ក្រុងសេអ៊ូលៈ ប្រព័ន្ធផ្សព្វផ្សាយរដ្ឋរបស់ប្រទេសនេះ បានឲ្យដឹង កាលពីថ្ងៃអាទិត្យថា មេដឹកនាំកូរ៉េខាងជើង លោក គីម ជុងអ៊ុន បានទទួលលិខិតផ្ទាល់ ១ ច្បាប់ ដែលមានអត្ថន័យល្អប្រសើរពីលោកប្រធានាធិបតីអាមេរិក ដូណាល់ ត្រាំ ស្របពេលមានភាពជាប់គាំងបញ្ហានុយក្លេអ៊ែររវាងក្រុងព្យុងយ៉ាង និងក្រុងវ៉ាស៊ីនតោន។
ការចរចា បានជាប់គាំង ចាប់តាំងពីការបរាជ័យនៃជំនួបទី២រវាងលោក គីម ជុងអ៊ុន និងលោក ត្រាំ នៅក្នុងក្រុងហាណូយកាលពីខែកុម្ភៈ ក្រោយពីមេដឹកនាំទាំង ២ បរាជ័យមិនបានឯកភាពទៅលើអ្វីដែលកូរ៉េខាងជើងនឹងមានបំណងបោះបង់ចោល ដើម្បីជាថ្នូរនឹងការកាត់បន្ថយទណ្ឌកម្មនោះ។
ភាគីទាំង ២ បានស្តីបន្ទោសគ្នាទៅវិញទៅមកចំពោះការបរាជ័យនៃជំនួបនោះ ប៉ុន្តែមេដឹកនាំទាំង ២ ក៏បានបង្ហាញពីឆន្ទៈជួបគ្នាជាថ្មី ដោយលោក ត្រាំ បាននិយាយនៅដើមខែនេះថា លោកបានទទួលលិខិតដ៏ស្រស់ស្អាតមួយច្បាប់ពីលោក គីម ជុងអ៊ុន។
កាលពីថ្ងៃអាទិត្យ ទីភ្នាក់ងារព័ត៌មានមជ្ឈិមរបស់កូរ៉េខាងជើង ( KCNA) បានរាយការណ៍ថា ត្រាំ បានសរសេរទៅកាន់លោក គីម ជុងអ៊ុន ដែលបាននិយាយដោយការពេញចិត្តថាលិខិតនោះមានអត្ថន័យយ៉ាងល្អប្រសើរ។
ទីភ្នាក់ងារព័ត៌មាន KCNA បានឲ្យដឹងទៀតថា៖ «ដោយបានសរសើរដល់មហាវិទ្យាល័យដែលបានវិនិច្ឆ័យនយោបាយ និងការលើកចិត្តពិសេសពីលោកប្រធានាធិបតី ដូណាល់ ត្រាំ លោកដឹកនាំកូរ៉េខាងជើង គីម ជុងអ៊ុន បានថ្លែងថា លោកនឹងពិចារណាអត្ថន័យគួរឲ្យចាប់អារម្មណ៍នោះហ្មត់ចត់បំផុត»។
របាយការណ៍នោះ មិនបានផ្តល់ព័ត៌មានលម្អិតអំពីលិខិតនោះឬ ពេលណាលិខិតនោះត្រូវបានផ្ញើ និងទទួលបាននោះទេ៕ AFP/PSA