កាលពីថ្ងៃអង្គារ ទី ២៣ មីនា រដ្ឋមន្រ្តីការបរទេសប្រទេសចិន និងរុស្ស៊ី បានថ្កោលទោសការដាក់ទណ្ឌកម្មរបស់ប្រទេសលោកខាងលិចទៅលើភាគីទាំងពីរ។
រដ្ឋមន្ត្រីការបរទេសចិនលោក Wang Yi បានរិះគន់យ៉ាងខ្លាំងចំពោះការដាក់ទណ្ឌកម្មនានារបស់សហភាពអឺរ៉ុប អង់គ្លេស អាមេរិក និងកាណាដា ដែលប្រឆាំងនឹងទីក្រុងប៉េកាំង។ បណ្តាប្រទេសលោកខាងលិចទាំងនោះបានដាក់ទណ្ឌកម្មទៅលើប្រទេសចិន ជុំវិញការរំលោភសិទ្ធិមនុស្សប្រឆាំងនឹងប្រជាជនម៉ូស្លីមអ៊ុយហ្គួរនៅតំបន់ស៊ីនជាំងភាគខាងលិចប្រទេសចិន។
កាលពីដើមខែនេះប្រទេសរុស្ស៊ី បាននិយាយថា ទណ្ឌកម្មដែលដាក់ដោយសហភាពអឺរ៉ុប និងសហរដ្ឋអាមេរិក ជុំវិញករណីលោក Alexei Navalny នឹងជះឥទ្ធិពលដល់ទំនាក់ទំនងទ្វេភាគីរបស់រុស្ស៊ីជាមួយប្រទេសទាំងពីរ។
រដ្ឋមន្ត្រីការបរទេសរុស្ស៊ីលោក Sergey Lavrov បាននិយាយថា ប្រទេសរុស្ស៊ី និងប្រទេសចិន បានមើលឃើញថា សហរដ្ឋអាមេរិកកំពុងព្យាយាមពឹងផ្អែកលើសម្ព័ន្ធមិត្តយោធានៃសង្គ្រាមត្រជាក់ ដើម្បីធ្វើឱ្យអន្តរាយដល់ច្បាប់អន្តរជាតិ។
ការដាក់ទណ្ឌកម្មរបស់សហភាពអ៊ឺរ៉ុប និងសហរដ្ឋអាមេរិកទៅលើប្រទេសរុស្ស៊ី បានផ្តោតលើបុគ្គលជាច្រើននៅក្នុងវិស័យសន្តិសុខរបស់ប្រទេសរុស្ស៊ី ដែលក្នុងនោះមានទាំងប្រធានសេវាសន្តិសុខសហព័ន្ធ គឺ លោកAlexander Bortnikov។ កាលពីថ្ងៃទី ២២ មីនា សហភាពអឺរ៉ុបក៏បានបង្កកទ្រព្យសម្បត្តិមន្ត្រីតំបន់ និងបក្សកុម្មុយនីស្តចិនចំនួន ៤ នាក់រួមមានលោក Chen Mingguo ប្រធានការិយាល័យសន្តិសុខសាធារណៈស៊ីនជាំង៕