ក្រុងកាប៊ុល៖ អនុប្រធានាធិបតីប្រទេសអាហ្វហ្គានីស្ថាន បានថ្លែងកាលពីថ្ងៃចន្ទថា កងកម្លាំងសន្តិសុខអាហ្វហ្គានីស្ថាន បានសម្លាប់មេខ្លោងលេខ ២ ដែលបានវាយប្រហារទៅលើសាកលវិទ្យាល័យក្រុងកាប៊ុលយ៉ាងបង្ហូរឈាមនៅខែនេះ ដែលបានបង្កឱ្យមនុស្ស ២២ នាក់ស្លាប់នោះ។
លោក អាមរូលឡាហ៍ សាឡេហ៍ បានថ្លែងថា៖ «មេខ្លោងទី២» មិនស្គាល់ឈ្មោះរូបនោះ ត្រូវបានគេសម្លាប់នៅក្នុងខេត្តប៉ាក់ទៀភាគខាងកើត និងមេខ្លោងលេខ ៣ ដែលទទួលបន្ទុកផ្នែកប្រតិបត្តិការត្រូវបានគេចាប់ខ្លួន។
ខ្មាន់កាំងភ្លើងទាំង ៣ នាក់ បានវាយប្រហារយ៉ាងកំរោលចូលទៅក្នុងសាកលវិទ្យាល័យក្រុងកាប៊ុល កាលពីថ្ងៃទី ២ ខែវិច្ឆិកា ដោយបានបោកគ្រាប់បែក និងបាញ់កាំភ្លើងស្វ័យប្រវត្តិនៅពាសពេញបរិវេណសាកលវិទ្យាល័យ អស់រយៈពេលជាច្រើនម៉ោង។
ការវាយប្រហារនោះត្រូវបានអះអាងដោយក្រុមរដ្ឋអ៊ិស្លាម ទោះបីជារដ្ឋាភិបាលអាហ្វហ្គានីស្ថាន បានស្តីបន្ទោសទៅលើក្រុមកងកម្លាំងតាលីបង់ក្តី។
ប្រទេសអាហ្វហ្គានីស្ថានកំពុងរកមធ្យោបាយដោះស្រាយជាមួយការកើនឡើងនូវអំពើហិង្សា ដែលកាន់តែអាក្រក់ខ្លាំងឡើង ទោះបីជារដ្ឋាភិបាលបានរៀបចំឱ្យមានកិច្ចពិភាក្សាសន្តិភាពជាមួយក្រុមតាលីបង់ នៅក្នុងប្រទេសកាតា ក្តី។
កិច្ចពិភាក្សាទាំងនោះបាន ធ្វើឡើងបន្ទាប់ពីមានកិច្ចព្រមព្រៀងមួយ រវាងក្រុងវ៉ាស៊ីនតោន និងក្រុមអ៊ិស្លាមប្រកាន់តឹង ដើម្បីដកកងកម្លាំងយោធាអាមេរិកទាំងអស់ ចេញពីអ្វីដែលបានក្លាយជាសង្គ្រាមយ៉ាងយូរបំផុតរបស់ US នៅអាហ្វហ្គានីស្ថាន៕ AFP/SK