងរបួសដល់មន្ត្រី ៤ នាក់ដទៃទៀត។
ការវាយប្រហារនោះ បានកើតឡើងស្របពេលដែលអារ៉ាប៊ី សាអ៊ូឌីត បានធ្លាក់ក្នុងភាពចលាចលនៃសង្គ្រាមដែលបានអូសបន្លាយរយៈពេលយូរនៅក្នុងប្រទេសជិតខាងភាគខាងត្បូងរបស់ខ្លួនគឺយេម៉ែនដែលអង្គការសហប្រជាជាតិ (UN) បានចាត់ទុកជាប្រទេសជួបវិបត្តិមនុស្សធម៌ធ្ងន់ធ្ងរជាងគេបំផុតនៅក្នុងពិភពលោក។
នៅក្នុងខែមីនាឆ្នាំ ២០១៥ អារ៉ាប៊ី សាអ៊ូឌីត បានប្រតិបត្តិការក្រុមចម្រុះនៃក្រុមរដ្ឋអារ៉ាប់ធ្វើការប្រយុទ្ធប្រឆាំងដើម្បីបណ្តេញក្រុមឧទ្ទាមហ៊ូធីគាំទ្រដោយអុីរ៉ង់ក្នុងទឹកដីយេម៉ែន និង ជួយស្តាររដ្ឋាភិបាលដែលត្រូវបានទទួលស្គាល់ជាអន្តរជាតិរបស់ប្រទេសនេះឲ្យបានឡើងក្តាប់អំណាច។
ក្រុងរីយ៉ាដ និងគូបដិបក្សនិកាយស៊ីអ៊ីតគឺក្រុងតេអេរ៉ង់ បានគាំទ្រក្រុមភាគីប្រឆាំងនៅក្នុងតំបន់ ឬទីកន្លែងដ៏ក្តៅគគុក មួយចំនួននៅទូទាំងតំបន់មជ្ឈិមបូព៌ា ដែលប្រជាជន ភាគច្រើន ជាអ្នកកាន់និកាយស៊ីអ៊ីតរួមទាំងលីបង់ស៊ីរីអុីរ៉ាក់និងយេម៉ែន៕ AFP/ SN