ក្រុងវ៉ាស៊ីនតោន៖ រដ្ឋមន្ត្រីការបរទេសអាមេរិកលោក ម៉ៃក៍ ប៉ុមប៉េអូ កាលពីថ្ងៃចន្ទ បានបញ្ជាក់យ៉ាងច្បាស់ថា អាមេរិកគ្មានផែនការធ្វើអន្តរាគមន៍ដោយយោធា នៅក្នុងប្រទេស វ៉េណេស៊ុយអេឡា ទេ ទោះបីជាលោកបានប្តេជ្ញាថា មេដឹកនាំឆ្វេងនិយមលោក នីកូឡាស ម៉ាឌូរ៉ូ នឹងខ្ទាតពីអំណាចនៅថ្ងៃណាមួយក្តី។
នៅក្នុងសុន្ទរកថាមួយនៅអាមេរិកឡាទីន លោក ម៉ៃក៍ ប៉ុមប៉េអូ បានបន្តសន្យារបស់លោកប្រធានាធិបតី ដូណាល់ ត្រាំ ឡើងវិញ ដើម្បីប្រយុទ្ធប្រឆាំងសង្គមនិយមនៅទូទាំងអឌ្ឈគោលនេះ ប៉ុន្តែបានថ្លែងថា គោលនយោបាយរបស់លោកនៅក្នុងប្រទេស វ៉េណេស៊ុយអេឡា ត្រូវតែមានការអត់ធ្មត់»។
លោក ម៉ៃក៍ ប៉ុមប៉េអូ បានថ្លែងនៅឯសាកលវិទ្យាល័យឡូវីសវីលីថា៖ «យើងបានកំពុងមើលឃើញសង្គមអំពាវនាវឲ្យមានការផ្លាស់ប្តូររបបតាមរយៈមធ្យោបាយហិង្សា ហើយយើងបាននិយាយថា រាល់ជម្រើសទាំងអស់ គឺនៅលើតុចរចា ដើម្បីជួយប្រជាជនវ៉េណេស៊ុយអេឡាស្តារប្រជាធិបតេយ្យ និងវិបុលភាពរបស់ពួកគេឲ្យបានល្អប្រសើរឡើងវិញ»។
លោក ប៉ុមប៉េអូ បានថ្លែងថា៖ «បញ្ហានោះ វានៅតែជាការពិត ប៉ុន្តែយើងបានដឹងពីប្រវត្តិសាស្ត្រថា គ្រោះថ្នាក់នានាចេញពីការប្រើប្រាស់កងកម្លាំងយោធា គឺវាមានសារៈសំខាន់ខ្លាំងណាស់នៅក្នុងប្រទេសមួយនេះ»។
ដោយបញ្ជាក់អំពីការដាក់ទណ្ឌកម្មរបស់អាមេរិកយ៉ាងធ្ងន់ធ្ងរ ដែលរួមមានការទប់ស្កាត់ទៅលើការនាំប្រេងចេញដ៏សំខាន់របស់វ៉េណេស៊ុយអេឡាផងដែរ លោក ប៉ុមប៉េអូ បានថ្លែងថា កិច្ចខិតខំប្រឹងប្រែងរបស់អាមេរិក «មានភាពប្រាកដនិយម នៅក្នុងសមត្ថភាពរបស់អំណាចអាមេរិក»។
ចាប់តាំងពីខែមករាមក លោក ត្រាំ បានទាមទារឲ្យលោក ម៉ាឌូរ៉ូ លាលែងពីតំណែង៕ AFP/SK