ក្រុងទ្រីប៉ូលី៖ រដ្ឋាភិបាលទទួលស្គាល់ដោយអង្គការសហប្រជាជាតិនៅលីប៊ី កាលពីថ្ងៃអាទិត្យបានថ្កោលទោសការលួចឆ្មក់វាយប្រហារផ្លូវអាកាសនៅពេលយប់ ប្រឆាំងការដណ្តើមកាន់កាប់មូលដ្ឋានទ័ពអាកាសយុទ្ធសាស្ត្រមកគ្រប់គ្រងវិញ នៅក្នុងប្រទេសលីប៊ីភាគខាងលិច ដោយបានចោទប្រកាន់ពួកគេពីបទបើកការវាយប្រហារដោយ «កងកម្លាំងទ័ពអាកាសបរទេស» នៅទីនោះ។
កងកម្លាំងស្មោះត្រង់ជាមួយរដ្ឋាភិបាលបង្រួបបង្រួមជាតិ (GNA) បានដណ្តើមយកមូលដ្ឋានទ័ពអាកាស អាល់វ៉ាទីយ៉ា ដែលមានចម្ងាយ ១៤០ គីឡូម៉ែត្រពីទីក្រុងទ្រីប៉ូលីភាគនិរតី ពីកងកម្លាំងសម្ព័ន្ធមិត្តរបស់បុរសខ្លាំងហ្គាលីហ្វា ហាហ្វតារភាគខាងកើត មកកាន់កាប់ និងគ្រប់គ្រងវិញ។
កងកម្លាំងរបស់លោក ហ្គាលីហ្វា ហាហ្វតារ បានចោទប្រកាន់ប្រទេសតួកគី ជាអ្នកគាំទ្រកងកម្លាំង GNA យ៉ាងសំខាន់បានប្រើប្រាស់មូលដ្ឋាននោះ ជាបន្តបន្ទាប់ ដើម្បីជួយកងកម្លាំងស្មោះត្រង់ GNA ក្នុងការធ្វើយុទ្ធនាការវាយលុកទ្រង់ទ្រាយធំមួយទៅលើបុរសខ្លាំង ដែលបានបើកការវាយប្រហារប្រឆាំងក្រុងទ្រីប៉ូលីកាលពីខែមេសា ឆ្នាំ ២០១៩ កន្លងទៅនោះ។
នៅក្នុងសេចក្តីថ្លែងការណ៍មួយ អនុរដ្ឋមន្ត្រីការពារជាតិរបស់កងកម្លាំង GNA គឺលោក សាឡាហ៍ ណាមរូសហ៍ បានថ្លែងថា៖ «ការឆ្មក់វាយប្រហារនៅពេលយប់ ប្រឆាំងមូលដ្ឋានទ័ពអាកាសអាល់វ៉ាទីយ៉ានោះ ត្រូវបានធ្វើឡើងដោយកងកម្លាំងទ័ពអាកាសបរទេសនៅក្នុងការគាំទ្រឧក្រិដ្ឋជនសង្គ្រាម ហើយព្យាយាមលើកទឹកចិត្តឲ្យការវាយប្រហារទទួលបានជោគជ័យ»៕ AFP/SK