.jpg)
ក្រុមស្ត្រីធ្វើបាតុកម្ម នៅក្នុងអំឡុងពេលប្រារព្ធទិវាអន្តរជាតិដើម្បីលុបបំបាត់អំពើហិង្សាប្រឆាំងស្រ្តី។ រូបថតAFP
ក្រុងប៉ារីស៖ មនុស្សរាប់ម៉ឺននាក់ បានប្រមូលផ្តុំគ្នានៅទូទាំងពិភពលោក ដើម្បីប្រារព្ធទិវាអន្តរជាតិ ដើម្បីបំបាត់អំពើហិង្សាប្រឆាំងស្ត្រី ខណៈដែល ប្រទេស បារាំង បានបង្ហាញវិធានការថ្មីៗ ក្នុងការប្រយុទ្ធប្រឆាំងអំពើហិង្សាក្នុងគ្រួសារ។
ក្រុមបាតុករកាលពីថ្ងៃចន្ទ បានធ្វើការប្រមូលផ្តុំគ្នានៅក្នុងប្រទេសខ្លះដូចជា ប្រទេស ក្វាតេម៉ាឡា រុស្ស៊ី ស៊ូដង់ និងតួកគី ជាទីដែលប៉ូលិសបង្ក្រាបកុបកម្មនៅក្នុងទីក្រុងអ៊ីស្តង់ប៊ុល បានបិទផ្លូវក្រុមអ្នកតវ៉ាប្រហែល ២ ពាន់នាក់ នៅមុនពេលបាញ់ឧស្ម័នបង្ហូរទឹកភ្នែក និងគ្រាប់កាំភ្លើងកៅស៊ូ ដើម្បីបំបែកពួកគេ។
រដ្ឋាភិបាលនៃប្រទេស បារាំង បានប្រកាសថា ខ្លួននឹងផ្តល់ភាពងាយស្រួលជូនក្រុមវេជ្ជបណ្ឌិត ដើម្បីចែករំលែកព័ត៌មានអំពីស្ត្រីដែលងាយទទួលរងអំពើហិង្សា និងតាក់តែងច្បាប់អំពីគោលគំនិតនៃការព្យាបាលតាមលក្ខណៈចិត្តសាស្រ្ត បន្ទាប់ពីមានការប្រមូលផ្តុំទ្រង់ទ្រាយធំនៅក្នុងប្រទេស បារាំង នៅចុងសប្តាហ៍។
យោងតាមអង្គការសហប្រជាជាតិបានឲ្យដឹងថា ស្ត្រី និងក្មេងស្រីប្រហែល ៨៧ ពាន់នាក់ ត្រូវបានគេធ្វើឃាតនៅទូទាំងពិភពលោកកាលពីឆ្នាំ ២០១៧។
ស្រ្តីកាន់ផ្ទាំងក្រដាសដែលមានឈ្មោះស្ត្រីដែលត្រូវបានគេសម្លាប់ នៅក្នុងការប្រារព្ធទិវាអន្តរជាតិលុបបំបាត់អំពើហិង្សា។ AFP
ការប្រមូលផ្តុំកាលពីថ្ងៃចន្ទ បានបង្កឲ្យមានការខឹងសម្បារកាន់តែខ្លាំងឡើង ជុំវិញការខកខានរបស់ប្រព័ន្ធយុត្តិធម៌ដែលមិនបានកាត់ទោសក្រុមឧក្រិដ្ឋជន បន្ទាប់ពីមានការតវ៉ាអស់មួយសប្តាហ៍ប្រឆាំងទៅនឹងអ្វីដែលកំពុងត្រូវបានគេចាត់ទុកជាអំពើឃាតកម្មទៅលើស្ត្រី។
ហ្វូងបាតុករបានដង្ហែក្បួនឆ្លងកាត់ផ្លូវទីក្រុងម៉ូស្គូ ដើម្បីបង្ហាញអំពីការខកខានរបស់រដ្ឋាភិបាល មិនបានអនុម័តច្បាប់ការពារស្ត្រី ចំណែកស្ត្រីស៊ូដង់រាប់រយនាក់ បានស្រែកពាក្យស្លោក «ទាមទារសេរីភាព សន្តិភាព និងយុត្តិធម៌» ខណៈពួកគេបានប្រមូលផ្តុំគ្នានៅក្នុងទីក្រុងខារទុំ នៅក្នុងការតវ៉ាលើកដំបូង រយៈពេលជាច្រើនទសវត្សរ៍មកនោះ។
នៅក្នុងទីក្រុងម៉ិកស៊ីកូវិញ ក្រុមបាតុករពាក់ម៉ាស់ ជាមួយញញួរ បានវាយកម្ទេចកញ្ចក់ចំណតរថយន្តក្រុងវិមានប្រវត្តិសាស្ត្រមួយចំនួន ត្រូវបាញ់ស្រ្បៃយ៍ពណ៌ ហើយបានប៉ះទង្គិចជាមួយប៉ូលិសបង្ក្រាបកុបកម្មកាលពីថ្ងៃចន្ទ ដើម្បីតវ៉ាប្រឆាំងការខកខានរបស់អាជ្ញាធរ មិនបានបញ្ឈប់អត្រានៃអំពើឃាតកម្មដែលកំពុងកើនឡើង និងការចាប់រំលោភស្ត្រីនៅក្នុងប្រទេស។
ក្រុមសកម្មជនចូលរួមក្នុងការតវ៉ា នៅក្នុងអំឡុងពេលប្រារព្ធខួបទិវាអន្តរជាតិដើម្បីលុបបំបាត់អំពើហិង្សាប្រឆាំងស្ត្រី។ AFP
បាតុករអេស្ប៉ាញរាប់ម៉ឺននាក់ បានដង្ហែក្បួននៅក្នុងទីក្រុងម៉ាឌ្រីដ កាលពីរសៀលថ្ងៃចន្ទ បន្ទាប់ពីមានការតវ៉ាមួយសប្តាហ៍។
ប្រទេស អេស្ប៉ាញ មានច្បាប់ប្រឆាំងអំពើហិង្សាលើភេទយូរយារណាស់មកហើយ ប៉ុន្តែមិនបានបញ្ឈប់បញ្ហានេះទេ ដោយមានស្រ្តីចំនួន ៥២ នាក់ ត្រូវបានសម្លាប់ដោយក្រុមដៃគូរបស់ពួកគេ ឬអតីតដៃគូចាប់តាំងពីដើមឆ្នាំ ២០១៩ មក។
ប្រទេស អាហ្វ្រិកខាងត្បូង មានរបាយការណ៍មួយនៅក្នុងចំណោមរបាយការណ៍អាក្រក់បំផុតស្តីពីអំពើហិង្សាលើភេទហើយរដ្ឋាភិបាលបានប្រឈមនឹងការតវ៉ាជាច្រើនចំពោះបញ្ហានេះ។
លោកប្រធានាធិបតី ស៊ីរីល រ៉ាម៉ាហ្វូសា បានប្រើប្រាស់ព្រឹត្តិការណ៍កាលពីថ្ងៃចន្ទ ដើម្បីចាប់ផ្តើមធ្វើយុទ្ធនាការមួយក្នុងគោលបំណងផ្តល់យុត្តិធម៌ជូនដល់ក្រុមជនរងគ្រោះ ហើយជំរុញឲ្យក្រុមបុរសបោះបង់ចោល «ឥរិយាបថប្រកាន់ភេទ និងការចាត់ទុកបុរសជាធំនៅក្នុងគ្រួសារនោះ»៕ AFP/SK
