កាលពីថ្ងៃអាទិត្យ ទី ៧ មីនា រដ្ឋមន្ត្រីការបរទេសចិន និងទីប្រឹក្សារដ្ឋលោក Wang Yi បានព្រមានសហរដ្ឋអាមេរិកកុំឱ្យជ្រៀតជ្រែកក្នុងកិច្ចការផ្ទៃក្នុងរបស់ប្រទេសផ្សេង ដែលនេះជាការព្រមានធំបំផុតរបស់ក្រុងប៉េកាំងចំពោះក្រុងវ៉ាស៊ីនតោនតាំងពីលោកប្រធានាធិបតី Joe Biden ចូលកាន់តំណែង។
ថ្លែងនៅក្នុងសន្និសីទសារព័ត៌មានប្រចាំឆ្នាំរបស់លោកនៅឯសម័យប្រជុំសមាជជាតិនៃប្រជាជន (NPC) លោក Wang Yi បានរិះគន់អាមេរិកថា «បានជ្រៀតជ្រែកដោយចេតនាក្នុងកិច្ចការផ្ទៃក្នុងរបស់ប្រទេសដទៃទៀតដោយសំអាងលើប្រជាធិបតេយ្យ និងសិទ្ធិមនុស្ស» ហើយសកម្មភាពបែបនេះបង្កើតឱ្យមាន «បញ្ហាជាច្រើននៅលើពិភពលោក និងក្នុងករណីខ្លះបង្កភាពច្របូកច្របល់ និងជម្លោះ»។
លោក Wang Yi បានបន្តទៀតថា៖ «វាជាការសំខាន់ណាស់ដែលសហរដ្ឋអាមេរិកទទួលស្គាល់រឿងនេះឱ្យបានឆាប់បំផុត។ បើមិនដូច្នោះទេពិភពលោកនឹងនៅឆ្ងាយពីការក្លាយទៅជាកន្លែងស្ងប់ស្ងាត់»។
ស្របពេលជាមួយការរិះគន់នេះលោក Wang Yi បានរំឭកឡើងវិញនូវឆន្ទៈរបស់ចិនក្នុងការធ្វើការជាមួយសហរដ្ឋអាមេរិក ដើម្បីដោះស្រាយការព្រួយបារម្ភរួម ដូចជាបញ្ហាសេដ្ឋកិច្ចពិភពលោក និងការប្រែប្រួលអាកាសធាតុ។
លោក Wang Yi ក៏បានថ្លែងទាក់ទងទៅនឹងចំណុចក្ដៅមួយចំនួនក្នុងទំនាក់ទំនងរវាងចិន និងអាមេរិក ដូចជាបញ្ហាកោះតៃវ៉ាន់ បញ្ហានយោបាយនៅហុងកុង និងបញ្ហាសិទ្ធិមនុស្សនៅខេត្តស៊ីនជាំងផងដែរ។
លោក Wang Yi បានជំរុញឱ្យរដ្ឋបាលលោក Biden បញ្ឈប់ «ការអនុវត្តប្រកបដោយគ្រោះថ្នាក់» របស់រដ្ឋបាលប្រធានាធិបតី Donald Trump ហើយព្រមានថា គោលការណ៍ចិនតែមួយគឺជា «ខ្សែក្រហមមួយដែលមិនគួរឆ្លង»។
លោក Wang Yi បាននិយាយទៀតថា៖ «រដ្ឋាភិបាលចិនមិនមានកន្លែងសម្រាប់ការសម្របសម្រួល ឬលះបង់លើបញ្ហាតៃវ៉ាន់ឡើយ។ យើងទទូចឱ្យរដ្ឋបាលសហរដ្ឋអាមេរិកថ្មីស្វែងយល់ឱ្យបានពេញលេញពីភាពរសើបយ៉ាងខ្ពស់នៃបញ្ហាតៃវ៉ាន់»។
សហរដ្ឋអាមេរិកមិនមានទំនាក់ទំនងការទូតជាផ្លូវការជាមួយនឹងកោះតៃវ៉ាន់ទេ តាំងពីការផ្ទេរការទទួលស្គាល់ការទូតពីក្រុងតៃប៉ិ ទៅប៉េកាំងនៅឆ្នាំ ១៩៧៩ ប៉ុន្តែនៅរក្សាទំនាក់ទំនងក្រៅផ្លូវការដ៏ទូលំទូលាយ។ លោក Trump បានបង្កភាពតានតឹងជាមួយចិន ពេលដែលលោកបញ្ជូនសមាជិកគណៈរដ្ឋមន្ត្រី ១ រូប ទៅកាន់កោះតៃវ៉ាន់ ដើម្បីបង្ហាញការគាំទ្ររបស់សហរដ្ឋអាមេរិក។
លោក Biden បាននិយាយថា លោកចង់បានទំនាក់ទំនងស៊ីវិល័យជាមួយចិន តែមិនបានបង្ហាញថា លោកនឹងដកគោលនយោបាយប្រឈមដាក់គ្នាជាមួយចិនរបស់លោក Trump ទេ។ រដ្ឋបាល Biden និងក្រសួងការបរទេសអាមេរិកបានបង្ហាញថា ពួកគេប្រកាន់ជំហរគាំទ្រកោះតៃវ៉ាន់ ហើយឈរជាមួយសម្ព័ន្ធមិត្តក្នុងតំបន់។
នៅថ្ងៃអាទិត្យដដែល ក្រសួងការបរទេសអាមេរិកបាននិយាយក្នុងសេចក្ដីថ្លែងការណ៍មួយថា៖ «យើងទទូចឱ្យទីក្រុងប៉េកាំងបញ្ឈប់ការដាក់សម្ពាធយោធាការទូត និងសេដ្ឋកិច្ចលើតៃវ៉ាន់ ហើយចូលរួមក្នុងកិច្ចពិភាក្សាប្រកបដោយអត្ថន័យជាមួយតំណាងរបស់តៃវ៉ាន់ ដែលជាប់ឆ្នោតតាមបែបប្រជាធិបតេយ្យ»។
លោក Wang Yi មិនបានបង្ហាញថា ទីក្រុងប៉េកាំងអាចមានប្រតិកម្មយ៉ាងណាទេ ប្រសិនបើលោក Biden មិនផ្លាស់ប្ដូរទិសដៅ ប៉ុន្តែគណបក្សកុម្មុយនីស្តចិនបានគំរាមធ្វើការបង្រួបបង្រួមជាមួយកោះតៃវ៉ាន់ដោយប្រើប្រាស់យោធាប្រសិនបើក្រុងតៃប៉ិ ប្រកាសឯករាជ្យជាផ្លូវការ ឬពន្យារពេលការជជែកពីការរួបរួម។
លោក Wang Yi បានការពារការធ្វើកំណែទម្រង់ប្រព័ន្ធបោះឆ្នោតនៅហុងកុង ដែលត្រូវបង្ហាញជាសាធារណៈក្នុងអំឡុងពេលសម័យប្រជុំ NPC។ លោកបាននិយាយថា កំណែទម្រង់នេះ នឹងរួមចំណែកដល់ស្ថិរភាពរយៈពេលវែង និងនាំមកនូវ ««អនាគតដ៏ភ្លឺស្វាង» សម្រាប់ទីក្រុងនេះ។ អ្នករិះគន់បាននិយាយថា កំណែទម្រង់នេះ នឹងធ្វើឱ្យមានការប៉ះពាល់ដល់ភាពឯករាជ្យនៃអភិបាលកិច្ចរបស់ហុងកុង ដែលចែងក្នុងក្របខ័ណ្ឌ «ប្រទេស ១ ប្រព័ន្ធ ២» ដែលចិនបានយល់ព្រមជាមួយនឹងអំណាចអាណានិគមអង់គ្លេស។
ក្នុងសន្និសីទកាសែតដដែលលោក Wang Yi បានច្រានចោលការចោទប្រកាន់ថា ការរំលោភសិទ្ធិមនុស្សបានកើតឡើងនៅខេត្តស៊ីនជាំង។ ក្រុមសកម្មជនសិទ្ធិមនុស្ស និងអ្នកជំនាញអង្គការសហប្រជាជាតិបាននិយាយថា យ៉ាងហោចណាស់ជនជាតិភាគតិចមូស្លីមអ៊ុយហ្គ័រ ១ លាននាក់ ត្រូវបានឃុំខ្លួនក្នុងជំរំអប់រំឡើងវិញ។ ចិនបដិសេធថា មិនមានការរំលោភសិទ្ធិកើតឡើងនៅជំរំទាំងនេះទេ ហើយនិយាយថា ជំរំផ្តល់ការបណ្ដុះបណ្ដាលវិជ្ជាជីវៈ ហើយត្រូវការដើម្បីប្រយុទ្ធប្រឆាំងនឹងភាពជ្រុលនិយម៕