ក្រុងវ៉ាឡេនសៀៈ មេដឹកនាំបណ្តោះអាសន្នស្វ័យប្រកាសរបស់វ៉េណេស៊ុយអេឡា លោក Juan Guaido បានចាប់ផ្តើមធ្វើដំណើរទស្សនកិច្ចមួយនៅក្នុងប្រទេសកាលពីថ្ងៃសោរ៍ ដែលមានគោលបំណងធ្វើឲ្យមានចលនារបស់ប្រជាពលរដ្ឋ ដើម្បីបង្ខំឲ្យប្រធានាធិបតីលោក នីកូឡាស ម៉ាឌូរ៉ូ ចុះចេញពីអំណាច។
នៅពេលដែលលោក Guaido មានវ័យ ៣៥ ឆ្នាំ បានចាប់ផ្តើម «ប្រតិបត្តិការសេរីភាព» របស់លោកនៅក្រុងវ៉ាឡេនសៀ ភាគខាងជើង យោធាដែលគាំទ្រលោក ម៉ាឌូរ៉ូ បានធ្វើសមយុទ្ធយោធាថ្មីៗជាបន្តបន្ទាប់។
ការហ្វឹកហ្វឺន ដែលបានយកចិត្តទុកដាក់ទៅលើការការពារហេដ្ឋារចនាសម្ព័ន្ធអគ្គិសនីពីការវាយប្រហារ ជាប្រតិកម្មមួយទៅនឹងការដាច់ភ្លើងនៅ ទូទាំងប្រទេសរយៈពេល ១ សប្តាហ៍ ដែលលោក ម៉ាឌូរ៉ូ បានស្តីបន្ទោសទៅលើអាមេរិកថា «បានបំផ្លិចបំផ្លាញដោយចេតនា» ប៉ុន្តែក្រុមអ្នកជំនាញបាននិយាយថា នេះទំនងជាលទ្ធផលនៃការធ្វេសប្រហែស របស់លោក ម៉ាឌូរ៉ូ ជាច្រើនឆ្នាំមកនេះ។
លោក Guaido ជាប្រធានសភាដឹកនាំគណបក្សប្រឆាំង ដែលការអះអាងរបស់លោកថា ជាប្រធានាធិបតីចាំផ្ទះ ត្រូវបានទទួលស្គាល់ដោយអាមេរិក កាណាដា អាមេរិកឡាទីននិងប្រទេសអឺរ៉ុបជាច្រើនទៀតដែលបានប្តេជ្ញាថា លោក នឹងចូលកាន់តំណែងប្រធានាធិបតីនៅពេលឆាប់ៗខាងមុខនេះ។
លោក Guaido បានកំពុងជំរុញឲ្យមានការធ្វើបាតុកម្មរយៈពេលជិត ២ ខែប្រឆាំងលោក ម៉ាឌូរ៉ូ ក្រោយពីធ្វើការប្រកាសដោយខ្លួនឯងថាជាប្រធានាធិបតីបណ្តោះអាសន្ន នៅអំឡុងពេលប្រមូលផ្តុំតាមដងផ្លូវដោយមានអ្នកគាំទ្ររាប់ម៉ឺននាក់ បន្ទាប់ពីការស្បថចូលកាន់តំណែងរបស់លោក ម៉ាឌូរ៉ូ សម្រាប់អាណត្តិទី២ ទោះបីជាការបោះឆ្នោត ត្រូវបានបដិសេធយ៉ាងដាច់អហង្ការថា មានការលួចបន្លំសន្លឹកឆ្នោតក្តី។
លោក Guaido បានថ្លែងប្រាប់ក្រុមអ្នកគាំទ្ររាប់ពាន់នាក់កាលពីថ្ងៃសៅរ៍ថា៖ «យើង នឹងទាមទារយកអ្វីដែលជាកម្មសិទ្ធិរបស់ប្រជាជនមកវិញ»។
លោក ម៉ាឌូរ៉ូ បានថ្លែងថា៖ «មានតែក្រុមចោរលួច ឬ វិមានប្រធានាធិបតីទេ អាចធ្វើឲ្យ Guaido ក្លាយជាប្រធានាធិបតីបាន។ មានតែការគំាទ្រពីប្រជាជនទេ ដែលធ្វើឲ្យមនុស្សម្នាក់ក្លាយជាប្រធានាធិបតីរបស់ប្រទេសមួយបាន បើសិនមិនមានការគាំទ្រពីប្រជាជនទេ មិនអាចក្លាយជាប្រធានាធិបតីបានទេ។
មេដឹកនាំបក្សប្រឆាំងលោក Juan Guaido មិនមានពេលវេលាច្រើនទៀតទេ ដើម្បីកៀរគរមនុស្សនៅ ទូទាំងប្រទេស វ៉េណេស៊ុយអេឡា ដែល លោក បានថ្លែងថា នឹងបញ្ចប់ជាមួយនឹងការដង្ហែក្បួនធំមួយនៅមុខវិមានប្រធានាធិបតីនៅក្នុងក្រុងការ៉ាកាស៕ AFP/SK