ក្រុងម៉ូស្គូ៖ ប្រទេសរុស្ស៊ី កាលពីថ្ងៃអង្គារបានអះអាងថា ខ្លួនបានបង្កើតវ៉ាក់សាំងដំបូងបំផុតនៅក្នុងពិភពលោកដែលផ្តល់ភាពស៊ាំអាចទ្រទ្រង់ប្រឆាំងនឹងវីរុសកូរ៉ូណាបាន ខណៈវីរុសរាតត្បាតនេះបានធ្វើឲ្យក្លាយជាកំណត់ត្រាមួយទៀត ដោយមានអ្នកឆ្លងនៅទូទាំងសកលលោក កើនរហូតជាង ២០ លាននាក់។
លោកប្រធានាធិបតី វ៉្លាឌីមៀរ ពូទីន បានថ្លែងថា កូនស្រីម្នាក់ក្នុងចំណោមកូនស្រីរបស់លោកបានទទួលការចាក់វ៉ាក់សាំងបង្ការមេរោគនេះ ដែលត្រូវបានប្រកាសនៅលើសារព័ត៌មាន Sputnik។
ក្រុមអ្នកវិទ្យាសាស្ត្រលោកខាងលិចធ្លាប់បង្ហាញកង្វល់អំពីល្បឿននៃការបង្កើតវ៉ាក់សាំងរបស់រុស្ស៊ី ដោយបញ្ជាក់ថា ក្រុមអ្នកស្រាវជ្រាវអាចកាត់បន្ថយការរឹតត្បិតខ្លះ។
អង្គការសុខភាពពិភពលោក (WHO) កាលពីថ្ងៃអង្គារ បានព្រមានថា ការអនុម័តណាមួយទៅលើវ៉ាក់សាំងរបស់រុស្ស៊ី នឹងតម្រូវមានការត្រួតពិនិត្យទៅលើទិន្នន័យ ដើម្បីបង្ហាញពីសុវត្ថិភាព និងប្រសិទ្ធភាពរបស់វ៉ាក់សាំងនោះ។
លោក ពូទីន បានថ្លែងអំពីវ៉ាក់សាំង ដែលត្រូវបានបង្កើតឡើងដោយវិទ្យាស្ថានស្រាវជ្រាវ Gamaleya ដែលមានការសហការជាមួយក្រសួងការពារជាតិក្រុងម៉ូស្គូថា៖ «ខ្ញុំដឹងថា វ៉ាក់សាំងនេះ មានប្រសិទ្ធភាពយ៉ាងពិតប្រាកដ ដែលវ៉ាក់សាំងនេះផ្តល់ឲ្យនូវភាពស៊ាំ ដែលអាចទ្រទ្រង់ប្រឆាំងនឹងវីរុសនេះបាន»។
ប្រទេសរុស្ស៊ី សង្ឃឹមថា នឹងចាប់ផ្តើមផលិតកម្មនៅក្នុងខែកញ្ញា ហើយនឹងចាប់ផ្តើមចាក់វ៉ាក់សាំងដល់បុគ្គលិកពេទ្យទាំងអស់ភ្លាមៗ»។
ប្រទេសក្រៅប្រហែល ២០ បានបញ្ជាទិញ ១ ពាន់លានដូស ដោយផ្អែកទៅលើមូលនិធិទ្រព្យសម្បត្តិដ៏ច្រើនលើសលប់ ដែលបានជួយផលិតវ៉ាក់សាំងនេះ។
ការប្រកួតប្រជែងក្នុងការបង្កើតវ៉ាក់សាំងបានកើនឡើង ខណៈប្រទេសជាច្រើននៅទូទាំងពិភពលោកបានប្រឈមនឹងការផ្ទុះឆ្លងវីរុសជាថ្មី ដោយសារពួកគេបានព្យាយាមស្តារសេដ្ឋកិច្ច ដែលរងប៉ះពាល់ដោយសារការបិទប្រទេស ដើម្បីទប់ស្កាត់ការឆ្លងវីរុសនេះ។
អ្នកស្លាប់ជិត ៧៣៧ ០០០ នាក់ ត្រូវបានគេកត់ត្រាចាប់តាំងវីរុសនេះបានផ្ទុះឡើងដំបូងនៅក្នុងប្រទេសចិន កាលពីចុងឆ្នាំ ២០១៩ និងបានរាលដាលទូទាំងសកលលោកដោយតួលេខនេះត្រូវរំពឹងទុកថា នឹងកើនឡើងជាង ៧៥ ម៊ឺននាក់ នៅប៉ុន្មានថ្ងៃខាងមុខនេះ។
លោករដ្ឋមន្ត្រីសុខាភិបាលរុស្ស៊ី Mikhail Murashko បានថ្លែងថា ការពិសោធវ៉ាក់សាំងដែលពាក់ព័ន្ធជាមួយអ្នកចូលរួមរាប់ពាន់នាក់នឹងបន្តធ្វើតទៅទៀត។
នៅកន្លែងផ្សេងទៀតនៅក្នុងពិភពលោកប្រទេសឥណ្ឌូនេស៊ី បានថ្លែងថា ខ្លួនបានចាប់ផ្តើមធ្វើពិសោធន៍វ៉ាក់សាំងមកពីក្រុមហ៊ុន Sinovac Biotech ទៅលើមនុស្សក្នុងដំណាក់កាលទី៣។
«ដំណាក់កាលទី៣ នេះ និយាយសំដៅការពិសោធដែលពាក់ព័ន្ធការតេស្តមនុស្សចំនួនច្រើន ហើយជាដំណាក់កាលចុងក្រោយមុននឹងអនុម័តតាមផ្លូវច្បាប់។
វ៉ាក់សាំងរបស់ក្រុមហ៊ុន Sinovac ឈ្មោះ CoronaVac ត្រូវគេធ្វើតេស្តលើអ្នកធ្វើការផ្នែកសុខភាពប្រេស៊ីល ៩ ០០០ នាក់រួចហើយ៕ AFP/PSA