ក្រុងស្រ៊ីណាហ្គារៈ ប៉ូលិសបានថ្លែងកាលពីថ្ងៃអាទិត្យថា យុទ្ធជន ៥ នាក់បានស្លាប់ នៅក្នុងការប្រយុទ្ធគ្នាមួយ នៅក្នុងតំបន់កាស្មៀរបានគ្រប់គ្រងដោយឥណ្ឌា ដោយបានបង្កឲ្យមានការប៉ះទង្គិចគ្នាជាច្រើនលើក រវាងកងកម្លាំងក្នុងតំបន់ និងរដ្ឋាភិបាលនៅក្នុងទឹកដីជម្លោះហិង្សានោះ។
ក្រុមឧទ្ទាមយ៉ាងតិច ៥០ នាក់ និងទាហាន ២៣ នាក់បានស្លាប់ ចាប់តាំងពីខែមេសាកន្លងទៅ នៅក្នុងការផ្ទុះអាវុធដាក់គ្នាទៅវិញទៅមក នៅក្នុងទឹកដីតំបន់កាស្មៀរបានគ្រប់គ្រងដោយក្រុងញូវដែលី និងនៅតាមបណ្តោយព្រំដែនបែងចែកទឹកដី នៅជួរភ្នំហិម៉ាល័យមានជម្លោះ រវាងប្រទេសក្បែរខាងឥណ្ឌា និងប៉ាគីស្ថាន ប្រដាប់ដោយអាវុធនុយក្លេអ៊ែរទាំង ២ នេះ។
ការប៉ះទង្គិចគ្នានោះ បានកើតឡើងត្រឹមតែមួយសប្តាហ៍ប៉ុណ្ណោះ ក្រោយពីមន្ត្រីស្ថានទូតប៉ាគីស្ថាន ២ រូប ត្រូវបានបណ្តេញចេញដោយក្រុងញូវដែលី ជុំវិញការចោទប្រកាន់ស៊ើបយកការណ៍។
មន្ត្រីរដ្ឋាភិបាលនិងក្នុងតំបន់បានថ្លែងថា ការផ្ទុះហិង្សាចុងក្រោយបំផុត បានចាប់ផ្តើមក្រោយពីទាហានឥណ្ឌា និងក្រុមប៉ូលិសប្រឆាំងឧទ្ទាម បានឡោមព័ទ្ធនៅម្តុំភូមិរីបាន់ នៅក្នុងតំបន់ជ្រលងភ្នំកាស្មៀរភាគខាងត្បូង កាលពីព្រឹកថ្ងៃអាទិត្យ ទៅលើក្រុមជនសង្ស័យ ដែលជាក្រុមឧទ្ទាមប្រដាប់ដោយអាវុធនៅក្នុងដៃ បានលាក់ខ្លួននៅក្នុងផ្ទះមួយ៕ SK