ក្រុងសេអ៊ូលៈ មេដឹកនាំកូរ៉េខាងជើងលោកគីម ជុងអ៊ុន បានថ្លែងកាលពីថ្ងៃពុធ បន្ទាប់ពីកិច្ចប្រជុំជាមួយលោកប្រធានាធិបតីកូរ៉េខាងត្បូងមូន ជេអ៊ីន នៅក្រុងព្យុងយ៉ាង ថាលោកនឹងធ្វើទស្សនកិច្ចជាប្រវត្តិសាស្ត្រមួយទៅកាន់ក្រុងសេអ៊ូល «នៅក្នុងពេលខាងមុខឆាប់ៗនេះ»។
លោកមូន ដែលបានធ្វើដំណើរទៅកាន់កូរ៉េខាងជើងដើម្បីផ្ដល់សម្ទុះថ្មីដល់កិច្ចខិតខំប្រឹងប្រែងក្នុងការលុបបំបាត់អាវុធនុយក្លេអ៊ែរ ដែលបានជាប់គាំងនោះ បានថ្លែងថាទស្សនកិច្ចអាចនឹងត្រូវធ្វើឡើងនៅក្នុងឆ្នាំនេះលុះត្រាតែមានកាលៈទេសៈពិសេសអ្វីមួយកើតឡើង។
លោកមូន បានបន្ថែមថា កូរ៉េខាងជើង បានយល់ព្រមបញ្ឈប់ការធ្វើតេស្តនៃម៉ាស៊ីនគ្រាប់មីស៊ីល និងស្ថានីយបាញ់បង្ហោះមីស៊ីល Tongchangri ជាអចិន្រៃ្តយ៍ជាមួយនឹងការចូលរួមពីសំណាក់ក្រុមអ្នកជំនាញពីបណ្ដាប្រទេសដែល មានការពាក់ព័ន្ធ។
កូរ៉េខាងជើងបានធ្វើតេស្តមីស៊ីលជាច្រើនដងនៅស្ថានីយទាំងនោះ បើទោះបីជាកម្មវិធីមីស៊ីលបាលីស្ទិកអន្តរទ្វីប ត្រូវបានហាមឃាត់ដោយសេចក្ដីសម្រេចរបស់ក្រុមប្រឹក្សាសន្តិសុខនៃអង្គការសហប្រជាជាតិប៉ុន្តែកូរ៉េខាងជើង បានធ្វើតេស្តសាកល្បងមីស៊ីលរបស់ខ្លួននៅកន្លែងផ្សេងៗទៀត ដែលរួមទាំងព្រលានយន្តហោះនៃក្រុងព្យុងយ៉ាងផងដែរ។
រូបភាពផ្កាយរណបនៅក្នុងខែសីហា ឆ្នាំ ២០១៨ នេះ បានឲ្យដឹងថា កម្មករបានកំពុងតែធ្វើការរុះរើម៉ាស៊ីននៃស្ថានីយសាកល្បង ដែលនេះវាស៊ីគ្នាជាមួយនឹងកិច្ចសន្យាដែលបាន ធ្វើជាមួយនឹងប្រធានាធិបតីអាមេរិកលោក ដូណាល់ ត្រាំ នៅ ឯជំនួបនៅប្រទេសសិង្ហបុរី។
លោកប្រធានាធិបតីកូរ៉េខាងត្បូង បានថ្លែងថា កូរ៉េខាងជើងអាចបិទមជ្ឈមណ្ឌលនុយក្លេអ៊ែររបស់ខ្លួន បើក្រុងវ៉ាស៊ីនតោន «មានវិធានការឆ្លើយតប» ណាមួយ៕