ប្រទេសរស្ស៊ី៖ កាលពីថ្ងៃសុក្របានហាមមន្ត្រីជាន់ខ្ពស់ជាច្រើនរូបពីរដ្ឋការរបស់លោកប្រធានាធិបតីអាមេរិក ចូ បៃដិន មិនឱ្យចូលប្រទេសនេះ ខណៈអាមេរិកបានប្រកាសទណ្ឌកម្មជាបន្តបន្ទាប់ និងបណ្តេញក្រុមអ្នកការទូត ស្របពេលភាពតានតឹងរវាងសត្រូវទាំង ២ នេះកើនកម្តៅខ្លាំង។
ទោះបីជាយ៉ាងណាក៏ដោយ ក៏ទីក្រុងម៉ូស្គូ ពិចារណាអំពីលទ្ធភាពនៃជំនួបរវាងលោក បៃដិន និងលោកប្រធានាធិបតី វ្លាឌីមៀរ ពូទីន។
កាលពីថ្ងៃព្រហស្បតិ៍ ទីក្រុងវ៉ាស៊ីនតោនបានប្រកាសទណ្ឌកម្ម និងបណ្តេញអ្នកការទូតរុស្ស៊ីចំនួន ១០ រូបជាការសងសឹកចំពោះអ្វីដែលខ្លួននិយាយថា ជាការជ្រៀតជ្រែករបស់វិមានក្រឹមឡាំងនៅក្នុងការបោះឆ្នោតរបស់អាមេរិក ការវាយប្រហារតាមអ៊ីនធឺណិតទ្រង់ទ្រាយធំ និងសកម្មភាពបង្កអារិភាពដទៃទៀត។
ជាការឆ្លើយយ៉ាងពេញទំហឹងនោះ ទីក្រុងម៉ូស្គូបាននិយាយថា មន្ត្រីជាន់ខ្ពស់អាមេរិកនៅក្នុងនោះមានលោកអគ្គមេធាវី Merrick Garland ទីប្រឹក្សា គោលនយោបាយក្នុងស្រុករបស់លោក បៃដិន លោកស្រី Susan Rice និងប្រធាន FBI លោក Christopher Wray នឹងត្រូវបានហាមមិនឱ្យចូលប្រទេសរុស្ស៊ី។
កាលពីថ្ងៃសុក្រ លោករដ្ឋមន្ត្រីការបរទេសរុស្ស៊ី Sergei Lavrov បានថ្លែងប្រាប់អ្នកកាសែតថា ប្រទេសរុស្ស៊ី កំពុងឆ្លើយតបទៅនឹងទណ្ឌកម្មរបស់អាមេរិកក្នុងលក្ខណៈសងសឹក ដោយបានស្នើឱ្យក្រុមអ្នកការទូតអាមេរិកនៅក្នុងប្រទេសរុស្ស៊ី ចាកចេញពីប្រទេសនេះ ខណៈដែលបណ្តេញអ្នកការទូតប៉ូឡូញ ៥ រូបចេញដែរ ជាការឆ្លើយតបនឹងវិធានការស្រដៀងគ្នារបស់ទីក្រុងវ៉ាស៊ីវី។
លោក Lavrov ក៏បាននិយាយថា ទីប្រឹក្សាគោលនយោបាយការបរទេសរបស់លោកពូទីន គឺលោក Yury Ushakov បានផ្តល់ជាអនុសាសន៍ថា លោកប្រេសិតពិសេសអាមេរិក Yury Ushakov គួរតែចាកចេញទៅទីក្រុងវ៉ាស៊ីនតោន ដើម្បីធ្វើការពិគ្រោះយោបល់ឱ្យបានហ្មត់ចត់។
ប៉ុន្តែក្រសួងការបរទេសរុស្ស៊ី បានបញ្ជាក់ថា ខ្លួនបានពិនិត្យមើលសំណើរបស់លោក បៃដិន ដើម្បីរៀបចំជំនួបមួយជាមួយលោក ពូទីន ដោយបានបន្ថែមថា សំណើនោះស្ថិតនៅក្រោមការពិចារណា។
កាលពីដើមសប្តាហ៍មុន លោក បៃដិន បានស្នើសុំឱ្យរៀបចំជំនួបមួយ ខណៈដែលភាពតានតឹងរវាងប្រទេសរុស្ស៊ី និងលោកខាងលិចបានកើនឡើងជុំវិញជម្លោះនៅក្នុងប្រទេសអ៊ុយក្រែន និងទណ្ឌកម្មថ្មីៗដែលដាក់ដោយទីក្រុងវ៉ាស៊ីនតោន។
អ្នកនាំពាក្យវិមានក្រឹមឡាំងលោក Dmitry Peskov បានថ្លែងកាលពីថ្ងៃសុក្រថា ជាយូរមកហើយ លោក ពូទីន បាននិយាយអំពីសារៈសំខាន់នៃការធ្វើឱ្យទំនាក់ទំនងរវាងទីក្រុងម៉ូស្គូ និងទីក្រុងវ៉ាស៊ីនតោន វិលត្រឡប់ទៅរកភាពប្រក្រតីឡើងវិញ៕