ក្រុងបូហ្គោតា៖ ប៉ូលិស និងទាហានកូឡុំប៊ី បានធ្វើការល្បាតនៅតាមដងផ្លូវនានានៃក្រុងបូហ្គោតាកាលពីថ្ងៃសៅរ៍ បន្ទាប់ពីបានដាក់បម្រាមគោចរណ៍នៅពេលយប់ដ៏កម្រមួយ ក្រោយពីមានការតវ៉ាទ្រង់ទ្រាយធំប្រឆាំងលោកប្រធានាធិបតី អ៊ីវ៉ាន ឌូគី បានក្លាយទៅជាអំពើហិង្សា។
ដោយជិះក្នុងរថយន្តពាសដែក ម៉ូតូ ជិះឧទ្ធម្ភាគចក្រ ឬ ដើរផង ទាហានប្រហែល ១៣ ពាន់នាក់ និងប៉ូលិសប្រឆាំងកុបកម្ម បានឃ្លាំមើលដោយប្រុងប្រយ័ត្ននៅក្នុងសង្កាត់ដែលងាយផ្ទុះហិង្សាមួយចំនួននៅក្នុងទីក្រុងដែលមានមនុស្សរស់នៅ ៧ លាននាក់ ជាទីដែលមានអំពើហិង្សា និងអំពើលួចប្លន់ទ្រព្យសម្បត្តិ បាននាំឲ្យមានការចាប់ខ្លួនមនុស្សប្រហែល ៣០០ នាក់។
លោក អ៊ីវ៉ាន់ ឌូគី ជាគោលដៅនៃការតវ៉ាទ្រង់ទ្រាយធំកាលពីថ្ងៃព្រហស្បតិ៍ របស់ក្រុមអ្នកតវ៉ាកូឡុំប៊ីរាប់សែននាក់បានថ្លែងថា៖ «ការល្បាតទាំងនេះ គឺជារឿងចាំបាច់ និងធានាឲ្យមានភាពស្ងប់ស្ងាត់នៅក្នុងទីក្រុងនេះ»។
លោក អ៊ីវ៉ាន់ ឌូគី មិនបានថ្លែងថា តើត្រូវឲ្យកងកម្លាំងប្រដាប់អាវុធទាំងនោះ បន្តល្បាតដល់ពេលណាទេ។
ទីក្រុងបូហ្គោតាមានឈ្មោះល្បីដោយសារចរាចរណ៍កកស្ទះយ៉ាងខ្លាំងរបស់ខ្លួន និងរថយន្តធុនធំ និងធុនតូចធ្វើចរាចរណ៍ឮលាន់សន្ធឹកទាំងយប់ទាំងថ្ងៃនោះ កំពុងក្លាយទៅជាសភាពស្ងប់ស្ងាត់បន្តិចម្តងៗកាលពីថ្ងៃសៅរ៍កន្លងទៅ។
ក្រុងនេះ ប្រៀបបីដូចជាទីក្រុងខ្មោច នៅពេលយប់ស្ងាត់ឈឹង ដោយសារតែបម្រាមគោចរណ៍នោះ៕ AFP/SK