រដ្ឋមន្ត្រីការបរទេសអាមេរិកលោក Mike Pompeo បានបដិសេធមិនទទួលស្គាល់ជ័យជម្នះនៃការបោះឆ្នោតប្រធានាធិបតីរបស់បេក្ខជនបក្សប្រជាធិបតេយ្យលោក Joe Biden ដោយបានលើកឡើងថា នីតិវិធីនៃការបោះឆ្នោតនៅមិនទាន់ចប់នៅឡើយ។ លោក Mike Pompeo បាននិយាយថា៖ «នឹងមានការបន្តដោយរលូនទៅរដ្ឋបាល Trump អាណត្តិទី២»។
លោក Pompeo បានលើកឡើងបែបនេះ កាលពីថ្ងៃទី ១០ វិច្ឆិកា នៅក្នុងសន្និសីទកាសែតមួយ។ អ្នកសារព័ត៌មាន Fox News បានសួរលោក Pompeo ថា៖ «តើបច្ចុប្បន្ននេះក្រសួងការបរទេសកំពុងរៀបចំធ្វើសហប្រតិបត្តិការជាមួយក្រុមរៀបចំការផ្ទេរអំណាចរបស់លោក Joe Biden ដែរឬទេ? ហើយបើទេ តើដល់ចំណុចណា ដែលការពន្យារនេះ អាចធ្វើឱ្យមានការប៉ះពាល់ដល់ការផ្ទេរអំណាចដោយរលូន ឬអាចធ្វើឱ្យមានហានិភ័យដល់សន្តិសុខជាតិ?»។
ទាក់ទងនឹងការចោទប្រកាន់របស់លោក Trump ថា មានការក្លែងសន្លឹកឆ្នោត លោក Pompeo បាននិយាយថា៖ «ខ្ញុំមានជំនឿចិត្តយ៉ាងមុតមាំថា យើងនឹងរាប់ ហើយយើងត្រូវរាប់ទាំងអស់នូវសន្លឹកឆ្នោតស្របច្បាប់។
យើងត្រូវតែធ្វើឱ្យប្រាកដថា សន្លឹកឆ្នោតដែលមិនស្របច្បាប់ គឺមិនត្រូវបានរាប់បញ្ចូលទេ។ វាបន្សាបសំឡេងឆ្នោតរបស់អ្នក បើសិនធ្វើមិនត្រឹមត្រូវ»។
ដោយឡែកអ្នកសារព័ត៌មាន Reuters ម្នាក់ក៏បានសួរលោក Pompeo ថា៖ «តើការណែនាំបែបណាដែលអ្នកផ្ដល់ឱ្យអ្នកការទូតអាមេរិកអំពីរបៀបបកស្រាយលទ្ធផលនៃការបោះឆ្នោតប្រធានាធិបតី?»។
អ្នកសារព័ត៌មានម្នាក់នោះបន្ថែមទៀតថា៖ «ក្រសួងនេះបានផ្ញើសេចក្ដីថ្លែងការណ៍ជាញឹកញាប់ ដើម្បីជំរុញឱ្យមានការបោះឆ្នោតដោយសេរី និងយុត្តិធម៌នៅបរទេស ហើយជំរុញអ្នកចាញ់នៃការបោះឆ្នោតទាំងនោះ ឱ្យទទួលយកលទ្ធផល។ តើការបដិសេធរបស់លោកប្រធានាធិបតី Trump ចំពោះការទទួលយកការចុះចាញ់នោះធ្វើឱ្យខូចខាតកិច្ចខិតខំប្រឹងប្រែងទាំងនោះ មែនឬទេ?»។
លោក Pompeo បានឆ្លើយថា៖ «វាមិនសមហេតុផល.. ហើយអ្នកក៏ដឹងថា វាមិនសមហេតុផល ហើយអ្នកសួរវាដោយអ្នកដឹងថា វាមិនសមហេតុផល»។ លោក Pompeo បន្តថា ក្រសួងការបរទេសរបស់លោកយកចិត្តទុកដាក់ខ្លាំងណាស់ ក្នុងការធានាថា ការបោះឆ្នោតនៅជុំវិញពិភពលោកប្រព្រឹត្តទៅដោយសុវត្ថិភាព សន្តិសុខ សេរី និងយុត្តិធម៌ ហើយមន្ត្រីរបស់យើងបានដាក់ជីវិត ដើម្បីធានាឱ្យមានការប្រព្រឹត្តទៅបែបនេះ»។
ការអត្ថាធិប្បាយរបស់លោក Pompeo អស់ទាំងនេះ គឺបញ្ជាក់ថា លោកមានទំនោរដូចលោក Trump ដែលបានអះអាងថា បក្សប្រជាធិបតេយ្យបានលួចដណ្ដើមយកជ័យជម្នះរបស់លោកតាមរយៈការក្លែងសន្លឹកឆ្នោតផ្ញើតាមប្រអប់សំបុត្រ ហើយក៏បញ្ជាក់ដែរថា លោក Pompeo មានការជឿជាក់លើការតវ៉ាលទ្ធផលបោះឆ្នោតរបស់លោក Trump។
ទាក់ទងនឹងសម្តីរបស់លោក Pompeo អតីតទីប្រឹក្សាសន្តិសុខជាតិ ដែលលោក ត្រាំ បានបណ្តេញចេញគឺលោក John Bolton បាននិយាយនៅលើទូរទស្សន៍ CNN ថា៖ «ខ្ញុំគិតថាវាមិនសមហេតុផល ដែល Mike (Pompeo) បាននិយាយបែបនេះ។ ខ្ញុំគិតថាលោកបានបំផ្លាញទំនុកចិត្តចំពោះលោកនៅលើឆាកអន្តរជាតិ ដោយសារខ្ញុំគិតថា មានមនុស្សតិចណាស់ សូម្បីតែនៅក្នុងរដ្ឋាភិបាលអាមេរិកដែលជឿជាក់ថា មានរឿងនេះកើតឡើង»។
លោក Bolton បានបន្តទៀតថា៖ «ខ្ញុំមិនដឹងថា ហេតុអ្វីបានជាលោកគិតថា ត្រូវការធ្វើសេចក្ដីថ្លែងការណ៍នេះទេ។ ប្រហែលជាលោកចង់ចៀសវាងពីការបណ្ដេញចេញដូចអ្នកដទៃទៀត ដែលត្រូវបានគេបណ្ដេញចេញនៅក្នុងរដ្ឋបាលនេះ។ តែសេចក្ដីថ្លែងការណ៍នេះ គឺមិនសមហេតុផល»។
គួរបញ្ជាក់ថា លោក Trump បានដាក់ពាក្យបណ្ដឹងតវ៉ាសន្លឹកឆ្នោតទៅកាន់តុលាការនៃរដ្ឋ Swing State ចំនួន ៥ ដែលរួមមាន Arizona, Georgia, Michigan, Nevada, និង Pennsylvania ដែលសុទ្ធតែជារដ្ឋលោក Biden បាននាំមុខសំឡេងឆ្នោត។
លោក Trump បានចាញ់រឿងក្ដីនៅរដ្ឋ Georgia និង Michigan។ អ្នកវិភាគមួយចំនួនបានយល់ឃើញថា លោកនឹងចាញ់រឿងក្ដីទាំងអស់នេះ ដោយសារលោកខ្វះភ័ស្តុតាងច្បាស់លាស់ សាក្សីទុកចិត្តបាន និងយុទ្ធសាស្ត្រច្បាស់លាស់ ហើយបើសិនឈ្នះក៏មិនប៉ះពាល់ដល់លទ្ធផលបោះឆ្នោតផងដែរ។
រីឯលោក Biden វិញបានត្រូវអង្គភាព AP និង Fox News រាយការណ៍ថា បានទទួលអង្គបោះឆ្នោតចំនួន ២៩០ គ្រប់គ្រាន់សម្រាប់ទទួលជ័យជម្នះ។ តួលេខនេះ អាចកើនឡើងរហូតដល់ ៣០៦ បើសិនលោក Biden រក្សាការនាំមុខសំឡេងនៅរដ្ឋ Georgia ក្រោយពីការរាប់សន្លឹកឆ្នោតសាឡើងវិញត្រូវបានបញ្ចប់។
យ៉ាងណាមិញដំណើរការផ្ទេរអំណាច គឺជាដំណើរការមួយដែលស្ថាប័នរដ្ឋាភិបាលអាមេរិកត្រូវធ្វើការសហការជាមួយនឹងបេក្ខជនប្រធានាធិបតីដែលទទួលជ័យជម្នះ តាមរយៈការផ្ដល់ព័ត៌មានសំខាន់ៗជារៀងរាល់ថ្ងៃ សម្រាប់ត្រៀមខ្លួនចូលកាន់អំណាច។ ក្នុងដំណើរការនេះហើយដែលបេក្ខជននីមួយៗ អាចរៀបចំផែនការសម្រាប់រដ្ឋបាលរបស់ពួកគេ៕