.jpg)
បុរសម្នាក់មើលព័ត៌មានតាមទូរទស្សន៍ដែលបង្ហាញរូបភាពវីដេអូរបស់មេដឹកនាំកូរ៉េខាងជើងលោកគីម ជុងអ៊ុន នៅស្ថានីយរថភ្លើងក្នុងក្រុងសេអ៊ូល។ AFP
ក្រុងសេអ៊ូលៈ មេដឹកនាំកូរ៉េខាងជើង លោកគីម ជុងអ៊ុនបានថ្លែងថា លោកនឹងឈប់សាកល្បងអាវុធនុយក្លេអ៊ែរ និងមីស៊ីលបាលីស្ទិកអន្តរទ្វីបនៅក្នុងការប្រកាសកាលពីថ្ងៃសៅរ៍ ដែលត្រូវបានប្រធានាធិបតីអាមេរិកលោក ដូណាល់ត្រាំ ស្វាគមន៍ មុនពេលកិច្ចប្រជុំរវាងថ្នាក់ដឹកនាំទាំង ២ នាពេលអនាគតឆាប់ៗខាងមុខនេះ។
ការប្រកាសរបស់ក្រុងព្យុងយ៉ាង ដែលត្រូវបានទន្ទឹងរង់ចាំដោយអាមេរិកអស់រយៈពេលដ៏យូរនោះ នឹងក្លាយទៅជាជំហានដ៏សំខាន់នៅក្នុងជំហរការទូតនៅឧបទ្វីបកូរ៉េ។
ការប្រកាសនោះ បានកើតឡើងមិនដល់ជាងមួយសប្ដាហ៍មុនពេលមេដឹកនាំកូរ៉េខាងជើងជួបជាមួយនឹងប្រធានាធិបតីកូរ៉េខាងត្បូងលោកម៉ូន ជេអ៊ីនសម្រាប់កិច្ចប្រជុំដែលរៀបចំឡើងនៅឯតំបន់គ្មានកងទ័ពដែលពុះចែកឧបទ្វីបជា ២ មុនពេលជំនួបជាមួយនឹងលោកដូណាល់ត្រាំ។
ប៉ុន្តែលោកគីម ជុងអ៊ុន មិនបានបញ្ចេញសញ្ញាណអ្វីដែលបញ្ជាក់ថា ក្រុងព្យុងយ៉ាងនឹងបោះបង់អាវុធនុយក្លេអ៊ែរ ឬមីស៊ីលបាលីស្ទិកអន្តរទ្វីបដែលអាចបាញ់ដល់អាមេរិករបស់ខ្លួននោះទេ។
ប្រជាជនមើលព័ត៌មានតាមទូរទស្សន៏ដែលបង្ហាញរូបភាពវីដេអូនៃការបាញ់មីស៊ីលរបស់កូរ៉េខាងជើង។ AFP
លោកគីម ជុងអ៊ុន បានថ្លែងថា កូរ៉េខាងជើង បាន ធ្វើការអភិវឌ្ឍបច្ចេកវិទ្យាមីស៊ីលបាលីស្ទិកអន្តរទ្វីប និងបច្ចេកវិទ្យាក្នុងការបំព្រួញក្បាលគ្រាប់មីស៊ីលឲ្យតូចល្មមសម្រាប់បំពាក់លើមីស៊ីលរបស់ ខ្លួនដោយជោគជ័យ។ ដូច្នេះ កូរ៉េខាងជើង មិនឃើញពីសារៈសំខាន់នៃការធ្វើតេស្តសាកល្បងអាវុធនុយក្លេអ៊ែរការបាញ់សាកល្បងនៃមីស៊ីលរយៈចម្ងាយមធ្យម និងមីស៊ីលបាលីស្ទិកអន្តរទ្វីបនោះទេ។
បើតាមភ្នាក់ងារសារព័ត៌មានផ្លូវការ KCNA របស់កូរ៉េខាងជើង លោកបានថ្លែងប្រាប់គណៈកម្មាធិការកណ្ដាលនៃគណបក្សពលដែលជាបក្សកាន់អំណាច ខណៈកន្លែង ធ្វើការសាកល្បងអាវុធនុយក្លេអ៊ែររបស់កូរ៉េខាងជើង លែងត្រូវការទៀតនោះ។
គណបក្សនេះ បានសម្រេចថា ការធ្វើតេស្តសាកល្បងអាវុធនុយក្លេអ៊ែរ និងមីស៊ីលបាលីស្ទិកអន្តរទ្វីប នឹងត្រូវផ្អាកនៅថ្ងៃសៅរ៍នេះ។
គេបានសង្កេតឃើញថា កូរ៉េខាងជើងមិនបានធ្វើតេស្តសាកល្បងអ្វីឡើយ ចាប់តាំងពីខែវិច្ឆិកាមក ហើយទីកន្លែងសម្រាប់ការបាញ់តេស្តសាកល្បងអាវុធនុយក្លេអ៊ែរ និង មីស៊ីលនាពេលកន្លងទៅនោះ ក៏នឹងត្រូវរុះរើ ដើម្បីធានាឲ្យច្បាស់អំពីការផ្អាកការសាកល្បងនោះដែរ៕
