.jpg)
កម្មករនេប៉ាល់ព្យាយាមនាំយកយន្តហោះម៉ាឡេស៊ីត្រឡប់ទៅផ្លូវរត់នៅព្រលានយន្តហោះខាត់ថ្មាន់ឌូកាលពីថ្ងៃទី១៩ ខែមេសា ២០១៨។ AFP
ក្រុងខាត់ថ្មាន់ឌូៈ យន្តហោះម៉ាឡេស៊ីមួយគ្រឿងដែលដឹកមនុស្ស១៣៩នាក់ ដែលបានបញ្ឈប់ការហើរឡើង ហើយរអិលចូលភក់ បានបង្ខំឲ្យព្រលានយន្តហោះខាត់ថ្មាន់ឌូ បិទរយៈពេលជាង ១២ ម៉ោង រហូតដល់យន្តហោះនេះ ត្រូវយកចេញពីភក់ នៅថ្ងៃសុក្រនេះ។
គ្មាននរណាម្នាក់ រងរបួសនៅក្នុងឧប្បត្តិហេតុនោះឡើយ ប៉ុន្តែអ្នកដំណើររាប់រយនាក់ បានលុបចោលជើងហោះហើររបស់ពួកគេ និងជើងហោះហើរផ្សេងៗទៀត ត្រូវបានបង្វែរទិសដៅ ក្រោយពីយន្តហោះ Boeing 737 របស់ក្រុមហ៊ុនMalindo Airlines បានចេញដំណើរ កាលពីល្ងាចថ្ងៃព្រហស្បតិ៍។
អ្នកនាំពាក្យព្រលានយន្តហោះលោក Prem Nath Thakur បានថ្លែងថា យន្តហោះនោះ បានបន្ថយល្បឿនចុះរត់លើផ្លូវនៅព្រលានយន្តហោះអន្តរជាតិ Tribhuvan នៅពេលពីឡុត ជួបបញ្ហា និងបញ្ឈប់ការហោះឡើងភ្លាម។
យន្តហោះនោះ បានរអិលចូលក្នុងស្មៅ និងបានជាប់ក្នុងភក់ នៅចម្ងាយប្រហែល៣០ម៉ែត្រពីផ្លូវយន្តហោះរត់។
លោក Thakur បានថ្លែងថាអ្នកដំណើរទាំងអស់មានសុវត្ថិភាព ដោយបន្ថែមទៀតថា មូលនៃបញ្ហានោះ មិនត្រូវបានដឹងភ្លាមៗនោះទេ៕ PSA
