ក្រុងហ្គូម៉ា៖ ក្រុមអ្នកជួយសង្គ្រោះបានថ្លែងថា សាកសព ២៣ នាក់ ត្រូវបានគេរកឃើញកាលពីថ្ងៃអាទិត្យ ក្រោយពីយន្តហោះធុនតូច ១ គ្រឿងបានធ្លាក់ នៅពេលវាបានហោះឡើងទៅកាន់តំបន់នៃទីក្រុងហ្គូម៉ា ដែលមានមនុស្សរស់នៅយ៉ាងច្រើននៅសាធារណរដ្ឋប្រជាធិបតេយ្យកុងហ្គោ។
អ្នកសម្របសម្រួលបុគ្គលិកសង្គ្រោះនៅទីក្រុងហ្គូម៉ា លោក ចូស៊ីបហ៍ ម៉ាគុនឌី បានថ្លែងប្រាប់ AFP ថា៖ «បច្ចុប្បន្នយើងមានចំនួនអ្នកស្លាប់ដល់ ២៣ នាក់ហើយ»។
សាកសពទាំងនោះ ត្រូវបានគេជឿថា នឹងរាប់បញ្ចូលអ្នកដែលបានស្លាប់នៅលើយន្តហោះ និងមនុស្សនៅលើដី។
រូបភាពវីដេអូចេញពីកន្លែងកើតហេតុ បានបង្ហាញផ្សែងខ្មៅក្រាស់ឃ្មឹក និងអណ្តាតភ្លើងបានឆេះយ៉ាងសន្ធោសន្ធៅចេញពីតួយន្តហោះ ដែលកំពុងឆាបឆេះ ខណៈក្រុមពលរដ្ឋនៅក្នុងតំបន់បាននាំគ្នាចោមរោមមើលនៅទីនោះ។
ក្រុមអ្នកជួយសង្គ្រោះក៏បានឃើញភ្លើង កំពុងឆាបឆេះតួយន្តហោះនោះផងដែរ។
មន្ត្រីព្រលានយន្តហោះក្រុងហ្គូម៉ា លោក រីឆាត ម៉ាងហ្គូឡូប៉ា បានថ្លែងប្រាប់ AFP ថា គ្មានក្រុមអ្នកនៅរស់ពីគ្រោះមហន្តរាយធ្លាក់យន្តហោះនោះទេ។
យន្តហោះធុន Dornier-228 បានហោះឆ្ពោះទៅទីក្រុងប៊ីនី ចម្ងាយ ៣៥០ គីឡូម៉ែត្រពីទីក្រុងហ្គូម៉ាភាគខាងជើង នៅពេលវាបានចុះចតនៅក្នុងតំបន់លំនៅឋានមួយ នៅជិតព្រលានយន្តហោះនៅភាគខាងកើតប្រទេស។
បុគ្គលិកជើងហោះហើរប៊ីស៊ីប៊ីលោក ហឺរីធៀរ សេដម៉ាម៉ាឌូ បានថ្លែងថា៖ «មានក្រុមអ្នកដំណើរ ១៧ នាក់ និងយានិក ២ នាក់ នៅលើយន្តហោះនោះ។ យន្តហោះនោះបានហោះឡើងនៅប្រហែលម៉ោង ៩ និង ៩ ឬ ១០ នាទីព្រឹក»។
ជើងហោះហើរប៊ីស៊ីប៊ី ជាក្រុមហ៊ុនមួយបានបង្កើតឡើងកាលពីពេលថ្មីៗនេះ មានយន្តហោះ ៣ គ្រឿង ដែលបានបម្រើសេវានៅក្នុងខេត្តគីវ៉ូភាគខាងជើង។
បុគ្គលិកមើលថែម្នាក់ក្នុងចំណោមបុគ្គលិករបស់ក្រុមហ៊ុនជើងហោះហើរប៊ីស៊ីប៊ីនៅកន្លែងនោះ ត្រូវបានគេដកស្រង់សម្តីដោយសារព័ត៌មាន ស៊ីឌី បានថ្លែងថា៖ «យន្តហោះធុនតូចនោះធ្លាក់ បណ្តាលមកពីបញ្ហាបច្ចេកទេស»។
ចំនួនអ្នកស្លាប់ និងរបួសពិតប្រាកដ ដោយសារការធ្លាក់យន្តហោះ និងនៅលើដីនោះ នៅមិនទាន់ដឹងច្បាស់នៅឡើយទេ។
បេសកកម្មរបស់អង្គការសហប្រជាជាតិ បានដាក់ពង្រាយក្រុមបុគ្គលិករបស់ខ្លួននៅកុងហ្គោ ដើម្បីជួយការងារសង្គ្រោះក្នុងតំបន់៕ AFP/SK