The Phnom Penh Post Search

Search form




Logo of Phnom Penh Post newspaper Phnom Penh Post - របាយការណ៍ៈ ​អារ៉ាប់​រួម​ពួតដៃគ្នា​ជួយ​វ៉េណេស៊ុអេឡា​ពី​ការដាក់​ទណ្ឌកម្ម​ប្រេង​ពី​អាមេរិក

របាយការណ៍ៈ ​អារ៉ាប់​រួម​ពួតដៃគ្នា​ជួយ​វ៉េណេស៊ុអេឡា​ពី​ការដាក់​ទណ្ឌកម្ម​ប្រេង​ពី​អាមេរិក

Content image - Phnom Penh Post
លោក​ប្រធានាធិបតី​នីកូឡាស ម៉ាឌូរ៉ូ (​ឆ្វេង​) ​ថ្លែង​នៅក្នុង​កិច្ចប្រជុំសភា​។ AFP

របាយការណ៍ៈ ​អារ៉ាប់​រួម​ពួតដៃគ្នា​ជួយ​វ៉េណេស៊ុអេឡា​ពី​ការដាក់​ទណ្ឌកម្ម​ប្រេង​ពី​អាមេរិក

របាយការណ៍​ពិសេស​មួយ​បាន​រកឃើញថា អារ៉ាប់រួម​ពួតដៃ​គ្នា​ធ្វើជា​មជ្ឈមណ្ឌល​សម្រាប់​ជួយ​ដល់​ប្រទេស​វ៉េណេស៊ុយអេឡា​ពី​ការដាក់ទណ្ឌកម្ម​ពាណិជ្ជកម្ម​ប្រេង​ពី​សហរដ្ឋអាមេរិក​កាលពី​ខែមិថុនា​កន្លង​ទៅ​។

កាលពី​ពាក់កណ្ដាល​ឆ្នាំនេះ​សហរដ្ឋអាមេរិក​បាន​ដាក់​ទណ្ឌកម្ម​លើ​ក្រុមហ៊ុន​ដឹក​ប្រេង​ជាង ៦ ជា​ជំហាន​ដ៏ធំ​មួយ​នៃ​បំណង​របស់​អាមេរិក​ដែល​ចង់​បញ្ឈប់​ពាណិជ្ជកម្ម​ប្រេង​របស់​វ៉េណេស៊ុយអេឡា​។

ក្នុង​រយៈពេល​ប៉ុន្មាន​សប្តាហ៍​ក្រោយមក​ក៏មាន​ការលេចឡើង​ក្រុមហ៊ុន​ល្បីឈ្មោះ​មួយ​ដែល​មាន​មូលដ្ឋាន​នៅ​អារ៉ាប់រួម (UAE) ឈាន​ជើង​មកកាន់​កាប់​ក្រុមហ៊ុន​ដឹក​ប្រេង​ទៅ​វ៉េណេស៊ុយអេឡា​ជាច្រើន​ក្រុមហ៊ុន​ដោយ​ធ្វើ​ការប្ដូរ ឈ្មោះ​នាវា​ទាំងអស់​នោះ​ហើយ​បន្ត​ដំណើរការ​ដឹកជញ្ជូន​ប្រេង​របស់ខ្លួន​ទៅ​វ៉េណេស៊ុយអេឡា​ដូច​ធម្មតា​។

ក្រុមហ៊ុន​ Muhit Maritime FZE គឺជា​អង្គភាព​មួយ​ក្នុង​ចំណោម​អង្គភាព​ទាំង​ ៣ ​ដែល​មាន​មូលដ្ឋាន​នៅ​អារ៉ាប់រួម​ដែល​ត្រូវបាន​គេ​សម្គាល់ថា ធ្លាប់បាន​ដឹកជញ្ជូន​ប្រេងឆៅ និង​ឥន្ធនៈ​ទៅ​វ៉េណេស៊ុយអេឡា​ក្នុងអំឡុង​ឆមាស​ទី​ ២ នៃ​ឆ្នាំនេះ​។

ដំណើរការ​មួយចំនួន​ក៏​ចាប់ផ្ដើម​មានការ​ផ្លាស់ប្ដូរ​ថ្មី​ដែល​រួមមាន​ដំណើរការ​ពិនិត្យ​លើ​ឯកសារ​ដឹកជញ្ជូន​ផ្ទៃក្នុង​ពី​ក្រុមហ៊ុន​ប្រេង​រដ្ឋ​របស់​វ៉េណេស៊ុយអេឡា ក៏ដូចជា ទិន្នន័យ​នៃ​ការដឹកជញ្ជូន និង​នាវា​របស់​ភាគី​ទី​ ៣ ​ក៏មាន​ការផ្លាស់ប្ដូរ​ដែរ​។

នាវា​ដឹក​ប្រេង​គ្រប់គ្រង​ដោយ ក្រុមហ៊ុន Muhit Maritime FZE បាន​ដឹក​ប្រេង​រាប់លាន បារ៉ែល​ដែល​ផលិត​ដោយ​ក្រុមហ៊ុន​រដ្ឋ​របស់​ប្រទេស វ៉េណេស៊ុយអេឡា គឺ​ក្រុមហ៊ុន​ Petroleos de Venezuela SA ឬ PDVSA តាំងតែ​ពី​ខែ មិថុនា​មក​ម្ល៉េះ​។ នេះ​បើ​យោងតាម​ឯកសារ​ផ្ទៃក្នុង និង​មូលដ្ឋាន​ទិន្នន័យ​ដឹកជញ្ជូន​ជា​សាធារណៈ​។

សកម្មភាព​នេះ​បង្ហាញ​ឱ្យ​ឃើញ​ពី​របៀប​ដែល​អារ៉ាប់រួម​ដែលជា​សម្ព័ន្ធមិត្ត​មួយ​ក្នុងចំណោម​សម្ព័ន្ធមិត្ត​ជិត​បំផុត​របស់​ទីក្រុង​វ៉ាស៊ីនតោន​នៅ​មជ្ឈឹមបូព៌ា បង្កើត​មជ្ឈមណ្ឌល​សម្រាប់​ជួយ​ដល់​ក្រុមហ៊ុន​ដែល​ទទួលរង​ការដាក់​ទណ្ឌកម្ម​ពី​អាមេរិក​ទៅ​កាន់​ប្រទេស​វ៉េណេស៊ុយអេឡា​។

ក្រុមហ៊ុន​ចំនួន​ ៣ រួមមាន ក្រុមហ៊ុន Muhit Maritime ក្រុមហ៊ុន​ Issa Shipping FZE និង​ក្រុមហ៊ុន Asia Charm Ltd មិនបាន​ឆ្លើយតប​នឹង​សំណួរ​របស់​អ្នកសារព័ត៌មាន​ដែល​ព្យាយាម​ទាក់ទង​ទៅ​តាមរយៈ​ប្រអប់​សំបុត្រ និង​អ៊ីមែល​ទាក់ទិន​នឹង​បញ្ហា​នេះឡើយ​។

បន្ថែម​ពីនេះ​អ្នកសារព័ត៌មាន​ក៏​មិនអាច​រកឃើញ​ទិន្នន័យ​ណាមួយ​ដែល​បញ្ជាក់ថា​នរណា​ជា​ម្ចាស់​ពីក្រោយ​ក្រុមហ៊ុន​ទាំង​ ៣ ​នេះដែរ​។ ព័ត៌មាន​លម្អិត​អំពី​ភាព​ជា​ម្ចាស់ និង​ការគ្រប់គ្រង​របស់​ក្រុមហ៊ុន​ទាំងនេះ​មិនត្រូវ​បាន​ចុះ​ក្នុង​បញ្ជី ឈ្មោះ​ក្រុមហ៊ុន​ដែល​អាច​រកឃើញ​ជា​សាធារណៈ​ក្នុង​អារ៉ាប់រួម​ឡើយ​។

យ៉ាងណាមិញ​តួនាទី​របស់​ក្រុមហ៊ុន​ទាំង​ ៣ ​គឺ​ដឹកជញ្ជូន​ប្រេង​វ៉េណេស៊ុយអេឡា​ដែល​នេះ​គូសបញ្ជាក់​ពី​របៀប​នៃ​អង្គភាព​ដែល​មិន​ស្គាល់​ច្បាស់លាស់​នេះ​ព្យាយាម​ដឹកជញ្ជូន​ប្រេង​ចេញពី​វ៉េណេស៊ុយអេឡា ខណៈ​ដែល​ទីក្រុង​វ៉ាស៊ីនតោន​កំពុង​ព្យាយាម​រារាំង​ប្រទេស​ទិញ​ប្រេង និង​ក្រុមហ៊ុន​ដឹកជញ្ជូន​ទាំងឡាយ​កុំ​ឱ្យ​មាន​ការដឹកជញ្ជូន​ប្រេងឆៅ​ចេញពី​ប្រទេស​ទៅកាន់​ប្រទេស​នៅ​អាមេរិក​ខាងត្បូង​។

ទីភ្នាក់ងារ​ព័ត៌មាន​រ៉យទ័រ​បាន​រាយការណ៍​កាល​ខែ​វិច្ឆិកា​ថា ក្រុមហ៊ុន Hitherto មិន ស្គាល់​អត្តសញ្ញាណ​ប្រាកដ មួយ​បាន​ចូលខ្លួន​ជា​អ្នកទិញ​ប្រេងឆៅ​ធំ​បង្អស់​ពី​វ៉េណេស៊ុយអេឡា​។ ក្រុមហ៊ុន​ដែល​ទិញ​ប្រេង​ពី​ប្រទេស​នេះ​សុទ្ធសឹង​តែ​ជា​ក្រុមហ៊ុន​ដែល​ទើបតែ​ចុះបញ្ជី​នៅក្នុង​ឆ្នាំនេះ​ក្នុងនាម​ជា​ក្រុមហ៊ុន​ពាណិជ្ជកម្ម​ដែលមាន​មូលដ្ឋាន​នៅ​ទីក្រុង​ម៉ូស្គូ​។

គួរបញ្ជាក់​ផងដែរ​ថា ប្រទេស​រុស្ស៊ី​គឺជា​ប្រទេស​សម្ព័ន្ធមិត្ត​មួយ​ក្នុងចំណោម​ប្រទេស​សម្ព័ន្ធមិត្ត​ជិតស្និទ្ធ​បំផុត​របស់​ប្រទេស​វ៉េណេស៊ុយអេឡា​។

ឥឡូវនេះ​កំពុង​មានការ​លេចឡើង​នូវ​ឥរិយាបថ​ស្រដៀង​គ្នា ដែល​ទំនងជា​សកម្មភាព​លក្ខណៈ​ជួយ​ប្រទេស​សម្ព័ន្ធមិត្ត​ពាក់ព័ន្ធ​ក្នុង​ការដឹកជញ្ជូន​ប្រេង​នេះ​។

អង្គភាព​ចេញពី​អារ៉ាប់រួម​ទាំង​ ៣ ​នេះ​បាន​បង្កើត​កង​នាវា​របស់ខ្លួន​តាំងពី​ដើមឆ្នាំ ២០១៩ មក​ម្ល៉េះ ដែល​រួម​ជាមួយនឹង​នាវា​ជាច្រើន​ដែល​តែង​ធ្វើដំណើរ​ទៅកាន់​ប្រទេស​វ៉េណេស៊ុយអេឡា​។ នេះ​បើ​យោងតាម​ទិន្នន័យ​តាមដាន​នាវា Refinitiv Eikon ​និង​ Equasis ដែលជា​មូលដ្ឋាន​ទិន្នន័យ​ដឹកជញ្ជូន​។

ការនាំចេញ​ប្រេងឆៅ​របស់​ក្រុមហ៊ុន​ទាំង ​៣ មាន​ចំនួន​ប្រមាណ​ ៣,៩ ភាគរយ​នៃ​ការនាំ​ប្រេង​ចេញ​សរុប​របស់​ប្រទេស​អាមេរិក​ខាងត្បូង​នៅ​ឆ្នាំ​ ២០២០ គិត​មក​ត្រឹម​ថ្ងៃទី​ ១៨ ធ្នូ ដែល​ចំនួន​នេះ​មាន​តម្លៃ​ប្រហែល ២០៨,៥ ​លាន​ដុល្លារ ក្នុងតម្លៃ​ទីផ្សារ​សម្រាប់​ប្រេងឆៅ​ម្យ៉ាង​ឈ្មោះថា មេរី (Merey)​។

ក្រុមហ៊ុន​ PDVSA របស់​ប្រទេស​វ៉េណេស៊ុយអេឡា​ច្រើនតែ​លក់​ប្រេង​ឆៅ​របស់​ខ្លួន ដោយ​បញ្ចុះតម្លៃ​ទាប​បំផុត​ហើយ​ពេលខ្លះ​លក់​ថោក​ស្ទើរ​រក​ចំណេញ​មិនឃើញ​ផង​។

អ្នកនាំពាក្យ​ក្រសួង​ការបរទេស​សហរដ្ឋអាមេរិក​បាន​និយាយថា​៖ «​យើង​កំពុង​តាមដាន​យ៉ាង​ដិតដល់​នូវ​រាល់​វិធី​ដោះស្រាយ​បែប​ច្នៃប្រឌិត​ទាំងឡាយ​របស់​ក្រុមហ៊ុន​នានា​ក្នុងការ​គេច​ពី​ការដាក់ទណ្ឌកម្ម​ប្រេង​នេះ​។ អ្នក​ដែល​នៅ​ពី​ក្រោយ​ក្រុមហ៊ុន​ទាំងនេះ​ប្រហែល​ជា​មិនសូវ​ឆ្លាត​ដោយ​មិនបាន​ពិចារណា​សោះ​ថា ខ្លួនឯង​អាចនឹង​ទទួល​រង​ការដាក់​ទណ្ឌកម្ម​នេះដែរ​ឬ​អត់​ទេ​»​។

អ្នកនាំពាក្យ​រូបនេះ​បាន​បដិសេធ​មិន​ធ្វើ​អត្ថាធិប្បាយ​អំពី​ទណ្ឌកម្ម​នាពេល​អនាគត​ដែល​អាច​កើតមានឡើង ប៉ុន្តែ​គាត់​បាន​បន្ថែមថា​៖ «​មិត្តភក្តិ និង​សត្រូវ​អាមេរិក​គួរតែ​ដឹងថា​ក្រុមហ៊ុន​របស់​ពួកគេ ក្រុមហ៊ុន​ជួរមុខ និង​នាវា​ដឹក​ប្រេង​នៅតែ​ងាយ​រង​ការដាក់ទណ្ឌកម្ម​ប្រសិន​បើ​ពួកគេ​ជ្រៀតជ្រែក​សកម្មភាព​ហើយ​ជួយ​សម្រួល​ដល់​ការនាំចេញ​ប្រេង​របស់​ក្រុមហ៊ុន PDVSA របស់​ប្រទេស​វ៉េណេស៊ុយអេឡា​ទៅ​បរទេស និង​កិច្ចខិតខំ​ប្រឹងប្រែង​របស់​របប Maduro ដើម្បី​គេចចេញ​ពី​ទណ្ឌកម្ម​នេះ​»​។

រដ្ឋាភិបាល​អារ៉ាប់រួម​បាន​និយាយ​នៅក្នុង​សេចក្តី​ថ្លែងការណ៍​មួយ​ថា​៖ «​ការស៊ើបអង្កេត​ដ៏ហ្មត់ចត់ និង​គ្រប់​ជ្រុងជ្រោយ​កំពុង​ដំណើរការ​យ៉ាង​ពេញលេញ​» ចំពោះ​ករណី​របស់​ក្រុមហ៊ុន Muhit Maritime ក្រុមហ៊ុន Issa Shipping និង ក្រុមហ៊ុន Asia Charm​។

សេចក្ដី​ថ្លែងការណ៍​បាន​បន្តថា​៖ «​អារ៉ាប់រួម​មាន​តួនាទី​ក្នុង​ការការពារ​បូរណភាព​នៃ​ប្រព័ន្ធ​ហិរញ្ញវត្ថុ​ពិភពលោក​។ នេះ​មានន័យថា ការគ្រប់គ្រង និង​អនុវត្ត​ការដាក់ទណ្ឌកម្ម​សេដ្ឋកិច្ច និង​ពាណិជ្ជកម្ម​កំពុង​ធ្វើឡើង​យ៉ាងសកម្ម​»​។

ក្រសួង​ព័ត៌មាន​ក្រសួង​ប្រេង​ក្រុមហ៊ុន​ប្រេង​រដ្ឋ PDVSA និង​ស្ថានទូត​របស់​ប្រទេស​វ៉េណេស៊ុយអេឡា​ប្រចាំ​នៅ​អារ៉ាប់រួម​ក៏​មិនបាន​ឆ្លើយតប​នឹង​សំណួរ​របស់​អ្នកសារព័ត៌មាន​ដែរ​។

ទីក្រុង​វ៉ាស៊ីនតោន​បាន​ពង្រីក​ការដាក់ទណ្ឌកម្ម​យ៉ាងខ្លាំង​ទៅកាន់​វ៉េណេស៊ុយអេឡា បន្ទាប់ពី​ការបោះឆ្នោត​ឡើង​វិញ​នៅ​ឆ្នាំ ២០១៨ របស់​លោក​ Maduro ដែល​ត្រូវបាន​សហរដ្ឋអាមេរិក និង​សម្ព័ន្ធមិត្ត​ពិពណ៌នា​ថា មាន​ការក្លែងបន្លំ​។ ទីក្រុង​វ៉ាស៊ីនតោន​មិនបាន​ជោគជ័យ​ក្នុង​ការដក​លោក Maduro ទេ ប៉ុន្តែ​បានដាក់​ទណ្ឌកម្ម​ក្នុង​ការបំផ្លាញ​វិស័យ​ប្រេង​របស់​វ៉េណេស៊ុយអេឡា​វិញ​៕

អត្ថបទគួរចាប់អារម្មណ៍