.jpg)
ក្រុមអ្នកគាំទ្រលោក ម៉ាឌូរ៉ូ ស្រែកបន្ទរពាក្យស្លោក នៅក្នុងអំឡុងការតវ៉ា។ AFP
ក្រុងការ៉ាកាសៈ ទីភ្នាក់ងារសារព័ត៌មាន Sputnik រដ្ឋរុស្ស៊ីបានរាយការណ៍កាលពីថ្ងៃអាទិត្យថា យន្តហោះយោធារុស្ស៊ី ២ គ្រឿង បានដឹកទាហាន និងសម្ភារ ទៅកាន់វ៉េណេស៊ុយអេឡាកាលពីចុងសប្តាហ៍មុន។
ទីភ្នាក់ងារសារព័ត៌មាននោះបានរាយការណ៍បកប្រែជាភាសាអេស្ប៉ាញ ដែលបានចុះផ្សាយនៅក្នុងវេបសាយរបស់ខ្លួនថា៖ «យន្តហោះរុស្ស៊ី ២ គ្រឿងបានមកដល់ប្រទេស វ៉េណេស៊ុយអេឡា កាលពីថ្ងៃសៅរ៍ជាមួយសម្ភារ និងបុគ្គលិក ដើម្បីអនុវត្តកិច្ចសន្យាបច្ចេកទេសយោធា»។
សារព័ត៌មាននោះមិនបានផ្តល់ព័ត៌មានលម្អិតផ្សេងទៀតទេ ប៉ុន្តែបានដកស្រង់សម្តីពីមន្ត្រីម្នាក់ដែលសុំមិនផ្តល់អត្តសញ្ញាណមកពីស្ថានទូតរុស្ស៊ីនៅក្រុងការ៉ាកាស ដោយនិយាយថា៖ «មិនមានអ្វីជាអាថ៌កំបាំង» អំពីយន្តហោះយោធាទាំងនោះទេ។
របាយការណ៍សារព័ត៌មាន Sputnik ត្រូវបានគេចុះផ្សាយ ក្រោយពីអ្នកកាសែតវ៉េណេស៊ុយអេឡា គឺលោក Javier Mayorca បាននិយាយនៅ លើគេហទំព័រធ្វីធើរថា យន្តហោះទាំងនោះបានចុះចត កាលពីថ្ងៃសៅរ៍៕ AFP/SK
