ក្រុងម៉ូស្គូៈកាលពីថ្ងៃអង្គារ ក្រសួងការបរទេសរុស្ស៊ី បានរិះគន់ការអះអាងរបស់មន្ត្រីជាន់ខ្ពស់អាមេរិកអំពីការជ្រៀតជ្រែករបស់ រុស្ស៊ី ក្នុងការចរចាជុំវិញបញ្ហាអាហ្វហ្គានីស្ថាន ខណៈក្រុងវ៉ាស៊ីនតោន ខិតខំបង្វែរការស្តីបន្ទោសចំពោះការបរាជ័យគោលនយោបាយរបស់ខ្លួននៅក្នុងប្រទេសនេះ។
កាលពីថ្ងៃព្រហស្បតិ៍ លោក David Hale អនុរដ្ឋមន្ត្រីការបរទេសទទួលបន្ទុកកិច្ចការនយោបាយ បានចោទរុស្ស៊ីពីបទគាំទ្រជម្លោះនៅក្នុងប្រទេសអាហ្វហ្គានីស្ថាន។
សេចក្តីថ្លែងការណ៍មួយរបស់ក្រសួងនោះ បានឲ្យដឹងថា៖«យើងចាត់ទុកសេចក្តីថ្លែងការណ៍របស់លោកHaleថាជាកិច្ចខិតខំប្រឹងប្រែងមិនសមរម្យមួយក្នុងការបង្វែរការទទួលខុសត្រូវទៅឲ្យភាគីរុស្ស៊ីវិញចំពោះការបរាជ័យរបស់អាមេរិកនៅក្នុងប្រទេសអាហ្វហ្គានីស្ថាន និងខ្វះសមិទ្ធិផលក្នុងកិច្ចប្រឹងប្រែងរបស់ក្រុងវ៉ាស៊ីនតោនក្នុងការស្វែងរកដំណោះស្រាយចំពោះបញ្ហាអាហ្វហ្គានីស្ថាននោះ។
ក្រសួងដដែលនោះ បាននិយាយថា ការចោទប្រកាន់នោះ អាចបណ្តាលឲ្យមានការភ័ន្តច្រឡំ ខណៈក្រុងម៉ូស្គូ កំពុងខិតខំប្រឹងប្រែងជួយសម្រួលដំណើរការផ្សះផ្សានៅក្នុងអាហ្វហ្គានីស្ថាន ដោយបានលើកឡើងពីការរៀបចំជំនួបទី២របស់ក្រុងម៉ូស្គូអំពីរបៀបពិគ្រោះយោបល់អំពីបញ្ហាអាហ្វហ្គានីស្ថាន៕ PSA