ក្រុងសេអ៊ូលៈ រដ្ឋមន្ត្រីបង្រួបបង្រួមកូរ៉េខាងត្បូង បានចេញដំណើរទៅអាមេរិកនៅថ្ងៃអង្គារនេះ ដើម្បីបំពេញទស្សនកិច្ច៥ថ្ងៃស្របពេលមានសង្ស័យជុំវិញលទ្ធភាពខ្វែងគំនិតគ្នារវាងសម្ព័ន្ធមិត្តទាំងពីរទៅលើរបៀបដើម្បីឈានដល់ការលុបបំបាត់អាវុធនុយក្លេអ៊ែររបស់កូរ៉េខាងជើង។
ក្រសួងនោះ បានឲ្យដឹងថា លោករដ្ឋមន្ត្រី Cho Myoung-gyon គ្រោងជួបលោករដ្ឋមន្ត្រីការបរទេសម៉ៃក៍ប៉ុមប៉េអូ និងមន្ត្រីដទៃទៀត និងក្រុមអ្នកជំនាញដើម្បីពិភាក្សាអំពីបញ្ហាលុបបំបាត់អាវុធនុយក្លេអ៊ែររបស់កូរ៉េខាងជើង និងទំនាក់ទំនងអន្តរកូរ៉េ។
លោក Cho បានថ្លែងប្រាប់ក្រុមអ្នកកាសែតនៅមុនឡើងយន្តហោះទៅអាមេរិកនៅព្រលានអន្តរជាតិ Incheon នៅខាងលិចក្រុងសេអ៊ូលថា៖«នេះគឺជាដំណើរទស្សនកិច្ចដ៏មានអត្ថន័យមួយ ដែលបានកើតឡើងចំពេលវេលាដ៏សំខាន់នេះ»។
លោក បានបន្ថែមថា៖«នៅក្នុងក្រុងវ៉ាស៊ីនតោន និងក្រុងញូវយ៉ក ខ្ញុំនឹងជួបក្រុមរដ្ឋាភិបាល និងសភា និងអ្នកជំនាញជាច្រើនទៀត ដើម្បីពិភាក្សាអំពីការលុបបំបាត់អាវុធនុយក្លេអ៊ែរនៅឧបទ្វីបកូរ៉េ និងការបង្កើតសន្តិភាពនៅឧបទ្វីបនេះ»៕ Yonhap/PSA