The Phnom Penh Post Search

Search form




Logo of Phnom Penh Post newspaper Phnom Penh Post - មេធាវី ២ នាក់​បាន​ប្ដឹង​ក្រុមហ៊ុន​រដ្ឋ​ឥណ្ឌូនេស៊ី​មួយ ទាក់ទិន​នឹង​ករណី​ប្រើប្រាស់​ឧបករណ៍​តេស្ត​កូវីដ១៩​ឡើងវិញ

មេធាវី ២ នាក់​បាន​ប្ដឹង​ក្រុមហ៊ុន​រដ្ឋ​ឥណ្ឌូនេស៊ី​មួយ ទាក់ទិន​នឹង​ករណី​ប្រើប្រាស់​ឧបករណ៍​តេស្ត​កូវីដ១៩​ឡើងវិញ

Content image - Phnom Penh Post
អ្នកដំណើរ​ម្នាក់​ត្រូវ​បាន​ធ្វើតេស្ត​រក​ជំងឺ​កូវីដ១៩​នៅ​មុន​ពេល​ឡើង​ជិះ​យន្តហោះ​នៅ​ព្រលាន​យន្តហោះ​អន្តរជាតិ Juanda ក្នុង​ទីក្រុង Sidoarjo កាលពី​ថ្ងៃទី ២២ ធ្នូ ឆ្នាំ ២០២០។ AFP

មេធាវី ២ នាក់​បាន​ប្ដឹង​ក្រុមហ៊ុន​រដ្ឋ​ឥណ្ឌូនេស៊ី​មួយ ទាក់ទិន​នឹង​ករណី​ប្រើប្រាស់​ឧបករណ៍​តេស្ត​កូវីដ១៩​ឡើងវិញ

មេធាវី​ឥណ្ឌូនេស៊ី ២ នាក់​គ្រោង​នឹង​ប្តឹង​ក្រុមហ៊ុន​ឱសថ​ដែល​គ្រប់គ្រង​ដោយ​រដ្ឋ បន្ទាប់ពី​ត្រូវបាន​គេ​រកឃើញថា បាន​ប្រើ​សំឡី​ត្បារ​ច្រមុះ​ ដើម្បី​តេស្ត​រក​មេរោគ​កូវីដ១៩ ឡើងវិញ​លើ​មនុស្ស​រាប់ពាន់នាក់។

កាលពី​សប្តាហ៍​មុន​ប៉ូលិស​បាន​ចាប់ខ្លួន​អ្នកធ្វើការ​ក្នុង​ក្រុមហ៊ុន​ឱសថ Kimia Farma ចំនួន ៥ នាក់ រួមទាំង​អ្នកគ្រប់គ្រង​អាជីវកម្ម​ម្នាក់​នៅ​ទីក្រុង Medan នៃ​ខេត្ត​ស៊ូម៉ាត្រា​ខាងជើង ត្រូវ​បាន​គេ​ចោទប្រកាន់​ពី​បទលាង និង​ខ្ចប់​ឧបករណ៍​តេស្ត​មេរោគ​កូវីដ១៩ ឡើងវិញ​ និង​បញ្ជូន​ឧបករណ៍​ទាំងនោះ​ទៅ​អាកាសយានដ្ឋាន​អន្តរជាតិ​គូឡាម៉ាមួ (Kualanamu) ដើម្បី​តេស្ត​លើ​អ្នកដំណើរ។

មេធាវី​ម្នាក់​ក្នុងចំណោម​មេធាវី​ទាំង ២ រូប បានឱ្យ​ដឹងថា៖ «វា​ជា​បទពិសោធ​អាក្រក់​ណាស់ និង​គួរឱ្យ​សង្ស័យ​ ពីព្រោះ​ពួកគេ​បានធ្វើ​តេស្ត​លើ​ពួកយើង ដោយ​ទទូច​សុំ​ត្បារ​ច្រមុះ​ខ្ញុំ​ជាច្រើន​ដង បើទោះជា​ខ្ញុំ​បាន​និយាយថា នីតិវិធី ដែល​គេ​កំពុង​ធ្វើ​នេះ​មិន​បាន​អនុវត្ត​ទៅតាម​វិជ្ជាជីវៈ​ទេ»។

លោក​បាន​បន្តថា៖ «ឥឡូវនេះ​ដោយមាន​បទពិសោធ​នៅ​កន្លែង​ធ្វើតេស្ត​ផ្ទាល់​ខ្ញុំ​សង្ស័យថា មូលហេតុ​ដែល​គេ​ត្រូវ​ត្បារ​ច្រមុះ​ខ្ញុំ​ច្រើនដង និង​រុក​ជ្រៅ​ខ្លាំង​គឺ​ដោយសារ​តែ​ពួកគេ​កំពុង​ប្រើ​សំឡី​ត្បារ ដែល​លាង​ និង​យកមក​ប្រើប្រាស់​ឡើងវិញ ហើយ​ដោយសារ​តែ​សំឡី​នោះ​វា​របស់​ប្រើ​ឡើងវិញ ទើប​ធ្វើឱ្យ​ដំណើរការ​នៃ​ការស្វែងរក​មេរោគ​ពិបាក ដោយ​ត្រូវ​ត្បារ​ជាច្រើន​ដង។ ខ្ញុំ​មាន​អារម្មណ៍​ថា ខ្ញុំ​ជា​ជនរងគ្រោះ​នៃ​ការបោកប្រាស់​ដ៏ធ្ងន់ធ្ងរ»។

មេធាវី​ទាំង ២ គ្រោង​នឹង​ទាមទារ​សំណង​ពី​ក្រុមហ៊ុន Kimia Farma ចំនួន ៦៩ ០០០ ដុល្លារ​អាមេរិក ដល់​អ្នកដំណើរ​ក្នុង ១ នាក់ ដែល​ជា​អ្នករងគ្រោះ​ពី​ការបោកប្រាស់​នេះ ខណៈ​អ្នក​ទាំង ២ កំពុង​ចងក្រង​សេចក្តី​ថ្លែងការណ៍​ពី​ជនរងគ្រោះ ដើម្បី​ដាក់ពាក្យ​បណ្តឹង​រដ្ឋប្បវេណី​រួមមួយ។

លោក RZ Panca Putra Simanjuntak មេប៉ូលិស​នៅ​ទីក្រុង Medan បាន​ប្រាប់ អ្នកយក​ព័ត៌មាន​ថា អ្នកដំណើរ​ជាង ៩ ០០០ នាក់​អាច​រង​ផលប៉ះពាល់ ដោយ​ឧបករណ៍​តេស្ត​ប្រើប្រាស់​ឡើងវិញ​នេះ។ អ្នកដំណើរ​ចន្លោះ​ពី ១០០ ទៅ ២០០ នាក់ ត្រូវ​បាន​ធ្វើតេស្ត​ជាប្រចាំ​ថ្ងៃ​នៅ​អាកាសយានដ្ឋាន​នេះ ដោយ​ក្នុងនោះ ឧបករណ៍​ខ្លះ​ជា​ប្រដាប់ប្រដា​ពិត និង​ខ្លះទៀត​ជា​ឧបករណ៍​ប្រើប្រាស់​ឡើងវិញ។

គោលបំណង​នៃ​ការប្រើប្រាស់​ឡើងវិញ​នេះ​ត្រូវ​បាន​គេ​ជឿថា ជា​ហេតុផល​ចង់​ចំណេញ​ផ្នែក​ហិរញ្ញវត្ថុ ព្រោះ​ថា ក្រុមហ៊ុន​ឱសថ Kimia Farma បានគិត​ថ្លៃ ១៤ ដុល្លារ​អាមេរិក​សម្រាប់​ការធ្វើ​តេស្ត​ម្ដង។

បុគ្គលិក Kimia Farma អាច​រកប្រាក់​បាន​ប្រមាណ ១២៥ ០០០ ដុល្លារ​អាមេរិក ចាប់​តាំងពី​ពាក់កណ្តាល​ខែ​ធ្នូ​មក។ ប៉ូលិស​កំពុងតែ​តាមដាន​ថា តើ​អ្នកដំណើរ​ណា​ម្នាក់​បាន​ឆ្លង​មេរោគ​ ដោយសារ​ឧបករណ៍​តេស្ត​កូវីដ​ឡើងវិញ​នេះដែរ​ឬ​យ៉ាងណា?

មន្ត្រី​អាកាសយានដ្ឋាន​ម្នាក់​ដែល​សុំ​មិន​បញ្ចេញ​ឈ្មោះ​បាន​និយាយថា បុគ្គលិក​អាកាសយានដ្ឋាន​បាន​ធ្វើ​ព្រងើយកន្ដើយ​ចំពោះ​ករណីនេះ។ ប្រភព​ដដែល​បាន​បន្តថា៖ «ក្រុមហ៊ុន​អាកាសចរណ៍​មាន​ជំនឿជាក់​លើ​អាកាសយានដ្ឋាន Kualanamu ក្នុង​ការជួយ​សម្រួល​ដំណើរការ​នៃ​ការធ្វើ​តេស្ត​នេះ»។

មន្ត្រី​ប៉ូលិស បាន​ឱ្យ​ដឹងថា ព្រលានយន្តហោះ​នេះ​កំពុង​ធ្វើ​ប្រតិបត្តិការ​ជាធម្មតា បើទោះជា​មាន​លេចឮ​ពី​ព័ត៌មាន​នេះ​ក៏ដោយ។ ដោយឡែក សម្រាប់​មជ្ឈមណ្ឌល​ធ្វើតេស្ត​នៅ​ព្រលានយន្តហោះ​នេះ​ត្រូវ​បាន​បិទ និង​រឹបអូស។

បើ​យោងតាម​ច្បាប់​សុខភាព​របស់​ឥណ្ឌូនេស៊ី ជនសង្ស័យ​អាច​នឹង​ជាប់ពន្ធនាគារ​រហូតដល់ ១០ ឆ្នាំ ប្រសិន​បើ​ត្រូវបាន​រកឃើញថា ប្រព្រឹត្ត​អំពើ​នេះ​មែន។

លោកស្រី Irma Hidayana អ្នកពិគ្រោះ​យោបល់​ផ្នែក​សុខភាព​សាធារណៈ​បាន​និយាយថា រឿងនេះ​មិនមាន​អ្វី​គួរឱ្យ​ភ្ញាក់ផ្អើល​ទេ ដោយសារ​ការត្រួតពិនិត្យ​ទាក់ទិន​នឹង​ការធ្វើ​តេស្ត​មិន​មាន​ការត្រួតពិនិត្យ​ត្រឹមត្រូវ​ពី​រដ្ឋាភិបាល និង​ក្នុង​តំបន់​ក្នុង​ប្រទេស​ឥណ្ឌូនេស៊ី​ឡើយ។

កន្លងមក​អាជ្ញាធរ​បាន​រកឃើញ​ការលក់​លិខិត​ក្លែងបន្លំ ដែល​បង្ហាញ​ថា មនុស្ស​នោះ​មិនមាន​ជំងឺ​កូវីដ១៩ ដើម្បី​អនុញ្ញាត​ឱ្យ​អ្នក​ទាំងនោះ​បានធ្វើ​ដំណើរ។ លោកស្រី​វេជ្ជបណ្ឌិត Hidayana ក៏បាន​មាន​ប្រសាសន៍​ថា៖ «មិនមាន​ការឃ្លាំមើល​យ៉ាង​ដិតដល់​លើ​ការធ្វើ​តេស្ត​អង់ទីហ្សែន​នៅនឹង​កន្លែង​នោះទេ»។

លោក​ក៏បាន​បន្ថែមថា កង្វះ​ការត្រួតពិនិត្យ និង​ចំណាត់ការ​របស់​រដ្ឋាភិបាល ដើម្បី​បញ្ឈប់​ការរីករាលដាល​នៃ​ជំងឺ​នេះ​អាច​នឹង​បង្ក​ជា​កង្វល់​មួយ ដោយសារ​តែ​ប្រទេស​នេះ​ទើបតែ​រកឃើញ​ករណី​វ៉ារ្យ៉ង់​ថ្មី​មកពី​ប្រទេស​ឥណ្ឌា ដែល​អាចធ្វើ​ឱ្យ​ប្រទេស​នេះ​កាន់តែ​ប្រឈម​នឹង​ហានិភ័យ​ខ្ពស់៕

អត្ថបទគួរចាប់អារម្មណ៍