ក្រុងការ៉ាកាសៈ មេដឹកនាំបក្សប្រឆាំងប្រទេស វ៉េណេស៊ុយអេឡា កាលពីថ្ងៃសៅរ៍ បានទាត់ចោល «កិច្ចចរចាមិនស្មោះត្រង់» នៅក្នុងការដោះស្រាយវិបត្តិនយោបាយនៅក្នុងប្រទេសនេះ ខណៈប្រទេស ន័រវែស បានប្រកាសថា ខ្លួននឹងរៀបចំកិច្ចចរចាមួយជុំទៀតរវាងក្រុមអ្នកតំណាងរបស់គណបក្សប្រឆាំង និងរដ្ឋាភិបាលរបស់លោកប្រធានាធិបតី នីកូឡាស ម៉ាឌូរ៉ូ។
រដ្ឋមន្ត្រីការបរទេសប្រទេស ស្កង់ឌីណាវី គឺលោក Ine Eriksen Soreid បានថ្លែងថា ភាគីទាំង ២ នឹងត្រឡប់ទៅកាន់ក្រុងអូស្លូនៅសប្តាហ៍ក្រោយនេះ «ដើម្បីបន្តដំណើរការចរចាមួយដែលបានសម្របសម្រួលដោយប្រទេស ន័រវែស»។
ការដឹកនាំសម្រុះសម្រួលនោះ បានកើតឡើង ក្រោយពីមានការតស៊ូដណ្តើមអំណាចគ្នាអស់រយៈពេលជាច្រើនខែ រវាងមេដឹកនាំប្រធានសភា លោក Juan Guaido និងប្រធានាធិបតីសង្គមនិយមលោក នីកូឡាស ម៉ាឌូរ៉ូ ពេលខ្លះមានការប៉ះទង្គិចរវាងក្រុម អ្នកតវ៉ា និងប៉ូលិសនៅតាមផ្លូវបណ្តាលឲ្យមានមនុស្សស្លាប់។
លោក Guaido គាំទ្រដោយអាមេរិក ត្រូវបានទទួលស្គាល់ដោយរាប់សិបប្រទេសទៀតថា ជាប្រធានាធិបតីបណ្ដោះអាសន្ន ក្រោយពីការចាត់ទុក លោក ប្រធានាធិបតី ម៉ាឌូរ៉ូ ថា«ខុសច្បាប់» បន្ទាប់ពីលោកជាប់ឆ្នោតជាថ្មី កាលពីឆ្នាំ ២០១៨ នៅក្នុងការបោះឆ្នោតជាទូទៅដែលត្រូវបានគេចាត់ទុកថា មានការលួចបន្លំ។
លោក ម៉ាឌូរ៉ូ បានរងការរិះគន់យ៉ាងខ្លាំង ពីសហគមន៍អន្តរជាតិជុំវិញការធ្វើឲ្យសេដ្ឋកិច្ចរបស់ប្រទេស វ៉េណេស៊ុយអេឡា ធ្លាក់ចុះ ដែលបាននាំឲ្យមានការខ្វះខាតស្បៀងអាហារជាមូលដ្ឋាន ដោយបង្ខំឲ្យប្រជាជនរាប់លាននាក់ រត់ភៀសខ្លួន និងធ្វើការបង្ក្រាបយ៉ាងសាហាវផងដែរ។
លោក ម៉ាឌូរ៉ូ ត្រូវបានគាំទ្រដោយប្រទេសធំៗមួយចំនួនដូចជា ប្រទេស រុស្ស៊ី ចិន គុយបា និងក្រុមយោធាដ៏មានអំណាចផងដែរ។
លោក Guaido បានប្រាប់ ក្រុមអ្នកកាសែតនៅក្រុងការ៉ាកាស ជាសារព័ត៌មានរដ្ឋ Lara កាលពីថ្ងៃសៅរ៍ថា៖ «គ្មាននរណាម្នាក់ នឹងធ្វើឲ្យយើងនៅទីនេះ យល់ច្រឡំអំពីការចរចាមិនស្មោះត្រង់នេះទេ» ដោយលោកមិនបានធ្វើសុន្ទរកថា អំពីសេចក្តីប្រកាសដោយត្រង់ៗរបស់ប្រទេស ន័រវែស នោះឡើយ។
លោកបានប្រយ័ត្នប្រយែងអំពីកិច្ចពិភាក្សាទាំងនោះ ចាប់តាំងពីពួកគេមិនមានប្រជាប្រិយភាពជាមួយបក្សប្រឆាំងជាមូលដ្ឋានដែលបានចំណាយពេលអស់ជាច្រើនខែនៅតាមដងផ្លូវនានា ដែលបានព្យាយាមជំរុញឲ្យលោក ម៉ាឌូរ៉ូ ចុះចេញពីអំណាចនោះ។
លោក Guaido បានថ្លែងថា មិនមាន «ការចរចា» នៅក្នុងកិច្ចពិភាក្សានៅប្រទេស ន័រវែស នោះទេ ខណៈកិច្ចព្រមព្រៀងណាមួយ គួរដាក់បញ្ចូលឲ្យមានការសម្រុះសម្រួលដល់ការចេញដំណើររបស់លោក ម៉ាឌូរ៉ូ និងការបោះឆ្នោតថ្មី ត្រូវរៀបចំធ្វើឡើងវិញ។
លោក Guaido ថា៖ «យើងនឹងនៅតែទទូចឲ្យ ម៉ាឌូរ៉ូ ចុះចេញពីតំណែង»៕ AFP/SK