មេដឹកនាំនៃប្រទេសចំនួន ២៣ និងអង្គការសុខភាពពិភពលោកកាលពីថ្ងៃអង្គារ បានបង្ហាញការគាំទ្រគំនិតនៃបង្កើតសន្ធិសញ្ញាអន្តរជាតិមួយដែលនឹងជួយពិភពលោកក្នុងការដោះស្រាយបញ្ហាសុខភាពនាពេលអនាគតដូចជាជំងឺកូវីដ ១៩ ដែលកំពុងតែរាលដាលពាសពេញពិភពលោក។
ប្រធានក្រុមប្រឹក្សាអឺរ៉ុបលោក Charles Michel បានចេញគំនិតនេះក្នុងកិច្ចប្រជុំកំពូល G20 កាលពីខែវិច្ឆិកា។ កិច្ចព្រមព្រៀងប្រភេទនេះនឹងធានាការចែកចាយ វ៉ាក់សាំង ថ្នាំព្យាបាល និងឧបករណ៍ធ្វើរោគវិនិច្ឆ័យ ជាសកល និងដោយសមធម៌។
មេដឹកនាំប្រទេសហ្វីជី ព័រទុយហ្គាល់ រូម៉ានី អង់គ្លេស រ្វ៉ាន់ដា កេនយ៉ា បារាំង អាល្លឺម៉ង់ ក្រិក កូរ៉េខាងត្បូង ស៊ីលី កូស្តារីកា អាល់បានី អាហ្វ្រិកខាងត្បូង ទ្រីនីដាដ និងតូបាហ្គោ ហូឡង់ ទុយនីស៊ី សេណេហ្គាល់ អេស្ប៉ាញ ន័រវែស ស៊ែប៊ី ឥណ្ឌូនេស៊ី អ៊ុយក្រែន និងអង្គការសុខភាពពិភពលោក បានផ្ដល់ការគាំទ្រគំនិតនេះកាលពីថ្ងៃអង្គារ៕