ក្រុងប៊ុយការ៉េសៈ មេដឹកនាំគណបក្សប្រជាធិបតេយ្យសង្គមនិយម( PSD) បានថ្លែង កាលពីថ្ងៃព្រហស្បតិ៍ថា រដ្ឋាភិបាលរូម៉ានី នឹងធ្វើតាមអាមេរិកនិងរើស្ថានទូតរបស់ខ្លួននៅអុីស្រាអែលទៅតាំងនៅក្រុងហ្ស៊េរុយសាឡិម។
លោក Liviu Dragnea បានប្រាប់ទូរទស្សន៍ Antena 3 នៅមុនការប្រកាសជាផ្លូវការរបស់រដ្ឋាភិបាលថា នីតិវិធីជាច្រើន កំពុងចាប់ផ្តើម។
យោងតាមលោកDragnea បានឲ្យដឹងថា រដ្ឋាភិបាលរបស់លោកនាយករដ្ឋមន្ត្រី Viorica Dancila នៃគណបក្ស PSD បានឯកភាពគ្នាកាលពីថ្ងៃពុធ ទៅលើការចាប់ផ្តើមដំណើរការនានា ជាមួយនឹងការតាមដានលើការរើស្ថានទូតនោះ ទៅតាំងនៅក្រុងហ្ស៊េរុយសាឡិម។
អ្នកនាំពាក្យរដ្ឋាភិបាល បានបដិសេធមិនធ្វើការអធិប្បាយ នៅពេល AFP សួរ ថ្វីបើមានពាក្យចចាមអារ៉ាមអំពីបំណងនៃការរើស្ថានទូតពីក្រុងតែល អាវីវ បានលេចធ្លាយកាលពីខែធ្នូ ឆ្នាំ២០១៧ ក្តី។
ការអំពាវនាវរបស់លោកប្រធានាធិបតីដូណាល់ ត្រាំ ឲ្យរើស្ថានទូតអាមេរិក ទៅតាំងនៅក្នុងក្រុងដែលមានជម្លោះនោះ បានបង្កឲ្យមានការតវ៉ាបណ្តាលឲ្យមនុស្សស្លាប់និងមានរដ្ឋចំនួន១២៨ បានថ្កោលទោសអាមេរិកនៅក្នុងការបោះឆ្នោតនៅមហាសន្និបាតមួយរបស់អង្គការសហប្រជាជាតិ កាលពីខែធ្នូ ឆ្នាំ២០១៧៕ PSA