ក្រុងបាងកក៖ រដ្ឋាភិបាលបានព្រមានកាលពីថ្ងៃសៅរ៍ថា ប្រជាជនថៃមិនបានអនុវត្តវិធានការនៅឲ្យឆ្ងាយពីគ្នានោះនាំឲ្យឆ្លងរីករាលដាលជំងឺកូវីដ ១៩ ដែលគិតមកត្រឹមកាលពីថ្ងៃសៅរ៍ បានកើនឡើងចំនួនអ្នកឆ្លងសរុបដល់ ១ ២៤៥ នាក់ និង ៦ នាក់ផ្សេងទៀតបានស្លាប់ ដោយសារមេរោគកូរ៉ូណាប្រភេទថ្មីនេះ។
អ្នកនាំពាក្យមជ្ឈមណ្ឌលគ្រប់គ្រងជំងឺកូវីដ ១៩ លោក តាវីស៊ីន វីសាណុយូធីន បានថ្លែងថា ទោះបីជាមានការប្រកាសព្រះរាជក្រឹត្យឲ្យដាក់ប្រទេសក្នុងគ្រាអាសន្នក្តី ក៏ប្រជាជនថៃ មិនបានអនុវត្តជាមួយវិធានការ ដើម្បីទប់ស្កាត់ការឆ្លងរីករាលដាលវីរុសផ្លូវដង្ហើមប្រភេទថ្មីនោះទេ ខណៈចំនួនករណីឆ្លងថ្មីបានបន្តកើនឡើងនៅក្នុងប្រទេសនេះ។
លោក តាវីស៊ីន វីសាណុយូធីន បានធ្វើសុន្ទរកថា កាលពីថ្ងៃសៅរ៍ ក្រោយពីកិច្ចប្រជុំ ១ ក្រោមអធិបតីភាពរបស់លោកនាយករដ្ឋមន្ត្រី ប្រាយុធ។
លោកបានថ្លែងថា ខ្លួនបានឯកភាពឲ្យមានការគ្រប់គ្រងជំងឺទៅតាមសមត្ថភាព ត្រូវបានចាត់វិធានការតាមរយៈការកាត់បន្ថយមិនឲ្យមានការឆ្លងរីករាលដាលតទៅទៀត។
លោក តាវីស៊ីន បានថ្លែងថា៖ «ប៉ុន្តែការកើនឡើងតួលេខបានបង្ហាញថា ប្រជាជនថៃនៅតែមិនសហការឲ្យបានគ្រប់គ្រាន់។
ដោយបានលើកឡើងពីតួលេខទាំងនោះ លោកបានថ្លែងថា ប្រជាជន ៧០ ភាគរយ បានសហការ ករណីថ្មីនឹងបន្តកើនឡើង។ បើមានប្រជាជន ៨០ ភាគរយ សហការតួលេខនឹងថយចុះជាបណ្តើរៗ ហើយបើប្រជាជន ៩០ ភាគរយ សហការវិញនោះ តួលេខនេះនឹងកាន់តែធ្លាក់ចុះថែមទៀត៕ BKP/SK