កាលពីថ្ងៃពុធ ទី២៧ មករា រដ្ឋាភិបាលអាមេរិកបានព្រមានថា សហរដ្ឋអាមេរិកអាចប្រឈមមុខនឹងអំពើហិង្សាជ្រុលនិយម បន្ទាប់ពីធ្លាប់មានការវាយលុកនៅកាពីតូលកាលពីដើមខែមករា។
ក្រសួងសន្តិសុខជាតិអាមេរិកបាននិយាយថា ព័ត៌មានបានបង្ហាញពីមនោគមន៍វិជ្ជាមួយចំនួនដែលជំរុញឱ្យមានក្រុមជ្រុលនិយមហិង្សាមានការជំទាស់ទៅនឹងការអនុវត្តសិទ្ធិអំណាចរដ្ឋាភិបាល និងការផ្លាស់ប្តូរប្រធានាធិបតី។
ក្រៅពីការផ្ទេរសិទ្ធិអំណាចប្រធានាធិបតីក៏មានការយល់ឃើញផ្សេងទៀតអំពីការជំរុញដោយអត្ថបទមិនពិត ដែលធ្វើឱ្យមានការញុះញង់ឱ្យប្រព្រឹត្តអំពើហិង្សា។
ការព្រមាននេះមិនមានការបញ្ជាក់ឈ្មោះក្រុមណាជាក់លាក់ ដែលអាចស្ថិតនៅពីក្រោយការវាយប្រហារនាពេលអនាគតនោះទេ។ ប៉ុន្តែការព្រមាននេះបានបញ្ជាក់យ៉ាងច្បាស់ថា មានការលើកទឹកចិត្តក្នុងការបង្កឱ្យមានអំពើហិង្សាណាមួយដោយសារការមិនពេញចិត្តនឹងការផ្លាស់ប្តូរប្រធានាធិបតីកាលពីពេលថ្មីៗនេះ។ ការព្រមាននេះជាការជូនដំណឹងអំពីការវាយប្រហារណាមួយដែលអាចកើតមានឡើងមិនមែនបញ្ជាក់ពីការវាយប្រហារណាមួយនាពេលអនាគតឡើយ។
កាលពីថ្ងៃទី ២៧ មករា មន្ត្រីស៊ើបការណ៍សម្ងាត់ម្នាក់ដែលពាក់ព័ន្ធនឹងសេចក្តីប្រកាសនេះបាននិយាយថា ការសម្រេចចិត្តចេញសេចក្តីថ្លែងការណ៍នេះត្រូវបានជំរុញដោយការសន្និដ្ឋានរបស់ក្រសួង។
ក្រសួងបានសន្និដ្ឋានថា ការឡើងកាន់តំណែងរបស់លោក Joe Biden អាចធ្វើឱ្យក្រុមជ្រុលនិយមយល់ឃើញថា មានភាពមិនសុក្រឹតនៅពេលបោះឆ្នោត។ ក្រសួងក៏បានលើកឡើងពីការរើសអើងជាតិសាសន៍ដែលមានជាយូរមកហើយរាប់បញ្ចូលទាំងការប្រឆាំងនឹងការធ្វើអន្តោប្រវេសន៍ចូលក្នុងប្រទេសអាមេរិកដែលអាចនាំឱ្យមានការមិនពេញចិត្តពីសំណាក់ក្រុមជ្រុលនិយម។
ក្រសួងខាងលើបានព្រមានថា ការវាយលុកនៅវិមានកាពីតូលអាចជំរុញឱ្យក្រុមជ្រុលនិយមក្នុងស្រុកវាយប្រហារទៅលើមន្ត្រីជាប់ឆ្នោតឬអគាររដ្ឋាភិបាលផ្សេងទៀត។ ក្រសួងជាធម្មតាចេញសេចក្តីប្រកាសតែ ១ ឬ ២ ប៉ុណ្ណោះក្នុង ១ ឆ្នាំ។ សេចក្តីប្រកាសភាគច្រើនបានព្រមានពីការគំរាមកំហែងពីក្រុមភេរវករបរទេស។
មន្ត្រីស៊ើបការណ៍សម្ងាត់ម្នាក់មិនបញ្ចេញឈ្មោះបាននិយាយទាក់ទងនឹងសេចក្តីប្រកាសនេះថា ការព្រមានជាសាធារណៈនេះគួរតែត្រូវបានប្រកាសនៅដើមខែវិច្ឆិកា ឆ្នាំ ២០២០។ នៅពេលដែលលោក Trump កំពុងធ្វើការចោទប្រកាន់ពីការបោះឆ្នោត ហើយក្រុមស្តាំនិយមនៅតែជឿទៅលើព័ត៌មានមិនពិតនេះ។
កាលពីលោក Trump បានចោទប្រកាន់ថា ការបោះឆ្នោតអាណត្តិនេះមានការក្លែងបន្លំសន្លឹកឆ្នោតលោកក៏បានព្យាយាមបណ្តេញមន្ត្រីក្រសួងមួយចំនួនដែលលោកគិតថាមិននៅខាងលោក។ នេះរាប់បញ្ចូលទាំងលោកChristopher Krebs ប្រធានទីភ្នាក់ងារសន្តិសុខតាមអ៊ីនធឺណិតបន្ទាប់ពីគណៈកម្មាធិការត្រួតពិនិត្យការបោះឆ្នោតបានប្រកាសថា ការបោះឆ្នោតនេះមិនមានការក្លែងបន្លំសន្លឹកឆ្នោត។ ទីភ្នាក់ងារនេះមិនបានចេញការព្រមានណាមួយទៅកាន់ទីភ្នាក់ងារ និងរដ្ឋពីអំពើហិង្សាដែលអាចកើតមានឡើង។
អស់រយៈពេលជាច្រើនទសវត្សរ៍មកហើយដែលគណបក្សសាធារណរដ្ឋ និងអង្គជំនុំជម្រះសំឡេងខាងស្តាំនិយមនិយាយថា អ្នកប្រជាធិបតេយ្យជាការគំរាមកំហែង និងជាគូប្រជែងនយោបាយ៕