លោកឧត្ដមសេនីយ៍ មីន អ៊ុង ឡាំង (Min Aung Hlaing) អគ្គមេបញ្ជាការកងយោធាមីយ៉ាន់ម៉ាបានលេចចេញជាមេដឹកនាំប្រទេសថ្មី បន្ទាប់ពីធ្វើរដ្ឋប្រហារដណ្ដើមអំណាចពីគណបក្សសម្ព័ន្ធជាតិដើម្បីប្រជាធិបតេយ្យ (NLD) របស់លោកស្រី អ៊ុងសាន ស៊ូជី កាលពីថ្ងៃចន្ទទី ១ កុម្ភៈ។ គិតចាប់ពីឆ្នាំ ១៩៤៨ មកនេះជារដ្ឋប្រហារដឹកនាំដោយក្រុមយោធាលើកទី ៣ បន្ទាប់ពីមីយ៉ាន់ម៉ាបានឯករាជ្យពីចក្រភពអង់គ្លេស។
មានកំណើតនៅទីក្រុង Tavoy ដែលឥឡូវនេះមានឈ្មោះថា Dawei លោក Min Aung Hlaing បច្ចុប្បន្នមានអាយុ ៦៤ ឆ្នាំបានចាប់ផ្ដើមអាជីពក្នុងកងយោធា នៅពេលដែលលោកចូលសិក្សានៅបណ្ឌិត្យសភាសេវាការពារជាតិនៅឆ្នាំ ១៩៧៤ បន្ទាប់ពីបោះបង់ការសិក្សាច្បាប់នៅសាកលវិទ្យាល័យទីក្រុងយុំាងហ្គោន។
ទាហានថ្មើរជើងរូបនេះបានទទួលការដំឡើងឋានៈជាប្រចាំ និងឡើងខ្សែចង្វាក់បញ្ជាការដែលក្នុងអំឡុងពេលនោះលោកបានស្ថិតក្រោមបញ្ជារបស់អនាគតអគ្គមេបញ្ជាការកងយោធាមីយ៉ាន់ម៉ាលោក Than Shwe ដែលបានឡើងកាន់អំណាចនៅឆ្នាំ ១៩៩២។
នៅឆ្នាំ ២០០៩ លោក Min Aung Hlaing បានក្លាយជាមេបញ្ជាការការិយាល័យប្រតិបត្តិការពិសេស ២។ នៅក្នុងតួនាទីនេះ លោកបានដឹកនាំប្រតិបត្តិការនៅប៉ែកពាយព្យនៃប្រទេសមីយ៉ាន់ម៉ាដែលបណ្ដាលឱ្យជនជាតិភាគតិចរាប់ពាន់នាក់ភៀសខ្លួនចេញពីខេត្តភាគឦសាន ភាគខាងកើត និងតំបន់កូកាងនៅតាមព្រំដែនចិន។
ទោះបីជាមានការចោទប្រកាន់ពីបទឃាតកម្ម ការរំលោភសេពសន្ថវៈ និងការដុតនានាក្ដី លោក Min Aung Hlaing នៅបន្តឡើងឋានៈដោយនៅខែសីហា ឆ្នាំ ២០១០ លោកបានក្លាយជានាយសេនាធិការរួមនៃកងយោធាមីយ៉ាន់ម៉ា។
តិចជាងមួយឆ្នាំក្រោយមកឧត្ដមសេនីយ៍ Than Shwe បានលាលែងពីតំណែងនៅឆ្នាំ ២០១១ ហើយចាប់ផ្ដើមកែទម្រង់ប្រទេសទៅកាន់លទ្ធិប្រជាធិបតេយ្យដោយតែងតាំងលោក Min Aung Hlaing ជាអ្នកស្នងតំណែងរបស់លោក។
លោក Min Aung Hlaing បានចរចាជាមួយលោកស្រី អ៊ុងសាន ស៊ូជី ដើម្បីរៀបចំដំណើរប្រទេសទៅកាន់លទ្ធិប្រជាធិបតេយ្យ។ លោកបានធានាឱ្យយោធាកាន់កាប់អាសនៈ ២៥% ក្នុងសភា និងតំណែងរដ្ឋាភិបាលសំខាន់ៗទាក់ទងជាមួយសន្តិសុខជាតិ ហើយទប់ទល់នឹងការព្យាយាមរបស់បក្ស NLD ក្នុងការធ្វើវិសោធនកម្មរដ្ឋធម្មនុញ្ញ និងកាត់បន្ថយអំណាចយោធា។
ក្នុងការបោះឆ្នោតឆ្នាំ ២០១៥ គណបក្ស NLD បានទទួលជ័យជម្នះអាសនៈភាគច្រើនក្នុងសភា ដែលលោក Min Aung Hlaing គឺហាក់ដូចជាសម្របខ្លួនទៅនឹងការផ្លាស់ប្ដូរនេះ ដោយធ្វើការទទួលស្គាល់លទ្ធផលបោះឆ្នោត និងបង្ហាញខ្លួននៅក្នុងព្រឹត្តិការណ៍សាធារណៈជាមួយលោកស្រី អ៊ុងសាន ស៊ូជី។
នៅឆ្នាំ ២០១៦ និងឆ្នាំ ២០១៧ យោធាបានបង្កើនការបង្ក្រាបទៅលើជនជាតិភាគតិចរ៉ូហ៊ីងយ៉ានៅរដ្ឋរ៉ាក់ឃីនភាគខាងជើងប្រទេសដែលនាំឱ្យមានជនជាតិមូស្លីមរ៉ូហ៊ីងយ៉ា ជាច្រើនភៀសខ្លួនចេញពីប្រទេសមីយ៉ាន់ម៉ា។
ប្រទេសលោកខាងលិចមួយចំនួនបានថ្កោលទោសការបង្ក្រាបនេះថាជាការ «ប្រល័យពូជសាសន៍»។ នៅឆ្នាំ ២០១៩ សហរដ្ឋអាមេរិកបានបានដាក់ទណ្ឌកម្មលើលោក Min Aung Hlaing និងមន្ត្រីយោធា ៣ រូបផ្សេងទៀត។
អគ្គមេបញ្ជាការ រូបនេះដើមឡើយគឺត្រូវចូលនិវត្តនៅខែកក្កដាខាងមុខនេះ នៅពេលលោកមានអាយុ ៦៥ ឆ្នាំដែលជាអាយុចូលនិវត្តន៍ជាផ្លូវការសម្រាប់អគ្គមេបញ្ជាការនៃកងកម្លាំងប្រដាប់អាវុធប្រទេសនេះ។ តែដោយផ្អែកលើការចោទប្រកាន់ថាមានក្លែងបន្លំការបោះឆ្នោតខែវិច្ឆិកា ២០២០ លោកបានធ្វើរដ្ឋប្រហារផ្ដួលរលំរដ្ឋាភិបាលស៊ីវិល ហើយបន្តអំណាចរបស់លោក។
យ៉ាងណាមិញប្រទេសមីយ៉ាន់ម៉ាស្ថិតក្រោមការគ្រប់គ្រងរបស់យោធាដោយផ្ទាល់អស់រយៈពេលជិត ៥០ ឆ្នាំមកហើយតាំងពីរដ្ឋប្រហារឆ្នាំ ១៩៦២ មកម្ល៉េះ។ ការបះបោរមួយនៅឆ្នាំ ១៩៨៨ បានជំរុញឱ្យរដ្ឋាភិបាលយោធារៀបចំការបោះឆ្នោតជាលើកដំបូងនៅឆ្នាំ ១៩៩០ ដែលការបោះឆ្នោតនេះត្រូវបានឈ្នះដោយគណបក្ស NLD ប៉ុន្តែសមាជិកសភាជាប់ឆ្នោតដែលរួមមាន លោកស្រី អ៊ុងសាន ស៊ូជី ត្រូវបានចាប់ខ្លួនទាំងអស់មុនពួកគេចូលកាន់អំណាច។ នៅឆ្នាំបន្ទាប់លោកស្រី អ៊ុងសាន ស៊ូជី បានឈ្នះពាន់រង្វាន់ណូបែលសន្តិភាព ខណៈពេលដែលលោកស្រីជាប់ឃុំនៅគេហដ្ឋាន៕