.jpg)
លោក ប្រធានាធិបតី Donald Trump (ស្តាំ) លោករដ្ឋមន្ត្រីយុត្តិធម៌ William Barr។ AFP
រដ្ឋអាជ្ញាជាន់ខ្ពស់ទទួលបន្ទុកខាងឧក្រិដ្ឋកម្មពាក់ព័ន្ធនឹងការបោះឆ្នោត លោក Richard Pilger បានលាឈប់ពីតំណែងកាលពីថ្ងៃចន្ទ ទី ៩ វិច្ឆិកា បន្ទាប់ពីមានបញ្ជាពីរដ្ឋមន្ត្រីក្រសួងយុត្តិធម៌សហរដ្ឋអាមេរិកលោក William Barr ឱ្យរដ្ឋអាជ្ញាសហព័ន្ធធ្វើការស៊ើបអង្កេតលើការចោទប្រកាន់រឿងលួចបន្លំសន្លឹកឆ្នោតឱ្យរួចរាល់មុនពេលប្រកាសលទ្ធផលបោះឆ្នោតជាផ្លូវការនាពេលខាងមុខ។
លោក Pilger ប្រធានផ្នែកឧក្រិដ្ឋកម្មពាក់ព័ន្ធនឹងការបោះឆ្នោតនៃនាយកដ្ឋានសុចរិតភាពសាធារណ:នៃក្រសួងយុត្តិធម៌បានផ្ញើអ៊ីមែលប្រាប់សហការីរបស់លោកថា រដ្ឋមន្ត្រីក្រសួងយុត្តិធម៌បានដាក់គោលការណ៍ថ្មីដ៏សំខាន់មួយឱ្យរដ្ឋអាជ្ញាធ្វើការស៊ើបអង្កេតជាបន្ទាន់លើករណីលួចបន្លំសន្លឹកឆ្នោត ដែលជារឿងមិនធ្លាប់កើតមានឡើងក្នុងរយពេលជិត ៤០ ឆ្នាំមកនេះ ដោយបានបញ្ជាឱ្យបញ្ចប់ការងារនេះ មុនពេលដែលលទ្ធផលបោះឆ្នោតត្រូវបានផ្ទៀងផ្ទាត់ចប់សព្វគ្រប់ និងបិទការតវ៉ា។
លោកបានផ្ញើអ៊ីមែលនេះទៅមិត្តរួមការងារដោយភ្ជាប់ជាមួយនូវលិខិតលាលែងពីតំណែងរបស់លោក។ ទោះយ៉ាងណាក្តី លោក Pilger នៅតែមានតំណែងជារដ្ឋអាជ្ញានៅក្នុងអង្គភាពស៊ើបអង្កេតអំពើពុករលួយសាធារណ:ដដែល។
បញ្ជារបស់លោក Barr ឱ្យស៊ើបអង្កេតលើការលួចបន្លំសន្លឹកឆ្នោតនេះ ធ្វើឡើងដោយមិនបានផ្តល់ភ័ស្តុតាងណាមួយ ដើម្បីគាំទ្រការអះអាងរបស់លោក Trump ដែលថា មានការក្លែងបន្លំដ៏ធំនៅក្នុងការបោះឆ្នោត កាលពីសប្ដាហ៍មុនឡើយ។
លោកគ្រាន់តែសរសេរសារដោយក្រអឺតក្រទមមួយទៅកាន់រដ្ឋអាជ្ញាទាំងអស់ថា ពួកគេត្រូវចាត់វិធានការស៊ើបអង្កេត ដូចជាការសម្ភាសសាក្សីជាដើម ដែលជាធម្មតាមុននឹងអាចធ្វើកិច្ចសម្ភាសន៍បែបនេះបាន ពួកគេត្រូវសុំការអនុញ្ញាតពីផ្នែកឧក្រិដ្ឋកម្មពាក់ព័ន្ធនឹងការបោះឆ្នោតជាមុនសិន។ យ៉ាងណាក៏ដោយ គោលការណ៍ដែលដាក់ចេញទៅនេះ នឹងមិនមានឥទ្ធិពលជាដុំកំភួនទៅលើសំឡេងឆ្នោតនោះទេ ព្រោះលោក Donald Trump ទទួលបានសំឡេងតិចជាងលោក Joe Biden រាប់សិបម៉ឺនសំឡេងឯណោះ នៅក្នុងរដ្ឋសំខាន់ៗមួយចំនួន។
សមាជិកព្រឹទ្ធសភាអាមេរិក លោកស្រី Elizabeth Warren បាននិយាយកាលពីយប់ថ្ងៃចន្ទ ថា៖ «លោក Barr គឺជាមេខ្លោងពុករលួយរបស់លោកTrump ដែលគួរតែត្រូវបានដកតំណែងតាំងពីប៉ុន្មានខែមុនឯណោះ»។
ទោះបីពេលនេះ មិនមែនជាកាល:ទេស:សម្រាប់ដកតំណែងមន្ត្រីរូបណាក៏ដោយ ប៉ុន្តែការចោទប្រកាន់មិនស្របច្បាប់ដែលរដ្ឋមន្ត្រីក្រសួងយុត្តិធម៌រូបនេះបានធ្វើឡើង គឺបង្កឱ្យមានការមិនពេញចិត្តយ៉ាងខ្លាំង សូម្បីតែប្រធានក្រុមសំឡេងភាគច្រើននៅក្នុងព្រឹទ្ធសភាមកពីគណបក្សសាធារណរដ្ឋលោក Mitch McConnell និងសមាជិកគណបក្សសាធារណរដ្ឋ ក៏គាំទ្រឱ្យលោក Barr ចុះចេញពីតំណែងដែរ ព្រោះពួកគេទ្រាំលែងបានចំពោះការរំលោភបំពាន និងការប្រើប្រាស់អំណាចទឹកប្រាក់របស់លោក Barr ទៅលើពួកគេ។
គិតត្រឹមថ្ងៃទី ១១ វិច្ឆិកា នេះ តុលាការរដ្ឋសហព័ន្ធ និងរដ្ឋនានា បានទទួលពាក្យបណ្ដឹងជាប់ពាក់ព័ន្ធនឹងការក្លែងបន្លំសន្លឹកឆ្នោតយ៉ាងហោចណាស់ ១៧ ករណី ដែលមានភាពស្រដៀងៗគ្នា ដែលប្តឹងដោយយុទ្ធនាការដាក់ពាក្យបណ្តឹងប្រឆាំងការក្លែងបន្លំសន្លឹកឆ្នោតរបស់លោក Trump។ ការចោទប្រកាន់ទាំងអស់នោះ រួមបញ្ចូលការចោទប្រកាន់ដែលថា អ្នកសង្កេតការណ៍បោះឆ្នោតរបស់លោក Trump មិនមានសិទ្ធិចូលរួមអង្កេតនៅពេលគេកំពុងរាប់សន្លឹកឆ្នោត ឬសន្លឹកឆ្នោតផ្ញើតាមអ៊ីមែលត្រូវបានគេក្លែងបន្លំជាដើម។
ថ្មីៗនេះដែរ យុទ្ធនាការរបស់លោក Trump បានចោទប្រកាន់ថា មានសន្លឹកឆ្នោត ៤ សន្លឹកត្រូវបានបោះដោយមនុស្សដែលបានស្លាប់បាត់ទៅហើយ នៅក្នុងរដ្ឋ Georgia ហើយស្នើឱ្យមានការពិនិត្យលើករណីនេះឡើងវិញឱ្យបានហ្មត់ចត់បំផុត។ ជាមួយគ្នានេះដែរ រដ្ឋ Georgia បានប្រកាសថា នឹងដំណើរការរាប់សន្លឹកឆ្នោតនៅក្នុងរដ្ឋនេះឡើងវិញ ដោយដៃផងដែរ។
នៅក្នុងសន្និសីទកាសែតមួយនៅថ្ងៃពុធ លោក Tim-Murtagh ប្រធានផ្នែកទំនាក់ទំនងនៃយុទ្ធនាការរបស់លោក Trump បាននិយាយថា៖ «ទស្សន:នៃយុទ្ធនាការរបស់លោក Trump គឺថា ការបោះឆ្នោតនេះ នៅមិនទាន់ចប់នៅឡើយទេ»៕
សៅ សម្ភស្ស
