កាលពីថ្ងៃសៅរ៍ ទី ១៨ មេសា នាវាចម្បាំងរុស្សីចំនួនពីរគ្រឿងបានធ្វើដំណើរឆ្លងកាត់ច្រកសមុទ្រ Bosphorus ទៅកាន់សមុទ្រខ្មៅ ហើយនាវាតូចៗចំនួន ១៥ ផ្សេងទៀតបានបញ្ចប់ការផ្ទេរទៅសមុទ្រនេះ ខណៈក្រុងមូស្គូបង្កើនវត្តមានកងទ័ពជើងទឹក ចំពេលដែលភាពតានតឹងកំពុងកើនឡើងជាមួយប្រទេសអ៊ុយក្រែន និងលោកខាងលិច។
នាវាប្រភេទ Ropucha ដែលមានសមត្ថភាពដឹកជញ្ជូនរថក្រោះ រថពាសដែក និងទាហានថ្មើរជើងចំនួនពីរគ្រឿងមកពីកងនាវាខាងជើងរបស់រុស្ស៊ីបានឆ្លងកាត់ច្រកសមុទ្រ Bosphorus ក្រុងអ៊ីស្តាន់ប៊ុល ប្រទេសតួកគី។ នាវាប្រភេទនេះចំនួន ២ គ្រឿងបន្ថែមទៀតមកពីកងនាវាសមុទ្របាល់ទិកនឹងធ្វើការឆ្លងកាត់ដដែលក្នុងរយៈពេលប៉ុន្មានថ្ងៃខាងមុខនេះ។
ការផ្ទេរនាវានេះធ្វើលើ ខណៈពេលដែលទាហានរុស្ស៊ីបានធ្វើការប្រមូលផ្ដុំដ៏ធំមួយនៅតំបន់ព្រំដែនអ៊ុយក្រែនធ្វើឱ្យមានការព្រួយបារម្ភយ៉ាងខ្លាំងពីក្រុងកៀវ និងប្រទេសលោកខាងលិច។ ក្រុងមូស្គូបានអះអាងថាការប្រមូលផ្ដុំទាហាននេះគឺដើម្បីធ្វើការសមយុទ្ធប៉ុណ្ណោះ
រុស្ស៊ី បានដាក់កម្រិតជាបណ្ដោះអាសន្នលើចលនានាវាចម្បាំងបរទេស «និងនាវារដ្ឋដទៃទៀត» នៅក្បែរឧបទ្វីបគ្រីមាដែលខ្លួនបានកាត់យកពីអ៊ុយក្រែនក្នុងឆ្នាំ ២០១៤។
កាលពីសប្ដាហ៍មុន អាមេរិកបានព្យាយាមបញ្ជូននាវាចម្បាំងចំនួនពីរគ្រឿងទៅកាន់សមុទ្រខ្មៅផងដែរ តែបានលុបចោលវិញ បន្ទាប់ពីរុស្ស៊ីបានធ្វើការតវ៉ា៕