ក្រុងវ៉ាស៊ីនតោន៖ ប្រធានាធិបតីអាមេរិក លោក ដូណាល់ ត្រាំ កាលពីថ្ងៃចន្ទបានប្តេជ្ញាចេញបញ្ជាឲ្យយោធាបង្ក្រាបទៅលើការតវ៉ាហិង្សាកើតឡើងក្នុងជំនាន់មួយដែលកំពុងរួបរឹតអាមេរិក ដោយបានថ្លែងថា លោកកំពុងបញ្ជូនកងកម្លាំងរាប់ពាន់នាក់នៅតាមផ្លូវនានានៃរដ្ឋធានី និងបានធ្វើការគំរាមដាក់ពង្រាយទាហាននៅក្នុងរដ្ឋជាច្រើនទៀតដែលមិនអាចគ្រប់គ្រងឡើងវិញនោះ។
ភាពតានតឹងកាន់តែខ្លាំងឡើងបានកើតឡើង ១ សប្តាហ៍ ក្រោយពីមានការស្លាប់លោក George Floyd នៅក្នុងទីក្រុងមីននៀប៉ូលីស ជាបុរសស្បែកខ្មៅគ្មានអាវុធនៅក្នុងដៃម្នាក់ ដែលបានស្លាប់នៅពេលមន្ត្រីប៉ូលិសស្បែកសម្នាក់ បានយកជង្គង់ទៅសង្កត់នៅលើ ក របស់លោក ដោយបានបង្កឲ្យមានភាពចលាចលស៊ីវិលយ៉ាងអាក្រក់បំផុតដែលមិនធ្លាប់មានជាច្រើនទសវត្សរ៍មកហើយនៅក្នុងទីក្រុងញូវយ៉ក រដ្ឋឡូសអេនជឺលេស និងនៅតាមទីក្រុងរាប់សិបផ្សេងទៀតនៅសហរដ្ឋអាមេរិក។
ក្រោយពីត្រូវបានរិះគន់ជុំវិញការនៅស្ងៀមស្ងាត់របស់លោក ចំពោះវិបត្តិដែលកាន់តែអាក្រក់ខ្លាំងឡើងនោះ លោក ដូណាល់ ត្រាំ បានថ្លែងជាការបង្កសង្គ្រាម នៅក្នុងសុន្ទរកថាទៅកាន់ប្រជាជាតិចេញពីសួនច្បារមួយនៃសេតវិមាន ខណៈដែលប៉ូលិសបានបាញ់ឧស្ម័នបង្ហូរទឹកភ្នែកទៅលើក្រុមអ្នកតវ៉ាដោយសន្តិវិធីនៅខាងក្រៅរបង។
លោក ត្រាំ បានថ្លែងថា៖ «ខ្ញុំកំពុងបញ្ជូនទាហាន និងតម្រួតយោធាប្រដាប់ដោយអាវុធធុនធ្ងន់ជាច្រើនពាន់នាក់ និងមន្ត្រីអនុវត្តច្បាប់ជាច្រើនទៀត ដើម្បីបញ្ឈប់ការធ្វើកុបកម្ម ការលួច ប្លន់ ការមានចរិតបំផ្លាញ ការវាយប្រហារ និងការបំផ្លិចបំផ្លាញទ្រព្យសម្បត្តិ មិនអាចអត់ឱនឲ្យបានជាដាច់ខាត»។
លោក ត្រាំ បានរិះគន់ទៅលើចលាចលនៅពេលយប់កាលពីពេលកន្លងទៅនៅក្នុងទីក្រុងវ៉ាស៊ីនតោនថា ជា«ការអាម៉ាស់យ៉ាងខ្លាំង» ហើយបានអំពាវនាវឲ្យអភិបាលរដ្ឋមួយចំនួន «គ្រប់គ្រងផ្លូវទាំងនោះ»។
លោកបានថ្លែងថា៖ «ប្រសិនបើទីក្រុងមួយ ឬរដ្ឋបានបដិសេធមិនចាត់វិធានការ ដែលចាំបាច់ដើម្បីការពារអាយុជីវិត និងទ្រព្យសម្បត្តិរបស់ក្រុមពលរដ្ឋរបស់ពួកគេទេ បន្ទាប់មកខ្ញុំនឹងដាក់ពង្រាយយោធាអាមេរិក ហើយដោះស្រាយបញ្ហាឲ្យបានឆាប់ជូនដល់ពួកគេ» ដោយបានប្រកាស «ចាត់វិធានការទៅលើក្រុមភេរវករ នៅក្នុងប្រទេសទៀតផង»។
ទោះបីជាវោហារសព្ទរបស់លោក ដូណាល់ ត្រាំ បានធ្វើឡើងក្តី ក៏ការតវ៉ាកាលពីថ្ងៃចន្ទបានបង្ហាញថា ជាការតវ៉ាទ្រង់ទ្រាយធំដោយសន្តិវិធីនៅក្នុងក្រុងធំៗមួយចំនួននៅអាមេរិក ហើយការលួចប្លន់ទ្រព្យសម្បត្តិ ត្រូវបានគេរាយការណ៍ថាមាននៅក្នុងទីក្រុងញូវយ៉ក និងរដ្ឋឡូសអេនជឺលេស។
ទោះបីជាយ៉ាងណាក៏ដោយ ក៏នៅក្នុងអំឡុងសុន្ទរកថារបស់លោកការអនុវត្តច្បាប់រួមមានតម្រួតយោធាបានប្រើប្រាស់ឧស្ម័នបង្ហូរទឹកភ្នែក ដើម្បីបំបែកក្រុមអ្នកតវ៉ានៅខាងក្រៅសេតវិមាន ដូច្នេះ លោក ត្រាំ អាចដើរឆ្លងកាត់ផ្លូវទៅកាន់វិហារ St Johns ដែលមានអាយុ ២ សតវត្សរ៍នោះ។
លោក ត្រាំ បានប្រកាសខណៈដែលលោកឈរនៅមុខបង្អួចព្រះវិហារដោយកាន់ព្រះគម្ពីរ ១ ក្បាល និងឈរឲ្យគេថតរូបថា៖ «យើងមានប្រទេសមួយដ៏អស្ចារ្យ»។
បេក្ខជនប្រធានាធិបតីបក្សប្រជាធិបតេយ្យលោក ចូបៃ ដិនបានថ្លែងនៅលើធ្វីធើរថា៖ «គាត់កំពុងប្រើយោធាអាមេរិកប្រឆាំងប្រជាជនអាមេរិក»។
លោកថ្លែងថា៖ «គាត់បានប្រើឧស្ម័នបង្ហូរទឹកភ្នែកទៅអ្នកតវ៉ាដោយសន្តិវិធី និងបាញ់គ្រាប់កៅស៊ូ។ ដើម្បីរូបថតមួយសន្លឹកដើម្បីកូនៗរបស់យើង ដើម្បីប្រទេសរបស់យើង យើងត្រូវតែធ្វើឲ្យគាត់បរាជ័យ»។
សមាជិកនៃព្រះវិហារមួយនៅក្រុងវ៉ាស៊ីនតោន អ្នកស្រី Marian Budde បានថ្លែងថា អ្នកស្រីខឹងយ៉ាងខ្លាំងនៅពេលទៅលេងព្រះវិហារ ដែលអ្នកស្រីនិយាយថា ត្រាំ មិនអនុញ្ញាតឲ្យចូល៕ AFP/SK