រដ្ឋលេខាធិការមន្ទីរកងទ័ពជើងគោកអាមេរិកលោក Ryan McCarthy បានប្រាប់សមាជិកសភាអាមេរិកថាយ៉ាងហោចណាស់មនុស្ស ២៥ នាក់ គឺស្ថិតក្រោមការស៊ើបអង្កេតបទភេរវកម្ម ទាក់ទងនឹងការឡោមព័ទ្ធនិងសម្រុកចូលអគារសភាកាលពីថ្ងៃពុធសប្ដាហ៍មុន។
លោក John Crow ដែលជាសមាជិកគណៈកម្មាធិការកងប្រដាប់អាវុធនៃសភាតំណាង បាននិយាយថាលោកបានជួបលោក McCarthy តាមទូរស័ព្ទកាលពីថ្ងៃអាទិត្យ ហើយនិយាយថាការស៊ើបត្រូវបានបើកបន្ទាប់ពីអាជ្ញាធររកឃើញ កាំភ្លើងវែង ដបសាំង គ្រឿងផ្ទុះ និងខ្នោះប្លាស្ទិកនៅកន្លែងកើតហេតុ។
លោក McCarthy បានធានាថាក្រសួងការពារជាតិបានដឹងអំពី «ការគំរាមកំហែងដែលអាចកើតមានបន្ថែមទៀតដែលបង្កឡើងដោយបុគ្គលដែលអាចក្លាយជាភេរវករ» មុននិងនៅថ្ងៃទី ២០ ខែមករា ហើយបានបញ្ជាក់ថាក្រសួងការពារជាតិគឺកំពុងសហការជាមួយអាជ្ញាធរថ្នាក់ជាតិនិងថ្នាក់មូលដ្ឋានដើម្បីសម្របសម្រួលការត្រៀមសន្តិសុខ៕