.jpg)
ក្រុមបុគ្គលិកពេទ្យស្លៀកពាក់ឈុតការពារ ធ្វើតេស្តរកជំងឺកូវីដ ១៩ នៅតំបន់ជាយក្រុងគូឡាឡាំពួកាលពីថ្ងៃទី ១៧ ខែ ឧសភា ឆ្នាំ ២០២១។ AFP
រដ្ឋាភិបាលម៉ាឡេស៊ីបានប្រកាសថា ជនចំណាកស្រុកដែលមិនមានភាពស្របច្បាប់នឹងមិនត្រូវបានអាជ្ញាធរចាប់ខ្លួនក្នុងអំឡុងពេលចែកចាយវ៉ាក់សាំងទេ ប្រសិនបើពួកគេទៅទទួលវ៉ាក់សាំង ខណៈកម្មវិធីចាក់វ៉ាក់សាំងក្នុងប្រទេសនេះ នឹងចាប់ផ្តើមនៅសប្តាហ៍ក្រោយ។
រដ្ឋមន្ត្រីក្រសួងវិទ្យាសាស្ត្របច្ចេកវិទ្យា និងការច្នៃប្រឌិត លោក Khairy Jamaluddin បាននិយាយថា ក្រុមការងារចាក់វ៉ាក់សាំងកូវីដ ១៩ (CITF) នឹងត្រូវធ្វើការជាមួយក្រសួងការបរទេស ក៏ដូចជាសង្គមស៊ីវិលនានា ដើម្បីស្វែងរកជនចំណាកស្រុកដែលគ្មានឯកសារឱ្យមកចាក់វ៉ាក់សាំង។
លោកបាននិយាយថា៖ «សម្រាប់ជនចំណាកស្រុកគ្មានឯកសារបញ្ជាក់អត្តសញ្ញាណក្រុមការងារនឹងរៀបចំផែនការ ដោយធ្វើយ៉ាងណាដើម្បីឱ្យជនទាំងនោះ ទទួលបានវ៉ាក់សាំងដែរ។ ស្ថានទូតបរទេស អង្គការអន្តរជាតិ សង្គមស៊ីវិល អង្គការក្រៅរដ្ឋាភិបាលអាចជួយក្នុងការកៀរគរជនបរទេស ដែលគ្មានឯកសារឱ្យចេញមកចាក់វ៉ាក់សាំងដោយធានាថា យើងនឹងមិនឃុំខ្លួន ឬចាប់ពួកគេទេ»។
លោកបានបន្តថា៖ «ខ្ញុំគិតថា នោះគឺជាសារៈសំខាន់បំផុត ដែលយើងចង់ផ្សាយចេញ។ ការធ្វើដូចនេះ គឺដើម្បីជួយសម្រួលដល់ជនទាំងនោះ ឱ្យចេញមុខដោយសេរី និងមានទំនុកចិត្តថា រដ្ឋាភិបាលនឹងចាក់វ៉ាក់សាំង និងមិនឃុំខ្លួនពួកគេទេ»។
ដោយឡែកសម្រាប់ពលករបរទេសដែលមានឯកសារលោក Khairy បាននិយាយថា ក្រសួងមហាផ្ទៃរួមជាមួយក្រសួងធនធានមនុស្ស នឹងមានភារកិច្ចទាក់ទងពួកគេទាំងនោះ។
លោក Khairyបាននិយាយថា៖ «យើងនឹងធ្វើការជាមួយនិយោជិតរបស់ពួកគេ ដូច្នេះពួកគេអាចផ្តល់ជូនយើងនូវព័ត៌មានលម្អិតរបស់និយោជករបស់ពួកគេឱ្យមកយើង។ ដូច្នេះយើងអាចធ្វើការណាត់ជួបកម្មករ ដើម្បីផ្ដល់វ៉ាក់សាំងឱ្យគេប្រកបដោយប្រសិទ្ធភាព និងគណនេយ្យភាព»។
រដ្ឋាភិបាលម៉ាឡេស៊ីបានឱ្យដឹងថា ខ្លួនបានត្រៀមវ៉ាក់សាំងគ្រប់គ្រាន់ ដើម្បីចែកចាយដល់ប្រជាជនជាង ៨០% នៃប្រជាជនសរុបជិត ៣៣ លាននាក់របស់ខ្លួន។ ប្រទេសនេះ ក៏បានអះអាងផងដែរថា ខ្លួននឹងផ្តល់ការចាក់វ៉ាក់សាំងឥតគិតថ្លៃដល់ជនគ្រប់រូប ដែលរស់នៅក្នុងប្រទេស រួមទាំងពលករចំណាកស្រុក ជនភៀសខ្លួន និងជនបរទេសផងដែរ។
គួរបញ្ជាក់ផងដែថា កាលពីឆ្នាំមុនអង្គការសហប្រជាជាតិបានរិះគន់ប្រទេសម៉ាឡេស៊ី ចំពោះការប្រមូលជនអន្តោប្រវេសន៍ និងជនភៀសខ្លួនដែលគ្មានឯកសារស្របច្បាប់រាប់រយនាក់ក្នុងអំឡុងពេលដាក់ប្រទេសក្នុងគ្រាអាសន្ន រយៈពេល ៣ ខែ ដើម្បីទប់ស្កាត់ការរីករាលដាលនៃជំងឺកូវីដ ១៩។ អ្នកទាំងនោះត្រូវបានបញ្ជូនទៅកាន់កន្លែងឃុំឃាំងទៀតផង។
លោក Charles Santiago សមាជិកសភាគណបក្សប្រឆាំងមកពីគណបក្សសកម្មភាពប្រជាធិបតេយ្យបានជំរុញឱ្យរដ្ឋាភិបាលចៀសវាងពីការប្រព្រឹត្តកំហុសចាស់ម្តងទៀត ដោយស្នើឱ្យរដ្ឋាភិបាលផ្តល់ការលើកលែងទោសដល់ជនចំណាកស្រុកដែលគ្មានឯកសារឱ្យបង្ហាញខ្លួន ដើម្បីទទួលការចាក់វ៉ាក់សាំងបង្ការ។
លោក Khairyបាននិយាយថា ប្រទេសម៉ាឡេស៊ី ក៏កំពុងស្វែងរកមើលការចាក់វ៉ាក់សាំងដែលត្រូវការតែ ១ ដង និងអាចត្រូវបានប្រើលើអ្នកដែលងាយរងគ្រោះដូចជាជនចំណាកស្រុកគ្មានអត្តសញ្ញាណស្របច្បាប់ដែលនឹងអាចស្ទាក់ស្ទើរក្នុងការមកចាក់វ៉ាក់សាំង ២ ដង។
គួរបញ្ជាក់ផងដែរថា វ៉ាក់សាំង Pfizer-BioNTech សរុបចំនួន ៣១២ ៣៩០ ដូស នឹងត្រូវដឹកមកប្រទេសនេះជាលើកដំបូងបង្អស់នៅថ្ងៃទី ២១ ខែកុម្ភៈ ដោយនឹងធ្វើការចាប់ផ្តើមកម្មវិធីចាក់វ៉ាក់សាំងនៅថ្ងៃទី ២៦ ខែកុម្ភៈ ខាងមុខ៕
